Read Lashi YOBA 42 Bible Online

YOBA 42 - Lashi bible

YOBA 42

¹Hau: thang: ASEING ri Yoba dang: phuid: byid: da:.

²ASEING we"- nang gi yoem: so' gyi: lho: nang koid nau da" moo" dangain" ri yo" koid su: nghoid ziri ngoo si' bye:.

³Ngoo ci: nyang: ase' zi re" phajhi" ri khasu" wigi voem" myid: la"- ga: nang myid: da:. Ngoo gi ngoo ase' gyo: da" khyoo: ri tid wigi ngoo atho' se' gyo: da" moug" pho" moo" joem khyoo: ri we' tid bye:.

⁴Nang gi ngoo ri nang tid nyid uri tam" gyo: lho: re" dang: myid: joem ri phuid: kyoo" wa shid re" tid bye:.

⁵Lid: loo bye: da" ayo, gu: moo ngoo gi subi" gootu: wigi re" khyoo: ri tid kyo" boem zi za: dalhung se'. Nghoid loug we' akhid" koem' gi nang ri nga" myojid" wigi nyang: shau" myang bye:.

⁶Houg: lho: ngoo gi ngoo tid lid: loo bye: gu: dangain" gang mo myid: sho' wigi pheilhoug: yo' myimoeb boem" moo nheigloem: thid pyam bye:.

⁷ASEING gi Yoba yo' bain doem goo' lang" Elipha ri «Ngoo gi nang yo' re" byencang" eig yug ri nheig yo:. Ciwim ga: ri nanu" gi nga" khyoo: ri nga" dei zoo: Yoba yhang: ti" deingmain" khyo" atid nghoid ago".

⁸Akhid" Yoba jhang nuloo: nyhed du: yo' yang loo: nyhed du: she: yhe: wigi hau: joem ri nanu" nya: shid re" xoin" nghe' ngei" ge'. Yoba gi nanu" shid re" akyu" mho' byid: wa. Houg: lho: ngoo gi nya: akyu" mho' dang: ri tam" gyoo: byid: lho: nanu" loem zoo: wa moin: yi" da" khyo" ngi: ayoem" nhang: wa. Nanu" gi nga" khyoo: ri nyang: yhang: ti" deingmain" kyo" atid nghoid ago".

⁹Elipha- Bildad yo' Zopha gi ASEING wigi nyangnu" ri koid nhang: ziyo' dayhang: ti" koid ago". Houg: lho: ASEING gi Yoba da" akyu" mho' dang: ri tam" gyoo: byid: da:.

¹⁰Houg: lho: Yoba gi nya: da" byencang" soem" yug shid re" akyu" bain mho' byid: thang: ri ASEING gi nyang: ri dalheing: doem nyid gi yab ge yoo" zoo: yoo" shug nhang: lho: shid phyang" nyang: lhoung yo" lid: lo tho' eig boem doem byid: da:.

¹¹Yoba da" mang: nhung" yi dangain"- nya: nhammoo" yi dangain" yo' shid phyang" mo nya: bidnoem byencang" yi dangain" bang: nyang: ri re" shau" wigi nyang: yo' dage" nya: yhoem: moo zoo: shug pui" koid ago". Nyangnu" gi ASEING wigi nyang: ri kham zoo: nhang: da" yau: khi" dangain" shid re" nheig khyeug jheddab myid toin" shed lho: nheig teing byid: ago". Yugkhang" moo" gi nyang: ri ngei yo' sheing: lo, pain" daloem: loem: jhungshug re" byid: ago".

¹²ASEING gi Yoba da" apyaid thang: du ri xang: shi" du moo mainkaid byid: da" tho' je myoo: sho' mainkaid byid: da:. Yoba gi yang damoin myid: khyeing"- Gola-ug khyug khyeing"- nu: eig khyeing- loo zei: dakhyeing" du: seing: da:.

¹³Nyang: gi yuggi zoo: nyhed yug yo' myiyi: zoo: soem" yug da" nya: phoo bue" da:.

¹⁴Nyang: gi bi moo" yug ri Yemima- bi laid yug ri Kezia- nge thang yug ri Keren Hapug ga: myheing da:.

¹⁵Mougmyid gyab goin" moo Yoba da" myiyi: zoo: yi yhi' yung" da" myiyi: yi dayug we' anyid nghoid ago". Nya: nham: ho' yi da" nya: phoo gi nyangnu" ri nya: mang: bang: yo' dayhang: ti" za: jonu" mid ri kho' gam byid: da:.

¹⁶Hid su" bui" thang: Yoba gi dasho: myid: xi: zain dei nyid lho: nya: myid: yi myid: ki" yiri myang kho' da:.

¹⁷Hau: thang: nyang: gye" mang: thang: ri shid: lo" da:.