Read Lashi COUNG" NGHEI 109 Bible Online

COUNG" NGHEI 109 - Lashi bible

COUNG" NGHEI 109

¹[55] Mangsoo we"- ngoo nang ri: coung" nghei nyid sam" za: atam" too:

²Akhyeung" bang: yo' mhau, fain" yen" bang: ri ngoo ri dab, yu zain: oung: pyam boem bye:. Nyangnu" gi nga" da" khyoo: ri mhau tid nyid boem.

³Nga" da" khyoo: ri ashoeb khyo" juang" yi dang: khoin" yo,- nyangnu" tid nyid boem wigi ce" yooboo we' abo jang" moo ngoo ri gyi koid shoo" koid nyid boem ago".

⁴Ngoo gi nyangnu" ri jheddab ziyo' Nyangnu" shid re" noku byid: nyid rilang" Nyangnu" gi ngoo ri thougtheung nyid boem ashi go.

⁵Nyangnu" gi ge da" gung khoo: moo akhyeing" ashoeb zi jheddab wa gung khoo: moo nheing" myeing" yo' ngoo ri latoo: doem phug byid: nyid ago".

⁶Nga" da" gyivoo pho, ri dang: phyed byid: wa shid re" akyang yoin" da" tarha" agyi ri nyeung too" wa. Nya: gyivoo joem da" khoug: mo dayug yug gi nyang: ri yooboo foin: su: bui" nhang: nyid we'.

⁷Nyang: gi myid: phe: sho: zi thoung" shau" wigi shoid vhang: yooboo ri shau" myang nyid baja"- nya: da" akyu" mho' thui: ri lang" youg: soin: jhen: soin: goo" baja".

⁸Nya: kangso' we' kha myhoo anghoid ri thang lo" byug baja" Nya: moo" zoo" ri byu gooji yu pyam byid: zi shoug" baja".

⁹Nya: zoo: yigi coug" zoo joem bue" lo" byoug wigi nya: yhoem: seing: myhi we' cougmoo" bue" lo" byug baja".

¹⁰Nya: zoo: yigi yhoem: ajo, da" layoin: joem bue" lo" byug goo" baja" Nyangnu" nghe: khau: nyid da" yhoem: gang: mo wigi we' koin" thu' pyam zi shoug" goo" baja".

¹¹Nya: da" jhen: seing: gi ayu eung: da" jonu" dangain" ri we' bo yu pyam byid: goo" baja". Tungbau byumyu" yi we' nyang: koid da" moo" zoo" mo akyu" dangain" ri bo shau" kham' zoo: goo" baja".

¹²Nyang: ri nheig yu" khyeug bang: gi hang" aboo loo: baja". Nyang: too" khare" da" coug" zoo: yiri hang" we' ayu" agoin coung: lo: boem baja".

¹³Nya: amyed ashen" yi dangain" we' shid: doem: lo" byug goo" baja" nya: myeing: ri thang: phyang" pyaid moo: aboin: soo" loo: goo" baja".

¹⁴ASEING gi nya: phoug" nya: phyid" yi koid da" akhyeing" ashoeb moo" ri daboin: nyid baja" nya: myhi shoid vhang: da" yooboo joem ri we' khanham we' akhyoid pyam byid: loo: baja".

¹⁵ASEING gi Nyangnu" da" yooboo joem ri khanham we' daboin: nyid: nyid baja" Nghoid loug we' Nyangnu" nyang: bain sho' to" myhed pyam zi shoug" nyid goo" baja".

¹⁶Byu hau: yug gi: nheig khyeug wa khyoo: ri khanham we' amyed yu" lo: ziyo' nyang: gi asho" ajhen: bang: ri we' ca" nyid yo nyid bang: ri we' pang" thoug yu wa byu ayoo" lo: mo, ri we' shen" yhen said pyam nyid abye:.

¹⁷Nyang: gi nheing" wa ziri gye" vho: nyid nyang: nyang: ri nheing" khoin" doem tau" zang" baja". Nyang: gi mainkaid jeju" byid: wa ziri ngheung" nyid yoomo hang" we' nyang: ri mainkaid byid: lo baja".

¹⁸Nyang: gi byimi ri void ci: yhang: ti" nheing" myeing" nheing" thui: ri main main datid nyid. Hau: da" nheing" myeing" nheing" thui: gi gyid yhang: ti" nya: gung moo: deung vang lo" wigi shooxu: yhang: ti" nya: shooyoug: ju" sho' deug vang loo" baja".

¹⁹Hau: nheing" myeing" gi byimi yhang: ti" nya: gung moo: nghoeb too" baja" phyid" cu" yhang: ti" khanham we' nya: lheing goem moo: baid yeug too" baja".

²⁰ASEING we" houg: yhang: te" da" akhyeing" ashoeb khyoo: yo' nga" gei sang: nyid da" nga" gyivoo joem ri houg: khyo" yooboo byid: we'.

²¹Nghoid loug we' nga" gyi: myhang: thang da" ASEING we" nang byid: too" bye: da" dangsoo" khoin" yo' dakhyoo" ti" ngoo ri pang" thoug yu byid: we'. Re" da" gye" ge jheddab emyed yoomo ngoo ri khyoid yu we'.

²²Ngoo gi asho" ajhen: su: yo' ci" we' ayoo" su: nghoid nyid. Nga" nheigloem: khoin" jhung: moo: ju" sho' thau" kyang nho: zi ngoo shoug" nyid.

²³Myen" thang: zoo" mo bid shoem: yoeb yhang: ti" ngoo bei: lo" koung" nyid bye:- tung: sang" bougsid, ri yhang: ti" vi: vi: khyoo: hau, tang" lo" zi ngoo shoug" nyid.

²⁴Zoo: noem thang byug yoomo nga" da" poid lug yoem: nu: bye:- ngoo gi shooyoug: moo: shooyid te: lhoem" lo: su: ti" bue" lo" byug bye:.

²⁵Subi" ngoo ri: myang bang: gi ngoo ri juang" yi pyam nyid boem ago". Nyangnu" gi aphoug" akhyoid khyo" koid wigi nyangnu" da" vhuloem pyi: shoug nyid boem ago".

²⁶Nga" ASEING Mangsoo we"- re" da" jhed khyeing: kang khyeing: yoomo ngoo ri pang" yu shi" we' ngoo ri khyoid yu we'.

²⁷Ngoo ri: khyoid yu su: gi nang nyang: nghoid nyid ziri nga" gyivoo joem ri si' nhang: we' o".

²⁸Nyangnu" gi ngoo ri nheung" lho: jham' tang: byid: boem nghoid loug we' nang gi ngoo ri mainkaid byid: wa zi nghoid. Ngoo ri: re" shen" yhen pyi: sho: nyid bang: joem: loo" goo" baja"- re" da" deizoo: ngoo koem gi gau yi ngei pyo: nyid baja".

²⁹Nga" gyivoo joem gi myonhoo: shoem: lo" ziyo' goeb jo, zi shoug" goo" baja". Nyangnu" gi asho, ashid: khyoo: ri mi, yhang: ti" gang" ci: goo" baja".

³⁰Ngoo gi ASEING ri thui: moo" kaid lho: jeju" ri coung" byid: wa zi nghoid. Ngoo gi: nyang: ri byumyu" yi da" mo, phung: gung moo coung" nghei nyid wa zi nghoid.

³¹Khasu" wim ga: ri nyang: gi asho" ajhen: bang: ri goem loem byid: wigi nyang: ri said wa ga: dang: phyed byid: nyid bang: da" lo, mo khyoid yu yoomo nghoid nyid.