Read Lashi COUNG" NGHEI 102 Bible Online

COUNG" NGHEI 102 - Lashi bible

COUNG" NGHEI 102

¹[51] O" ASEING we" nga" akyu" mho' dang: ri tam" gyoo: byid: we' pang" thoug byid: wa shid re" ngoo ngau yoid thui: ri tam" gyoo: byid: we'.

²Ngoo yau: khe" kyi" khyeug zi shoug" nyid uri nga" jang" mo vi: khyoo: alheung: loo- ngoo mho' yoid uri: ngoo ri tam" gyoo: byid: lho: wigi myab myab, pang" yu we'.

³Nga" da" kangso' gi myikhoug" vhu" su" bei: lo" byoug wigi Nga" gung du: we' myi: yhang: ti" nge" nyid.

⁴Ngoo gi vu" fu" kyug ri yhang: ti" nang: zeug ci: zi shoug" nyid wigi zoo: noem ri: zoo: nau myid lang" aboo loo.

⁵Ngoo gi gye" nyang:- nookyeing" dakyeung" nyid lo- ngoo gi shooyoug: yo' shooyid mo jain" lho: ci" we' aboo loo.

⁶Ngoo gi: siyoo mo kyang: da" ngho' dadu: yo' byo, yoin: she: pyam, too" bye: da" khung" boeb, yhang: ti" za danghoid.

⁷Ngoo gi ayo" yhoeb yoomo yhoemkhung: phoug tho' moo: zhoung: jo, da- ngho' fang: khung" boeb ti" ngoo bue" nyid.

⁸Nga" gyivoo joem dangain" mo, gi danyid goin" ngoo ri juang" yi nyid boem bye: nya nu" gi nga" myeing ri lang: lho: nheing" nyid ago".

⁹Khasu" wim gari re" da" nheing yo: ziyo' nheig kho" yo: khyoo: yoomo myiyab gi nga" zoo: noem bue" nyid. Nga" shug noem gi nga" ngoug byid gyid yo' lheug shoug nyid. Nang gi: ngoo ri koid: lang: tu: kaid lho: vi: khyoo: du" lhei" pyam bye:.

¹¹Nga" da" kangso' gi bidvang zoo" mo bid shoem: yoeb, yhang: ti" nghoid nyid wigi ngoo gi kyoug byoug da" vufu" yoo yo' dadu jo, lo.

¹²Nghoid loug we' ASEING we"- nang gi khanham we' dageung: teung jo, da" khokham nghoid nyid wigi byu nyid xe: yam: khang" moo" mo mo, gi nang ri daboin: so" nyid boem wa zi nghoid.

¹³Nang to' lo wigi Ziun ri nheug khyeug wa zi nghoid- nyang: ri nheug khyeug wa ayo, ju" lo nyid bye:- hau: ayo, gi akhid" nyang: nghoid nyid bye:.

¹⁴Nyang: gi byo, yoin" lo' zi shoug" nyid nghoid loug we' re" da" dei zoo: yigi nyang: ri jheddab nyid. Nyang: gi byo, yoin" jo, nghoid loug we' nyangnu" gi nyang: ri nheug khyeug shoo" myen: myid bo nyid boem.

¹⁵Byumyu" yigi ASEING ri gyoug phau" myang: lo boem wa. Mougmyid mo khokham yi dangain" gi Nya: da" yoem moo" ri gyoug phau" myang: lo boem wa nghoid.

¹⁶ASEING gi Ziun ri: doem' so, koid to" uri nyang: gi: nya: da- gyi: sheung: phung" yoeb ri pang shug wa zi nghoid.

¹⁷Nyang: gi she: pyam, to" zi shoug" nyid da- nya: mung" byu yi da" thui: ri shau" gyo: ziyo' Nyangnu" da" akyu" mho' thui: ri gyoo: byid: wa zi nghoid.

¹⁸Thang: pyaid myid: yam: zo: xeig bang: shid re" ASEING zei: loo bye: da" moo: zoo" ri lhid" xoem" too" we'. Hougsu" nghoid lang" gi akhid" akhu: ri" shi" mo, we' re" shoug" coung" nghei lo boem wa zi nghoid.

¹⁹Hau: ASEING gi myhang: thang da" nya: gyeung" shang: joyoo mo wigi goeb yu" nyid. Nyang: gi mougkhung: mo myid jang: khyoo: goeb, yu" nyid.

²⁰Nyang: gi thung: lung" mo, da- nookyeing" thui: ri shau" gyo: wigi said wa shid re" dang: phyed too" shoug" bang: ri loid byoin loo" nhang: nyid.

²¹Nya: myeing khyang" ri Ziun mo tid kyo" boem wa nghoid- nyang: gi Yerusalem mo coung" nghei byid: ziri shoug" kham: yu wa zi nghoid.

²²Houg: lang" byumyu" ja: khang" moo" yo' mungdain: yi dage" zeung: re" boem lho: ASEING ri noku loem khau: boem wa nghoid.

²³Hau: ASEING gi ngoo ri ngi shi" ayo, mo wigi yoem neung: loo" nhang: bye:- nyang: gi nga" da" kang: so' ri: leung" loo" nhang: bye:.

²⁴O" Mangsoo we"- ngoo amang: loo" shi" ri nga" kangso' ri ayoeb yu byid: shi. nang gi apyaid atoo: moo: dadei nyid su: nghoid.

²⁵Nang gi goonham gooco' ri mougmyid yoosoo" ri phain to" lho: re" da" lo, wigi mougkhung: mougdi ri nanya: lo, wigi koid too" bye:.

²⁶Houg: bang: gi byoug shang loo" Nghoid loug we' nang gi dageung: jo Houg: bang: dangain" gi byimi joid yhang: ti" axoug" bue" lo" wigi byimi ri yhang: ti" nang hau: ziri thid pyam lho: bei: shoem: lo" byoug boem wa zi za: nghoid.

²⁷Nghoid loug we' nang koem gi dageung: teung nyid wigi re" da" apyaid gi khanham we' thang ga: zi ajo.

²⁸Ngoonu" da" amyed ashen yigi goug: goug: nyu: nyu: za: yo" nyid boem wa ziyo' nyangnu" da" amyed ashen yigi re" goem loem da" khoug: moo gau: nyu: nyid boem wa zi nghoid.