Read Lashi COUNG" NGHEI 106 Bible Online

COUNG" NGHEI 106 - Lashi bible

COUNG" NGHEI 106

¹ASEING ri coung" byid: we'. Nyang: gi ge lhoo su: nghoid yoomo Aseing: ri jeju" boin: nyid we'. Nya: da" jheddab emyed we' pyaid moo: too: moo dakhyoo" ti" dageung: teung jo.

²Nyang koid shug bye: da" nghoid thang moo" zoo" ri hang yo" se' tid kyo" lha". Nyang: ri moin: yi" sho' hang" yo" se coung" byid: wa lha".

³Nya: da" amyeing" tarha" ri tam" gyo: phau" cang nyid wigi deingmain" da" moo" ri khanham we' zei: nyid mo, gi ngilho' boem wa nghoid.

⁴ASEING we"- re" da" byumyu" yiri nang pang thoug da" uri ngoo ri we' bo boin: so" nyid we'. Nyangnu" ri nang khyoid yu da" uri ngoo ri we' bo khyoid yu we'.

⁵Re" da" byumyu" yi yo" loo, de, lo khyoo: ngoo ri we' myang nhang: we' re" da" byumyu" yi ngeibu: khyoo: joem ri we' ngoo ri bo kham' zoo: nhang: we' o".

⁶Ngoonu" da" phoug" phyid" yi yhang: ti"- ngoonu" gi yooboo ri doem koid shoid boem bye:- ngoonu" gi akhyeung" bang: yo' ashoeb bang: bue" nyid bye:.

⁷Egutu mung" moo nghe: khau: nyid da" ngoonu" phoug" phyid" yigi Mangso da" mau" pho" moo" zoo" joem ri ase' gyoo: nghoid ago". Nyangnu" ri myoo" sho' lheing: nyang: toin" shed bye: da- nya: jheddab da" emyed ri myoo" sho lheing: zheung: to" myhed pyam boem wigi nyangnu" gi hau: athang agoin yoem moo" bo da ASEING ri lang" hau: gyid ni thoem" mo: gyi koid boem abye:.

⁸Nghoid lug we' nyang: gi nya: da" gyi: sheung: zoug: myeing" yoem so, ri toin" shed wa shid re" dangsoo" khoin" too" bye: ziyo' dakhyoo" ti nyangnu" ri khyoid yu bye:.

⁹Nyang: gi gyid ni thoem" ri amyeing byid: kaid lang" hau: zigi: kain" lo" byug bye:. Hougsu" wim nyang: gi nya: da" byumyu" yiri kyug kyiri da" midcoo: yoo khyo" shu" gu: lid loo bye:.

¹⁰Nyang: gi nyangnu" ri ngheing" bang: da" lo, mo khyoid yu bye:. Nyangnu" da" gyivoo joem lo, khoug: mo nyangnu" ri khyoid yu bye:.

¹¹Nghoid loug we' nyangnu" da" gyivoo joem gi gyid ni thoem" moo: noeb lo" byoug boem wigi dayug we' ayo" loid lo: boem.

¹²Hau: thang: ri nya: da" byumyu" yigi nyang: to" da" dang: theing khoin" ri loem" jeung lo boem wigi ASEING ri: jikhoin" yo' coung" nghei lo boem.

¹³Nghoid loug we' nyangnu" gi nyang: koid shug bye: da" moo" zoo" joem ri phyid" za to" myhed pyam byid: boem ziyo' Nya: da" phajhi" byid: khyoo: ri alang" nyid loo: za: koid pyam boem bye:.

¹⁴Siyoo khoug: moo nyangnu" vho: ngei nyid khyoo: gi byeung" jo, bye: ziyo' Mangsoo ri ca: yu" boem abye: go.

¹⁵Houg: yoomo nyangnu" mho' da" khyoo: nyangnu" ri khyoo, byid: bye: nghoid loug we' nyangnu" ri gyoug pho" noo, phyoo" kyi" khyeug we' bo khyoo, byid: bye:.

¹⁶Nyangnu" gi hau: siyoo khoug: moo Moshe yo' ASEING da" gyeung" shang: deizoo: gi Arun ri yu" no" nyid abye: go.

¹⁷Houg: lang" mougmyid go, fo, lo wigi Dathan ri myhau: pyam byid: bye:. Abiram yo' nya: yhoem: byu yiri we' boid zeug said pyam bye:.

¹⁸Nyangnu" da" thang cang mo, da atho moo myi: gyoo" lo wigi hau: akhyeing bang: ri nge" joem: pyam bye:.

¹⁹Nyangnu" gi Sina pa: moo sheing: nujung nu" soolhoo: koid lho: hau: soolhoo: ri zheung: noku nyid boem.

²⁰Nyangnu" gi Mangso da" myonhoo: phung" yoeb ri vufu" zo: da" gougnyhoug soolhoo: yo' thid go" pyam bye:.

²¹Egutu mung" moo nya: da" mau" pho" moo" zoo" joem yo' Nyangnu" ri khyoid yu to" da" Mangsoo ri nyangnu" to" myhed pyam boem bye:.

²²Hau: mung" moo: nyang: koid shug bye: da" moo" joem gi khayhi' gyeing" mau" pho" ja: nghoid lha". Gyid ni thoem" moo: nyang: koid shug bye: da" moo" zoo" joem gi khayhang: te" da" mau" pho" ja: nghoid lha".

²³Nya: da" byumyu" yiri phyo' shoin pyam wa ga: Mangsoo tid nyid da: uri nya: da" khyen: yu dei zoo: Moshe gi Mangso shid, khoin" moo: to' yab lho: nyangnu" ri amhoin' pyam baja" ga: nyang: nheigloem: nge" nyid ziri jham" loo" nhang:.

²⁴Houg: lang" nyangnu" gi Mangso dangsoo" khoin" ri aloem" jeung boem loo: yoomo ngei pyo: mung" khyoo: vang loo" wa ziri Nyangnu" ngeug pyam boem abye: go.

²⁵Nyangnu" gi nyangnu" da" zoem" moo: zheung: loung" jo, lho: nheug yo: myeung myhu" go" nyid ago". ASEING da" amyeing" dang: ri: we' anau tam" gyoo: loo: nghoid ago".

²⁶Hougsu" nghoid yoomo ASEING gi nyangnu" ri siyoo khoug: moo shid: thang pyam nhang: wa yoomo we' nyangnu" da" myiyi: zoo: yiri aloem akhau: bang: da" mungdain: khyoo: shid: lo" byug nhang: wa yoomo we' nheing" myeing" nheing" thui: yo' Nyangnu" ri sadi byid: bye:.

²⁷

²⁸Hau: thang ri Mangso byumyu" yigi Bala yu phara" ri Petura joyoo moo: noku nyid boem ziyo' yu phara" shid: joem ri xoin" to' byid: da" zoo: noem ri we' zo: nyid boem bye:.

²⁹Nyangnu" gi nyangnu" zei: lo da" moo" zoo" joem yo' ASEING da" nheug yo: phoin: loo nhang: khyoo: ri lhu: tau: lhu: nhung byid: nyid boem ziyo' gyoug pho" da" noophyoo" ri nyangnu" jang" moo: bue" thu' loo nhang: nyid bye:.

³⁰Nghoid sho' lug we' Phineha to yab ziyo' yooboo dab, bang: said pyam byid: yoomo hau: noobau: phyoobau: gi doem bei: lo" byug bye:.

³¹Hau: Pineha koid da" akyu" ri hau: nyid" mo khanham we' damyid boin: nyid boem ziyo' hau: ziri dapyaid yo' dapyaid moo daboin: so" nyid boem wa nghoid.

³²Byumyu" yigi:Meriba gyid bug moo ASEING ri zheung: ze" sho" ziyo' Nyangnu" zei: thu lo da" aved asam" yoomo Moshe we' kyi" khyeug yau: khi" zi shoug" bye:.

³³Nyangnu" gi Moshe ri kyid" kyid: khoo" sho nheigloem: noo nhang: boem yoomo nyang: gi: amyed yu" loo: za: atid eung: da" dang: ri tid shoid pyam bye:.

³⁴Nyangnu" gi tungbau byumyu" yiri said toem" pyam wa shid re" ASEING Nyangnu" ri byid: to" da" amyeing" dang: ri acang tho' moo: agoo".

³⁵Tungbau byumyu" yi yo' Nyangnu" deungkhu: qei" ziyo' Mangsoo ayoo" mo, da" asam" aved ri nyangnu" xo ci: lo boem bye:.

³⁶Mangso da" byumyu" yigi yu phara" soolhoo: joem ri loem khau: noku lo boem ziyo' hau: zigi nyangnu" ri lhu: phyo' pyam da" mo" bue" loo nhang: nyid.

³⁷Nyangnu" gi nyangnu" da" zoo shang yiri nghe' to' byid: xoin" khyo" wigi Khannan yu phara" soolhoo: joem ri shugbyid: nyid boem ago".

³⁸Nyangnu" gi ce: yooboo adab da" zooshang yiri: said boem. Hougsu" byu said boem yoomo mungdain: ri anyhoin: athung" bui" nhang: bye:.

³⁹Nyangnu" zei: da" moo" zoo" joem yo' Nyangnu" ri aco' ajhoid koid pyam boem wigi Nyangnu" gi Mangsoo moo: nheigloem: azoung" boem loo: nghoid ago".

⁴⁰Hougsu" nghoid yoomo ASEING gi nya: byumyu" yiri nheug yoo: nau nyid wigi Nyangnu" ri co' nheug no nyid bye:.

⁴¹Nyang: gi nyangnu" ri byumyu" yi da" yoem so, khoug: khyoo: ab pyam byid: wigi Nyangnu" da" gyivoo joem gi nyangnu" ri vhoebkhang" ci: abye: go.

⁴²Nyangnu" gi nyangnu" da" gyivoo joem wigi doin: zeug shen" yhen shoug" zo: nyid boem ziyo' gyivoo joem da" lo, khoug: moo bain sho' vang lo" byoug boem bye:.

⁴³ASEING gi myoo" sho lheing: nya: byumyu" yiri khyoid yu nyid Nghoid loug we' Nyangnu" gi nyang: ri gyi koid wa khyoo: za: khyen yu nyid boem yoomo yooboo thoem" moo: daje, noeb vang lo" byoug boem ago".

⁴⁴Nghoid loug we' nyangnu" mho' yoid uri ASEING gi shoug" gyoo: byid: ziyo' Nyangnu" da" myid myoo: ung: loug da" khyoo: ri nyang: gi boin: soo" byid: nyid.

⁴⁵Nyang: gi nyangnu" da" akyu" yoo" wa shid mo nya: dang: theing khoin" ri boin: soo" byid: ziyo' nya: da" gyi: thang jheddab nheigloem: yoomo nya: yo: phoin: nyid nheigloem: ri jham" loo" nhang:.

⁴⁶Nyangnu" ri shen" yhen pyi: sho: nyid bang- dangain" mo, da" nheigloem: ung: khoug: moo nyangnu" ri nheug yu" khyeug nyid.

⁴⁷Ngoonu" da" ASEING Mangsoo we"- ngoonu" ri khyoid yu we' byumyu" yi da" akhoug: mo ngoonu" ri doem shu" tau" loo we'. Hougsu" nghoid lang- re" da" gyeung" shang: myeing khyang" ri coung" nghei lho ngoonu" nang ri jeju" boin: nyid boem wa.

⁴⁸Israela da" Mangsoo hau: ASEING ri coung" nghei nyid we'. Nyang: ri akhid" mo zi pyaid moo: too: moo: ju" sho' coung" nghei nyid we'. Byu yugkhang" moo" Amen ein: tid nyid we'.