Read Lashi YOBA 8 Bible Online

YOBA 8 - Lashi bible

YOBA 8

¹Nang gi re" dang: lam" dang: zoo: bain tid bye: rhe".

³Mangsoo gi tarha" deingmain" khyoo: ri khanham we' ane shoem' pyam. nyang: gi jo ziri koid wa khanham we' ato" pyam nghoid da:.

⁴Re" zoo: yigi Mangsoo ri yooboo shoid boem eung: bye:. Houg: lho: nyang: gi nyangnu" kham zoo: wa moin: yi" da" khyo" nyangnu" ri yooboo dam byid: abye:.

⁵Nghoid loug we' akhid" lheing: lo wigi yoem: bo da" Mangsoo ri goeb mho' we'.

⁶Nang gi deungmain" wigi younglho' su: nghoid rigi Mangsoo re" wigi nang ri pang" yu wa. Houg: lho: re" aphoug" jhungshug khyo" re" yhoem: byu yiri doem tu: to' byid: loo wa.

⁷Mangsoo nang ri byid: wa ziyo' tu' yu" ri nang soem" pyam bye: jonu" dangain" gi ci: lang" ayo" tu' nghoid da:.

⁸Goonham' mo phajhi" ri daso' khyalang" sho: yu" shi" we' Ngoonu" phoug" phyid" yi jhau yu da" deingmain" ziri myid yu" yu" we'.

⁹Ngoonu" da" kangso' gi leung" da:. Ngoonu" ci: nyang: asi'. Ngoonu" gi mougmyid tho' moo bid yoeb su" nyid lid lo" da:.

¹⁰Nghoid loug we' goonham' mo phajhi" boo bang: nang ri jhau" shid baja". Nyangnu" tid dang: ri tam" gyoo: we'.

¹¹Gyidpheing" gam joem gi gyid ajo, jang" moo ayo" yug. Houg: joem ri thoem" nhoin: nghe: shoid moo khanham we' amyang yu".

¹²Gyid kain" byug lang" ci: yhung: agi" shi" ri hau: joem gi xang: shi" yhau" lo" da:.

¹³Mangsoo abo da" bang: gi hau: gyidpheing" gam yo' du da:. Mangsoo ri to" myhid pyam lang" nyangnu" da" myid byu khyoo: ci: phyug pyam da:.

¹⁴Nyangnu" gi phyoogang: yhoem: khyeing: ri myid byu nyid ago".

¹⁵Nyangnu" phyoogang: yhoem: ri nghe: nyid ri hau: zigi nyangnu" ri yo" zei: ci: wa la". Nyangnu" khyeing: dakhaid ri zhoeb ci ri hau: zigi nyangnu" ri yo" yab jo, nhang: wa la".

¹⁶Akhyeing" bang: gi bid zhoo: moo myo, gam yug thu re" yhang: ti" yug thu re" boem. Dakhyam: goin" moo byo lo" da" myo, gam yo' dayhang: ti" yug re" da:.

¹⁷Houg: joem da" agyi: joem gi lugzeing joem ri thoeb pyam ago". Houg: lho: lugzeing khang" moo" moo teing za: nei zhug to" da:.

¹⁸Nghoid loug we' hau: joem ri phoin' pyam lang" Nyangnu" hau: joyoo moo yug lid lo ziri hang" asi' goo' wa.

¹⁹Nghoid bye:. He: zi dangain" gi akhyeing" bang: yo" yu da" ngei pyo: khyoo: nghoid da:. Akhid" gootu: byu yi re" wigi nyangnu" joyoo ri yu pyam byid: ago".

²⁰Nghoid loug we' jhug zug bang: ri Mangsoo khanham we' ashe: pyam too". Akhyeing" bang: ri we' khanham we' pang" thoug byid: wa anghoid.

²¹Nyang: gi nang ri doem yi doem nyhoo: nhang: wa.

²²Nghoid loug we' nyang: gi nang ri ngheing" bang: ri ngi: yoem" nhang: loo wa. Houg: lho: akhyeing" bang: da" yhoem: joem gi bei: byug wa.