Read Lashi COUNG" NGHEI 118 Bible Online

COUNG" NGHEI 118 - Lashi bible

COUNG" NGHEI 118

¹ASEING gi ge lho, nyid yoomo nyang: ri jeju" boin: we'. Nya: da" jhed nheigloem: gi pyaid moo: too: moo: dageung: teung jo.

²Nya: da" jhed nheigloem: gi pyaid moo: too: moo: dageung: teung jo, ga: wigi Israela byumyu" yi datid nyid goo" baja".

³Nya: da" jhed nheigloem: gi apyaid atoo: moo: dageung: teung jo, ga: wigi Mangso khainjung yi tid nyid goo" baja".

⁴Nya: da" jhed nheigloem: gi apyaid atoo: dageung: teung jo, ga: wigi nyang: ri loem khau noku nyid mo, dangain" bang: we' datid nyid goo" baja".

⁵Ngoo yau: khe" kyi" khyeug zi shoug" nyid ri ASEING ri ngoo mho' yoid bye:. Nyang: gi ngoo ri tam" gyoo: byid: lho: ngoo ri loid byoin loo" nhang: bye:.

⁶ASEING gi ngoo yo' dage" nghoid nyid yoomo ngoo gi ciri" we' gyoug anoo"- ngoo ri hang" ciyo" koid goo" wa zi anghoid.

⁷ASEING gi ngoo ri pang" thoug byid: su: nghoid nyid yoomo nga" gyivoo joem soem" joem: lo" ziri ngoo myang wa nghoid.

⁸Byu yiri nghe: khau: tho' moo ASEING ri nghe: khau: nyid zigi je ge'.

⁹Zoug: yiri nghe: khau nyid wa tho' re" gi ASEING ri loem khau" khyoo: gi je" ge nyid.

¹⁰Gyivoo joem myoo" sho mo, ngoo ri vang: lheung khoem too" Nghoid loug we' ASEING da" yoem: moo" so, moo" yo' Nyangnu" ri ngoo yo" said toem" pyam bye:.

¹¹Nyangnu" gi ngoo ri jhoin: zoo: jhoin: zeing khyo" lheung khoem too" nghoid loug we' ASEING da" yoem: moo" so, moo" yo' nyangnu" ri ngoo yo" said jhoem" pyam bye:.

¹²Nyangnu" gi byoo: joem yhang: ti" foem: zeung too" nghoid loug we' zubyab nge" joem: lo" yhang: ti" Nyangnu" myab, myab, joem: lo" boem bye:- ASEING da" yoem: so' yo' ngoo gi nyangnu" ri yo" said jhoem" pyam bye:.

¹³Ngoo gi agi" akhab, thougtheung zain: lo zi shau" wigi soem" lo" nghoid loug we' ASEING gi: ngoo ri pang" thoug nyid.

¹⁴ASEING gi ngoo ri yoem: so' yo' yoem: vhoo" byeung" loo nhang: lho: nyang: gi ngoo ri: khyoid yu nyid.

¹⁵Soem" joem: da" akhoug: mo Mangso byumyu" yigi oung: doid lo" yoomo gau yi nyho: yoid nyid da" thui: ri tam" gyoo: we'. ASEING da" amyeing" yoem: so' gi hau" oung: doid pui" ri bui" nhang: bye:.

¹⁶Meing: zain: jang: moo: bo da" nya: amyeing" yoem: so' gi Nyangnu" ri oung: doid lo" khyoo: byid: bye:, ga: tid nyid boem.

¹⁷Ngoo shid loo: wa zi anghoid- hau: gung khoo: ngoo gi dadei nyid lho: ASEING zei: shug bye: moo" zoo" joem ri: datid kyo" nyid wa.

¹⁸Nyang: gi ngoo ri agi" akhab, shen" yhen nyid nghoid loug we' nyang: gi ngoo ri shid: loo" nhang: zi anghoid.

¹⁹Noku yhoem: mo" vang khoem" duang: joem ri phang kaid we'. Ngoo vang yhe: wigi ASEING ri jeju" boin: nyid wa zi nghoid.

²⁰He: zigi ASEING da" khoem duang: nghoid. Deung byeing" bang: za: date: yo" vang lo.

²¹ASEING we" nang gi ngoo ri: tu" byid: bye: yoomo we' ngoo ri oung: doid loo" nhang: bye:. Houg: yoomo we' ngoo gi nang ri: coung" nghei nyid wam: bye:.

²²Yhoem: zhug mo, gi ce" akyu" aboo ga: khyen: lei" pyam, to" da" lug loem: gi dangain" tho' moo: je" yhouggyen: da" yhoem: jhoin: mo lugzeing bue" loo bye:.

²³Hau: zigi ASEING wigi zei: bue" da" moo" zoo" nghoid bye:- Houg: gi: nyangnu" shid mo mau" pho" moo" nghoid bye: nhung-

²⁴Akhid" nyid" da" bidnyid gi ASEING da" oung: doid lo" bidnyid nghoid. Nyhang" nu" bi" gau yi ngeibu zoore xang: yoeb ladoo" pui" koid nyid boem shang.

²⁵ASEING we" ngoonu" ri khyoid yu we'- ngoo ri khyoid khyi: yu we' ASEING we"- ngoonu" ri oung: doid lo" khyoo: phang byid: we'.

²⁶ASEING da" myeing khyang" yo' ju" ri" su: gi Mangsoo mainkaid byid: baja" ASEING da" Noku Yhoem: Moo" mo wigi ngoonu" nang ri mainkaid byid: boem.

²⁷ASEING gi: Mangsoo nghoid- nyang: gi: ngoonu" ri jeju" byid: abye:- nanu" da" lo, joem moo: seig kyang: ri ci: lho: pui" moo" ri pang: shed" wigi xoin" to" phoin: ri so" lheung khoem we'.

²⁸Nang gi: nga" Mangsoo nghoid da- ngoo nang ri jeju" boin: nyid wa zi nghoid. Re" nghoid thang da" khyoo: ri ngoo tid fu" nyid wa nghoid.

²⁹ASEING ri jeju" boin: nyid ge khasu" wim ga: ri nyang: gi gi, su: nghoid nyid. Nya: da" jheddab emyed we' apyaid atoo: moo: dageung: jo.