Read Lashi YOBA 7 Bible Online

YOBA 7 - Lashi bible

YOBA 7

¹Xangsu: byu kang: dei khyoo: gi akoid atho' koid da" gyipui" yo' du. Ayau: akhi" moo" zei: zo: ziyo' we' du da:.

²Jham" da" bid yoeb ri myid vho: nyid da" join yo' we' du. Vhoo" kung: phoug" lang" nyid da" moo" zei: su: yo' we' du.

³Lhammoo" dakhyab thang: dakhyab ngoo kang: dei wa shid re" ci: ayoo". Damyen thang: damyen kougshu: zigi nga" jhang ju" lo da:.

⁴Ngoo yhoeb lo" uri ayo, gye" myang" thui: gyo:. Ngoo myen goin" gung phug lheig bo" wigi moug: boo" wa ziri myid vho: nyid.

⁵Nga" gung gi lugdung: yo' byeung" jo, da:. Dam joid yo' byeung" jo, da:. Nga" dam joid mo foid thu re" da:.

⁶Nga" bidnyid joem gi myid byu joyoo abo zi lid lo" boem. Yo, gain: mo yo, pug tho' je myab khyo" lid lo" ago".

⁷O" Mangsoo we"- nga" kangso' gi so' dalheing: shi: za: danghoid ziri myid boin: we'. Nga" ngei pyo: khyoo: gi thang lo" byug bye:.

⁸Nang ngoo ri akhid" shau" myang nghoid loug we' khanham we' adoem myang loo wa. Nang ngoo ri sho: nghoid rigi ngoo lo" byug loo: wa.

⁹Jo, bei: lo" da" jhoemmoug" yo' dakhyo" byu gi shid: lo" lho: khanham we' adoem tau" loo loo:. Nyang: ri si' bang: dangain" wigi nyang: ri to" myid pyam ago".

¹¹Anghoid- ngoo gi sam: zoo: ayo" tam" nyid. Ngoo nheig yo: wigi vhooloo kho" da:. Ngoo dang: ji ca" da:.

¹²Nang gi ciwim ngoo ri lhoug zung" nyid la". ngoo ri panglai: mainjung ein: nang jho: rhe".

¹³Ngoo gi leung lo" wigi dougnoo: wa soin'. Ngoo gi nga" dam khe" no jang" mo noo gi wa sho:.

¹⁴Nghoid loug we' nang gi ngoo ri yhoebmo, moo kyug da:. Nang gi ngoo ri yoeb myang yo' yhoeb zeig zeig nhang: da:.

¹⁵Houg: zigi he: yau: khi" ashoo" ajhen" byu gung moo dei nyid wa tho' Ju: lang" shid: ri she' daje gi wa ein: myid ju" sho' nghoid da:.

¹⁶Ngoo asoem" byid: bye:. Ngoo gi anau dei nyid loo. Ngoo ri kyeing" nyhid: too" we'. Nga" kangso' gyung: khyoo: gi ce: akyu" aboo.

¹⁷Byu gi ciwim yoomo re" shid re" sung yhouggyen: la". Nyangnu" koid ziri ciwim yu" nyid la".

¹⁸Nang gi nyangnu" ri nab soin: khang" moo ca: yu" byid: nyid wigi Nyangnu" ri ayo, khang" moo" moo joeb ca: yu" nyid da:.

¹⁹Nga" shakain" ri jen" yo" myoug: sho' daso' khyalang" goo" khyoo: nang ayu" loo wa la".

²⁰Thung" lhung su: nang we"- nga" yooboo yoomo nang dam loem zo: rhe". Ngoo ri thang" thi: tu' jang: khyo" ciwim ci: la". Ngoo gi re" shid re" yoolid: bue" jo, la".

²¹Nang gi nga" yooboo ri ayo" khyoid byid: loo wa la" Ngoo koid shoid ziri nang yooboo ayo" khyoid byid: loo rhe" Daso' ri ngoo gi nga" loeb khoug: moo ju" jo, wa bye:. Houg: lho: nang ngoo ri cang sho: nyid uri ngoo gi lo" byug wa bye:.