Read Lashi COUNG" NGHEI 107 Bible Online

COUNG" NGHEI 107 - Lashi bible

COUNG" NGHEI 107

¹Nyang: yoomo khyoid yu khyoo: shoug" bye: bang: dangain" mo, gi ASEING ri jeju" boin: coung" nghei jang" moo he: dang: ri xo loo: xo' datid nyid we'. Nyang: gi nanu" ri nanu" da" gyivoo joem lo, mo khyoid yu bye: zi nghoid.

²Nyang yoomo khyoid yu khyoo: shoug" bye: bang: dangain" mo, gi ASEING ri jeju" boin: coung" nghei jang" moo he: dang: ri xo loo: xo' datid nyid we'. Nyang: gi nanu" ri nanu" da" gyivoo joem lo, mo khyoid yu bye: zi nghoid.

³Nyang: gi moug: vhoem" moug: thang: bid thu bidvang mungdain: loem khang" moo" mo nanu" ri doem shu" tau" lo abye:.

⁴Byu dayham" gi khyoo: abo da" siyoo khoug: moo byo sain" yen" boem ziyo' nyangnu" gi nyangnu" nyid wa da" voogung lo" khyoo: ri we' ashu" sho: boem loo: nghoid ago".

⁵Nyangnu" gi zooyoid gyidshed shoug" nyid boem ziyo' nheug byu jang: dangain" ri ci: phyug pyam boem abye: go.

⁶Houg: lang nyangnu" gi yau: khi" shoug" nyid bidnyid moo ASEING ri mho' yoid nyid boem wigi nyang: gi nyangnu" da" kyi" khyeug yau: khe" khyoo: mo nyangnu" ri khyoid yu byid: bye:.

⁷Nyang: gi nyangnu" ri nghe: khau: nyid wa joyoo khyoo: dain: da" khyoo: khyo" shu" lo" abye:.

⁸Nyangnu" shid re" nyang: koid shug bye: da" mau" pho" moo" zoo" joem yo' nya: da" athang agoin jhed khyeing: kang: khyeing: yoomo Nyangnu" gi hau: ASEING ri jeju" boin: coung" byid: boem wa nghoid.

⁹Nyang: gi gyid shed bang: ri gyid shoin: jhoug lho: zooyoid shoug" bang: ri ge da" zoo: noem yo' gyi: nhang:.

¹⁰Dayham" gi moug: coid khoug: yo' shid: lo" da" moug: coid, yoeb khoug: moo nyid nyid boem. Nyangnu" gi: joto' jangcoo" yo' tei" too" shau" da" thung: byu yi nghoid boem.

¹¹Khasu" wim gari nyangnu" Mangsoo byid: to" da" athang agoin amyeing" dang: khoin" joem ri thougtheung pyam boem lho: wigi nya: da" jhoug" myeing jhoug" thui: joem ri: we' alhoem: yu boem yoomo nghoid nyid ago".

¹²Nyangnu" da" emyed ri yau: khi" da" moo" zoo" moo nyang: gi doin: khyo' pyam byid: wigi Nyangnu" leung lo" ri pang thug byu hang dayug we" aboo.

¹³Houg: lang nyangnu gi yau: khi" zi shoug" nyid da" bidnyid moo ASEING ri mho' yoid nyid boem yoomo nyang: gi nyangnu" ri kyi" khyeug yau: khe" khyoo: mo khyoid yu abye:.

¹⁴Nyang: gi nyangnu" ri moug: coid khoug: yo' shid: lo" da" moug: coid yoeb, khoug: moo shu" thu' loo bye: ziyo' Nyangnu" ri tei" to" da" joto' jangcoo" ri we' lang: phyed pyam byid: bye:.

¹⁵Nyangnu" shid re" nyang: koid shug bye: da" mau" pho" moo" zoo" joem yo' nya: da" geung: teung jhed khyeing: kang: khyeing: yoomo Nyangnu" gi hau: ASEING ri jeju" boin: coung" nghei byid: nyid boem wa zi nghoid.

¹⁶Nyang: gi voogung gyid: mid" khoem" moo" duang: joem ri ne, khyoeb, pyam lho: wigi joto' khoem kyang young: joem ri adu atoem koid pyam byid: abye:.

¹⁷Nyangnu" koid da" yooboo joem yo' nyangnu" koid da" akhyeing" ashoeb moo" zoo" joem yoomo byu dayham" bang: gi nheug agyeung: boem ziyo' amyen akhyoid khyoo: ri phu" zo: nyid boem bye:.

¹⁸Nyangnu" gi zoo: noem shug phoo" rilang" anau yu" lo boem ziyo' shid: loo" no lo" da" khoem" duang: khyoo: jhang yhe: lo" abye: go.

¹⁹Houg: lang" Nyangnu" gi yau: khi" zi shau" da" bidnyid moo ASEING ri mho' yoid nyid boem yoomo Nyang: gi nyangnu" ri yau: khe" kyi" khyeug khyoo: mo khyoid yu abye:.

²⁰Nyang: gi: nya: da" amyeing" dang: yo' nyangnu" ri ze: gi byid: ziyo' loeb duang: khoug: mo nyangnu" ri: xue: yu bye:.

²¹Nyangnu" shid re" nyang: koid shug bye: mau" pho" moo" zoo" yo' nya: da" geung: teung jhed khyeing: kang: khyeing: yoomo Nyangnu" gi hau: ASEING ri jeju" boin: so" coung" nghei byid: boem wa zi nghoid.

²²Nyangnu" gi xoin" du: joem yo' nyang: ri jeju" boin: coung" nghei boem wa zi nghoid. Gau, yi da" jikhoin" dang: yo' nyang: koid shug bye: khyoo: dangain" ri tid kyo" boem wa nghoid.

²³Byu yi dayham" bang: gi nammugdara gyid tho moo sangphoo lhid yo' so" yen" boem wigi panglai: gyid yi da" atho moo nyangnu" da" voem: doug: khu: moo" zoo" ri zei: so, nyid boem ago".

²⁴Nyangnu" gi hau: ASEING cenoem koid bye: da" moo" zoo" joem yo' panglai: gyid tho' moo: nyang: toin" shed bye: da" mau" pho" moo" zoo" joem ri shau" myang nyid boem ago".

²⁵Nyang: amyeing" byid: kaid lang" phung" yoeb yoem" moo" zeing yo' uglid hau being: mhoid joem doin: lhoem" to' lo.

²⁶Sangphoo lhid joem gi lid tho' moo: dang: to' lo" wigi no, da" gyid thoem" thi" moo: noeb vang lo" nyid. Hid: yhang: te" da" gyoug noem bue" loo yoomo byu yigi nyang: nya: yoem: nu: lo" byoug bye:.

²⁷Nyangnu" gi yhid: yed bang: yhang: ti" apyi: afeing so' yen" ziyo' Nyangnu" da" gye' yeug koung ga" da" phajhi' joem gi akoem: za: danghoid boem lo: ago".

²⁸Houg: lang nyangnu" gi yau: khi" lo da" ayo, moo ASEING ri mho' yoid nyid boem yoomo nyang: gi nyangnu" ri yau: khe" kyi" khyeug khyoo: mo khyoid yu bye:.

²⁹Uglid moo" ri nyang: no: loo" nhang: lho: beung: mhoid joem ri we' tam" loo" nhang:.

³⁰Uglid no: loo" bye: yoomo nyangnu" gau yi nyid boem ziyo' Nyangnu" loo" nau da" gu: khuang khyoo:- gau: nyu: khyo" Nyangnu" ri shu" vhu" loo" bye:.

³¹Nyangnu" shid re" nyang: koid shug bye: da- mau" pho" moo" zoo" joem yo'- nya: da" geung: teung jhed khyeing: kang: khyeing: yoomo nyangnu" gi ASEING ri jeju" shoug" coung" byid: boem wa zi nghoid.

³²Nyangnu" gi nya: da" gyi: reung: thang khyoo: ri byumyu" yi da" mo, phung: gung moo: thoid tid kyoo" wa zi nghoid. Vhujhung: yi da" phoung: foem: moo nyang: ri yo" coung" byid: boem wa zi nghoid.

³³Hau: ASEING gi gyid zeing joem dangain" ri: kyoug kain" loo" nhang: wigi gyid bug joem ri jhed pyam byid: bye:.

³⁴Akhyeing" da" byu yi nyid da- myid, xu: yo' byeung" joyoo joem ri xoo" mougmyid bue" lo" nhang: pyam bye:.

³⁵Nyang: gi midcoo: doem joem ri: gyid thoem" khyo" kyug kyiri da" mougmyid ri gyid bug yau: lo da" mougmyid khyo" bui" nhang: bye:.

³⁶Nyang: gi zooyoid gyid shed nyid da" byumyu" yiri hau: joyoo moo: nyid yab nhang: lho: wigi Nyangnu" nghe: khau: nyid wa shid re voogung ri tam: yu boem.

³⁷Nyangnu" gi khyam soin" koid lho: zabyid shi" joem ri sho" wigi gug shi" meishi" ri myoo" sho' shoug" shab yu ago".

³⁸Nyang: gi nya: da" byumyu" yiri mainkaid byid: lho: nyangnu" moo nya: myid: nya: zoo: yi myo: loug je: bue: lo nyid. Hau: lho: nyang: gi nyangnu" da" gougnyhoug joem aneung: loo" baja" ga: lhoug zung" byid: nyid.

³⁹Nheug khyeug shoo" myen: khyoo: abo da- doin: zeig shoug" nyid ziyo' Mangsoo byumyu" yigi yau: khe" kyi" khyeug shoug" nyid khyoo: joem yoomo soem" joem: lo" zi shoug" nyid uri

⁴⁰nyangnu" tho' moo: doin: zeig zoo: bang: ri nyang: gi latoo: phoug lho: nyangnu" ri khyoo: abang" da" siyoo khoug: moo: so" du: dam: yen" nhang:.

⁴¹Nghoid loug we' nyang: gi ca" yo, nyid bang: yo' nyangnu" da" kyi" khyeug yau: khi" da" akhoug: mo khyoid khyu: yu ziyo' nyangnu" da" ikoin deungkhu: byu yiri yang phung: joem ri yhang: ti" myo: loung: loo nhang:.

⁴²Deungbyeung" da" byu yigi hau: khyoo: joem ri myang wigi gau yi nyid boem nghoid loug we' akhyeing ashoeb bang: dangain" ri koem gi no: jham" loo" nhang: pyam bye:.

⁴³Phajhi" boo bang: gi he: moo" zo" da" akhyoo" ri myid soin: yu" nyid goo" baja". Nyangnu" gi ASEING da" geung: teung jhed khyeing: kang khyeing: ri myid yu" nyid goo" baja" o".