Read Lashi YOBA 9 Bible Online

YOBA 9 - Lashi bible

YOBA 9

¹Nghoid bye:- hau: gu: dangain" ri shid phyang" ngoo shau" gyo: yu" bye:. Nghoid loug we' byu dayug gi Mangsoo yo' moo" tid go" ri khasu" yo" ge oung: wa la".

³Nyang: yo' hang" yo" ngeug goo" wa la". Nyang: gi hang" wigi we' ayo" phuid: da" dang: myid: dakhyeing" ri yo" myid: da:.

⁴Mangsoo gi phajhi" gye" bo wigi yoem: so' gye" gyi: da:. Nyang: ri hang" avoem" thougtheung yab jo, nghoid da:.

⁵Nyang: gi atid poin" too" loo: boem joem ri yu: loo" nhang: da:. Houg: lho: nheig yo: ziyo' hau: joem ri phyo' shoin' pyam da:.

⁶Mangsoo gi myid leig leig nhang: lho: myidgung ri lhei' nhoin' kaid da:. Nyang: gi myidgung ri thug to" da" zeing bung: joem rilang" lhei' nhoin' kaid da:.

⁷Nyang: gi bid ri athu sho' myen" ri kyi: aboo" sho' yo" toem' pyam da:.

⁸Mangsoo gi mougkhung: ri pei: myu" kaid uri hang" apang" nghoid da:. Panglai: main jung: da" nung" khung: moo nang: nhe" ri we' hang" apang".

⁹Mangsoo gi mougkhung: moo kyi: joem nghoid da" Coid kyi:- Boo" kyi:- Kyi: gyo: lakhyoin- Kano, lid: tu joem ri tei" lhang" to" da:.

¹⁰Nyang: koid da" moo" zeing joem ri ngoonu" atho' se' gyoo:. Houg: lho: nya: da" mau" pho" alho: again gi thang ga: zi ajo,.

¹¹Mangsoo so" lid: loo" nghoid loug we' nyang: ri ngoo amyang.

¹²Nyang: vho: ziri nyang: yu pyam da:. Nyang: ri hang" ayo" toem'. Nyang: ri hang" wigi we' «Nang cikoid nyid» ga: ayo" myid.

¹³Mangso da" nheig yo: khyoo: gi geing: teing jo,. Nyang: gi nyang: ri ngeug thug da" panglai: mainjung Rahab ri bo pang" da" nya: gyivoo ri khyoeb mhoin' pyam da:.

¹⁴Houg: yoomo Mangso ri phug tid wa dang: khoin" joem ri ngoo khasu" se' yo" shoo: wa la".

¹⁵Ngoo gi yooboo ayoo" nghoid loug we' Nga" tarha" agyi Mangsoo moo nheig khyeug byid: wa ziri za: dayo" mho' lo.

¹⁶Hougsu" nghoid loug we' nyang: wigi ngoo ri dang: tid nhang: nghoid ri Nyang: ngoo ri tam" gyoo: byid: ri" wa ein: atho' se' myid loem.

¹⁷Nyang: gi ce: sei: abo jang" moo ngoo ri baid khyoid pyam lho: thung" khyoid pyam wa shid re" uglid ri nhang: kaid.

¹⁸Nyang: gi ngoo ri so' thid shi: wa akhang" abyid:. Nyang: gi nga" apyaid moo kho" zi byeung" sho' kaid too" byid: abye:.

¹⁹Ngoo yoem: joem kaid ri gi wa la". Mangsoo ri yoem: joem wigi jhen" wa la". Ngoo gi nyang: ri tarha" yung" khyoo: khi: wa la". Nyang: ri hang" wigi yo" nhang: wa la".

²⁰Ngoo gi yooboo ayoo"- jhug zug su: nghoid. Nghoid loug we' nga" dang: joem gi yooboo sung shoid bye:. Houg: lho: ngoo tid da" dang: ja: khang" moo" gi ngoo ri yooboo zhug da:.

²¹Ngoo gi yooboo ayoo" su: nghoid. Nghoid loug we' ngoo ayo" goin coung: loo. Ngoo gi nyid ngheing" bye:. Ce: yhouggyen: zi anghoid. Yooboo yoo" Nghoid nghoid yooboo ayoo" nghoid nghoid Mangsoo gi ngoonu" dangain" ri phyo' shoin' pyam wa.

²³Yooboo ayoo" su: nyeigdain tung" shid: lo" ri Mangsoo yi da:.

²⁴Mangsoo gi akhyeing" bang: lo, moo mougmyid ri ab byid: da:. Nyang: gi tarha" agyi dangain" ri myo, jid nhang: da:. Houg: lho: hau ziri Mangsoo akoid ri hang" koid la".

²⁵Nga" bidnyid gi myab za: tang" lo" da:. Hau: gu: mo danyid" we' agi nghoid da:.

²⁶Nga" apyaid gi myab thang da" gyid lhid yhang: ti" lid lo" da:. Hau: zigi thanglhoo ri khaid gyoo" lo da" zoin bung: yo' dayhang: ti" myab da:.

²⁷Ngoo gi yi nau soem" si' nyid lho: nga" dam khe" nho: ziri to" myhid pyam wa soin' ri nga" kyi" khyeug gi ngoo ri doem tau" kyug nyid da:. Mangso wigi ngoo ri yooboo yo" ga: yooboo zhug to" ziri ngoo si' bye:.

²⁹Ngoo ri yooboo yo" ga: yooboo zhug lho: ngoo ri ciwim pyi: sho: nyid la".

³⁰Nga" yooboo joem ri ce: ja: sapya: wigi we ayo" cid" yung" cid" lho' pyam nghoid da:.

³¹Mangsoo gi ngoo ri aco' ajhoid thoem" khoug: khyoo: she: pyam kaid. Houg: lho: nga" byimi joem lang" ngoo ri co' pyam da:.

³²Mangsoo gi xangsu: byu nghoid rigi nyang: ri ngoo dang: yo" phug tid wa. Nga" eig yug da" myeing" myoo: go" khyoo: ri dang: yo" phyed wa shid re" tarha" yung" khyoo: yo" yhi: wa.

³³Nghoid loug we' nga" eig yug agyoo: moo dang: vang tid byid: wa byu hang" anyid nghoid da:. Mangsoo yo' nga" agyoo: moo dang: phyed byid: wa hang" anyid.

³⁴Mangsoo we"- ngoo ri yooboo dam byid: khyoo: ri to" pyam re. Re" kyug tain' khyoo: ri yu pyam byid: la.

³⁵Ngoo agyug. Ngoo dang: tid wa bye:. Ciwim gari nga" nheigloem: ri ngoo se'.