Read Lashi COUNG" NGHEI 137 Bible Online

COUNG" NGHEI 137 - Lashi bible

COUNG" NGHEI 137

¹Babelon gyid lang yam, joem moo ngoonu" zhoung: jo, lho: Ziun ri boin: so" kaid uri ngoonu" ngau nyid boem.

²Ngoonu" da" teing joem rigi moug: gyid avho: seiggam, joem moo: lhang yoin" to".

³Ngoonu" ri myheug shu" loo bang: wigi ngoonu" ri jihkoin" khoin" nhang: boem Ziun da" khyoo: jihkoin" daja: khoin" kyoo" ge ga: wigi nyangnu" ri shapyoo: wa shid mo nyangnu" gi ngoonu" ri tid ago".

⁴Tungbau meing: moo: ngoonu" gi ASEING ri: jihkoin" khasu" se' yo" khoin" wa lha".

⁵Yerusalem we"- ngoo nang ri to" myhed pyam nghoid rigi ngoo gi teing ri khanham we' adoem se' baid loo: wim, loo" khari: baja".

⁶nang ri ngoo to" myhed pyam wigi Yerusalem ri nga" gau, yi thang da" joyoo akoid lo: nghoid rigi ngoo gi jihkoin" adoem yo" khoin" lo: wim, khari: baja".

⁷ASEING we" Yerusalem myheug shu" lo" zi shau" da" bidnyid moo Edom byumyu" yi cikoid loo bye: ziri boin: so" nyid we'. Myidjang moo: dab, byug sho' phyo' shoin pyam ge ga: wigi nyangnu" khasu" tid loo bye: ziri boin: so" nyid we'.

⁸Babelon we"- nang gi phyo, shoin pyam zi shoug" wa nang ngoonu" ri koid lai loo bye: ziyo' dakhyoo" ti" nang ri latoo: doem tau" phug byid: mo, gi ngilho' nyid.

⁹Re" da" zoonu" yiri vu, yu lho: lug thi: moo: thung" mo, Nyangnu" nghoid nyid boem.