Read Lashi COUNG" NGHEI 141 Bible Online

COUNG" NGHEI 141 - Lashi bible

COUNG" NGHEI 141

¹[71] ASEING we"- nang ri ngoo yoid mho' nyid- ngoo ri akhid" nyang: pang" thoug yu we' nang ri ngoo yoid mho' nyid uri ngoo ri tam" gyoo: byid: we'.

²Nga" da" akyu" mho' thui: ri nam, pyo: da" xoin" yo' dakhyoo" ti" ngoo tu: ci: da" lo, ri myen" ri ngei" byid: da" xoin" yo' dakhyoo" ti" lhoem: kham: yu byid: we'.

³ASEING we" nga" da" nhoid moo: goem loem su: dayug- nga" nhoid yid khoem" duang: moo khoem" zung su: dayug nyheung too" byid: we'.

⁴Shoid vhang: da" moo" zei: nau nyid jang" mo we' ashoeb mo, nyangnu" da" akhyeung" moo" zoo" moo bo vang zei: nau nyid jang" mo we' ngoo ri ve: gang: loo" nhang: we'. Nyangnu" da" zoo: shug pui" moo: ngoo khanham we' abo vang loem" baja".

⁵Byugi: yigi ngoo ri shen" yhen lho: nheig khyeug ziyo' ngoo ri jhau' mho' nyid goo" baja" Nghoid loug we' Nyangnu" da" akhyeing" moo" zoo" ri ngoo thougtheung lho: khanham we' akyu" damho, nyid yoomo akhyeing" bang: da" coung" nghei ngi: shab da" khyoo: ri ngoo khanham we' lhoem: kham: yu wa zi anghoid.

⁶Nyangnu" da" mung" zoug: khoin" voin mo, gi lug pyo' phyoo" mo du" khyo' pyam zi shoug" nyid da" uri mung" byu yigi nga" da" dang: khoin" joem gi deingmain" nyid ziri yhe: yu" boem wa nghoid.

⁷Nyangnu" da" shooyoug: shooyang joem gi boug kho' to" da" thang" khyam" yhang: ti" adu, atoem bue" lo" byug bye:. Houg: yoomo nyangnu" da" shooyoug: joem ri loeb nhoid khoin" yam, cang: lhu: sain" to" boem ago".

⁸Nghoid loug we' nga" da" myhang: thang ASEING we"- ngoo gi: nang ri daloem khau: nyid. nang goem loem byid: wa ziri ngoo dasho: nyid. Ngoo ri ashid: nhang: shi" o".

⁹Nga" shid re" Nyangnu" thoung: to" da" lhid joem mo we' akhyeing" da" moo" zei: mo da" tei" joem mo we' ngoo ri goem loem yu byid: we'.

¹⁰Ngoo gi ce" goo, aduang loo: za: yhe: lo" uri akhyeing ashoeb, bang: koem gi Nyangnu" nya: da" gyoin: moo gyoo" goo" baja".