Read Lashi COUNG" NGHEI 116 Bible Online

COUNG" NGHEI 116 - Lashi bible

COUNG" NGHEI 116

¹ASEING gi nga" da" thui: ri tam" gyoo: byid: yoomo ngoo nyang: ri jheddab nyid. Nyang: gi nga" akyu" mho' dang: ri tam" gyoo: byid: nyid.

²Ngoo gi nyang: ri ayo, loem: khang" moo" moo yoid khe: nyid

³Shid: su: da" gyoug ci' khyoo: gi ngoo ri: lheung khoem to" wigi moo: vo, moug: mo byoodain byoo sho" khyo: joem gi nga" nam, moo: tain" loo bye:- ngoo gi gyoug ziyo' amyen akhyoid phu" zo: zi shau" nyid bye:.

⁴«Houg: lang" ngoo gi ASEING we" ngoo nang ri: mho' yoid nyid ngoo ri khyoid yu we'» ein: ASEING ri mho' yoid bye:.

⁵ASEING gi nheug khyeug ziyo' gi su: nghoid nyid- ngoonu" da" Mangsoo gi nheug se' khyeug su: nghoid.

⁶ASEING gi pang" thoug wa byu aboo bang: ri lhoug zung" nyid ngoo gi gyoug noem thoung" shoug" nyid uri nyang: gi ngoo ri khyoid yu byid: bye:.

⁷Nga" da" emyed we' ASEING gi nga" da" atho' moo ge da" jeju" ri toin" shed byid: bye: yoomo loem khed" nheugshid: nyid we'.

⁸ASEING gi ngoo ri shid: bye: jang" mo khyoid yu lo yu" bye:- toin" shed byid: bye: yoomo loem khed" nheugshid: nyid we'.

⁹Houg: yoomo kangso' dei nyid mo, nyid da" mougmyid moo ngoo gi ASEING shidkhoin" moo: so" nyid wa zi nghoid.

¹⁰Ngoo gi bain" sho' nyang: ne, mhoin' pyam zi shau" nyid bye: ein: tid nyid uri lang" ngoo gi khyang" khyang: daloem" jeung" nyid.

¹¹Ngoo gyoug ci zi shoug" nyid yoomo loem ge" byu dayug we' anyid, ein: tid uri we' ngoo loem khau: nyid.

¹²Ngoo ri: byid: da" ge lho khyoo: joem dangain" ziri ngoo ce: ja: yo' ASEING da" jeju" ri yo" oung: tho' coung" byid: loo: wa lha".

¹³Ngoo ri: khyoid yu byid: yoomo ASEING ri jeju" boin: coung" byid: wa shid re" ngoo gi zabyid xoin" ri re" jhang khyoo: ci: re" loo wa nghoid.

¹⁴Nya: da" byumyu" yi dangain" bang: da" mo, phung: gung moo ngoo dangsoo" byid: to" ziyo' dakhyoo" ti" zei: pyeung wa zi nghoid.

¹⁵Nya: da" byumyu" mo dayug shid: lo" nghoid ri hau: zigi ASEING shid mo khayhi' no lho: soem" lo" khyoo: nghoid lha".

¹⁶ASEING we"- ngoo gi re" da" deizoo: phoo nghoid- nga" myhi' zei: lho: doo" zho" yhang: ti" ngoo nang ri dei byid: wa nghoid. Nang gi ngoo ri shid: lo" jang" mo khyoid yu bye:.

¹⁷Jeju" boin: da" xoin" yo' ngoo nang ri shug byid: wa nghoid. Nga" akyu" mho' da" dang: thui: yo' nang byid: wa nghoid.

¹⁸Re" da" byumyu" yi dangain" bang: da" mo, phung: moo: we' Yerusalem mo re" da" gyeung" shang: Noku Yhoem: Moo" moo: we' Ngoo nang ri dangsoo" khoin" byid: to" ziyo' dakhyoo" ti" ngoo zei: pyeung wa zi nghoid.