Read Lashi COUNG" NGHEI 103 Bible Online

COUNG" NGHEI 103 - Lashi bible

COUNG" NGHEI 103

¹[52] Nga" soozoo: we' ASEING ri coung" nghei nyid we' nga" gung du: emyed dangain" we"- nya: gyeung" shang: myeing ri coung" byid: we'.

²Nga" soozoo: we' ASEING ri coung" nghei nyid we' nya: da" nheig khyeug shoo" myen: khyoo: ri ato" myhid.

³Nyang: gi nga" yooboo dangain" khyoid pyam byid: bye:- Nga" noophyoo" dangain" ri we' noo ge loo nhang: bye:.

⁴Nyang: gi ngoo ri loeb duang: khoug: mo khyoid yu bye:- nya: da" jheddab nheig khyeug emyed yo' ngoo ri mainkaid byid: bye:.

⁵Nyang: gi nga" da" apyaid ri ge ziyo' joeb byeung" nhang: nyid yoomo ngoo ri zoin bung: yhang: ti" dung boem: doem zhoug lho: yoem bo nhang:.

⁶ASEING gi doin: zeig zo: zi shau" nyid mo, da" shoid khyoo: bo yab lho: dang: phyed byid: nyid wigi Nyangnu" jo: da" amyeing" akhang" ri byid: nyid.

⁷Nyang: gi Moshe ri nyang: myid soin, to" khyoo: ri toin" shed wigi Nya: da" mau" pho" moo" zoo" joem ri Israela byumyu" yiri se' nhang: nyid.

⁸ASEING gi nheig khyeug shoo" myen: lho: jheddab nyid. Nheig yoo wa ziri nhe" nyid lho: athang agoin jhed khyeing: kang: khyeing: yo' byeung" jo, su: nghoid.

⁹Nyang: gi khanham we' yooboo foin nyid su: anghoid- nyang: gi pyaid moo: too: moo nheig yo: nyid su: anghoid.

¹⁰Ngoonu" kham: yu moin: ziyo' dakhyoo" ti" nyang: gi ngoonu" yooboo dam ri: kaid nyid su: anghoid. Ngoonu" da" yooboo joem yo' shoid vhang: khyoo: joem yo' dakhyoo" ti ngoonu" ri latoo: phoug nyid su: anghoid.

¹¹Mougkhung: gi myidjang tho' moo: je myhang: jo, ziyo' dakhyoo" ti" nyang: ri phoug" myhang: mo da" tho' moo: to" da- nya: jheddab nheigloem: we' houg: yo' dakhyoo" ti" gyi: myhang: jo.

¹²Bid thu gi bidvang yo' ve: lam: jo, ziyo' dakhyoo" ti" nyang: gi ngoonu" da" yooboo joem ri ngoonu" yo' ve: lain loo" nhang:.

¹³Nya: phoo gi nya: zoo: yiri nheug khyeug shoo" myen: nyid yhang: ti" ASEING we" nyang: ri phau" myhang: nyid bang: ri nheug khyeug shoo" myen: nyid.

¹⁴Nyhang" ri ce: noem' yo' phain" so: to" zigi nyang: se' nyid nyhang" gi myidzhoo" phei" nghoid ziri nyang: gi boin: so" nyid.

¹⁵Ngoonu" da" apyaid kangso' koem gi vufu" ti" nghoid nyid siyoo mo bain: joem yhang: ti" youg gyi: lo lho: bo" young" jo, da:.

¹⁶Hau: thang: ri hau: da" atho' khyo" lid, hau, lid lo" wigi hau: zigi shu: gyo" byug bye:- hau: ziri hang" we' doem myang loo: zi anghoid.

¹⁷Nghoid loug we' ASEING ri gyoug phau" nyid mo, da" atho' moo nya: da" jheddab emyed gi khanham we' geung: teung jo, lho: nya: da" ge lho, khyoo: gi myid: yam: zo: xeig ju" sho' dangain" bang: da" tho' moo: dageung: teung jo.

¹⁸Nya: da" dang: theing khoin" ri cang yhi: bang: yo' nya: da" amyeing" tarha" moo mo, da" atho' moo nya: ge da" khyoo: gi byunyid xiyam: moo: dajo, jo.

¹⁹ASEING gi nya: da" zhungtang ri Moug: khug: tho' moo: zhoug to" wigi ASEING nyid joyoo: nghoid. nyang: gi dangain" mo, da" khokham nghoid nyid.

²⁰Nya: da" amyeing" dang: ri tam" gyo: cang yhe: lho: nya: da" jidang: tam" gyoo: mo, nghoid da" yoem: bo lho: phung" yoeb gyi: da" moug: lagyoo: yi we" ASEING ri coung" ge'.

²¹Nyang: vho: ngei da" moo" ri zei: nyid da- nya: dei zoo: yi nghoid da- mougkhung: tho' mo phung" yoeb yoem: moo" boo mo, we' ASEING ri coung" nghei nyid we'.

²²Nyang: vhoebkhang" nyid da- joyoo loem khang" moo" mo phain" so: too" matoo" bang: we' ASEING ri coung" nghei nyid we'. Nga" soozoo: we' ASEING ri coung" nghei nyid.