Read Lashi COUNG" NGHEI 115 Bible Online

COUNG" NGHEI 115 - Lashi bible

COUNG" NGHEI 115

¹ASEING we"- re" da" athang agoin jhed khyeing: kang khyeing: yo' dang: zoung" khyoo: yoomo ngoonu" ri anghoid. Re" da" myeing khyang" ri za: phung" yoeb myonhoo: byid: boem baja o".

²«Nanu" da" Mangsoo gi khayoo: nyid lha"» ga: wigi byumyu" yigi ngoonu" ri ciyoomo myid: nyid boem lha".

³Ngoonu" da" Mangsoo gi mougkhung: tho' moo: nyid wigi ce" noem ri nghoid loug we' nyang: vho: khyo" dakoid nyid.

⁴Nyangnu" da" yu phara" joem gi ngei sheing" joem yo' koid to" wigi hau: zigi byu joem da" lo, ze koid to" da" zi za: nghoid nyid.

⁵Nyangnu" moo: nhoid dab, nghoid loug we' dang: ase tid. Myojid" dab, nghoid loug we' myo, amyang nghoid ago".

⁶Nyangnu" moo: nukhyab dab nghoid loug we' ashoug" gyoo:- nhoo: dab nghoid loug we' ase' shoem: nam.

⁷Nyangnu" moo: lo, dab nghoid loug we' ayo" zei: nghoid ago". Khyid: dab, nghoid loug we' ayo" so" loo" nghoid ago". Nyangnu" gi ce" thui: ri we' ayo" thu kaid nghoid ago".

⁸Hau: yu phara" soolhoo: ri baid kyoung" lhid" too" bang: yo' hau: ziri loem khau: nyid mo, gi Nyangnu" koid to" da" yu phara" soolhoo: yo' dakhyoo" ti: nghoid nyid goo" baja".

⁹Israela byumyu" yi we"- ASEING moo: loem khau: nyid we'. Nyang: gi nanu" ri pang" thoug byid: wigi nanu" ri goem loem byid: nyid.

¹⁰Mangso da" khainjung yi we"- hau: ASEING moo: loem khau: nyid we'. Nyang: gi nanu" ri pang" thoug byid: nyid wigi nanu" ri goem loem byid: nyid.

¹¹ASEING ri noku loem khau: nyid bang: dangain" mo, we"- ASEING ri loem khau: nghe: nyid ge'- nyang: gi nanu" ri pang" thoug byid: wigi nanu" ri: goem loem byid: nyid.

¹²ASEING gi nanu" ri daboin: so" nyid wigi mainkaid byid: wa nghoid- nyang: gi Israela byumyu" yi yo' Mangso khainjung yi dangain" ri mainkaid byid: wa zi nghoid.

¹³Nyang: gi nyang: ri gyoug phau" da" byu yugkhang" moo" mo nge zi gyi: zi aga- dangain" mo, ri mainkaid byid: wa.

¹⁴ASEING gi nang yo' re" da" amyed ashen yiri zoo: du yi dabyid: nyid baja".

¹⁵Mougkhung: yo' myidjang ri phain" so: to" da" ASEING gi nanu" ri: mainkaid byid: nyid baja".

¹⁶Mougkhung: mougdi ri ASEING za: te: seung: ci: nghoid loug we' mougmyid yoosoo" ri koem gi xangsu: byu yiri ab byid: bye:.

¹⁷Shid: byug bye: mo, yo' jham" dung" khe" da" joyoo khyoo: ju" vang loo" bye: bang: gi ASEING ri yo" coung" byid: lo: boem wa anghoid.

¹⁸Nghoid loug we' kangso' dei nyid shi" da" nanu" koem gi akhid" mo zi apyaid atoo: moo: ju" sho' nyang: ri jeju" boin: coung" nghei nyid boem wa zi nghoid.