Read Lashi COUNG" NGHEI 144 Bible Online

COUNG" NGHEI 144 - Lashi bible

COUNG" NGHEI 144

¹[74] Nga" goem loem su: ASEING ri coung" byid: ge' nyang: gi ngoo ri gyimoo" jhau" byid: lho: gyi pui" shid re" ngoo ri soin' nyheung byid: nyid

²Nyang: gi nga" da" goem loem su: yo' gyivi su: nghoid. Nyang: gi nga" da" nghe: khoug: joyoo yo' khyoid yu su: yo' gau nyu: nyid wa shid re" ngoo loem khau: nyid su: nghoid.

³ASEING we"- nang xoem" ci: da" byu- nang yhouggyen: khyo" too" su: gi byu za: date: nghoid ri ciyhang: te" su: nghoid lha".

⁴Xangsu: byu yigi so, thid she: nyid da" lid yo' du nyid nya: da" bidnyid joem gi lid lo" nyid da- bid shoem: yoeb ti" za: du nyid.

⁵ASEING we"- mougkhung: ri lang: ceug phang lho: gyoo" lo we'. boem lang joem ri zang" thoung" wigi nyangnu" gi myikhoug" thu' nhang: kaid wa zi nghoid.

⁶Lhab' ri myeug kaid wigi re" da" gyivoo joem ri byo sain" lo" nhang: we'. Re" da" myooshi" joem ri beug kaid wigi nyangnu" ri phang: loo" nhang: we'.

⁷Tho' khyo" ju" gyoo" lo lho: no, thang thoem" thi" mo ngoo ri lang: she: yu wigi khyoid yu byid: we'. Tungbau byumyu" yi da" yoem: so' khoug: mo ngoo ri khyoid khyi: yu byid: we'.

⁸Nyangnu" gi deingmain" da" dang: ri khanham we' atid ziyo' jham' tang: too" bye: khoug: moo: lang" damhau, nyid boem.

⁹Mangsoo we"- jihkoin" dang: seig yo' ngoo nang ri coung" ngei byid: wa nghoid. teing baid lho: nang ri: ngoo jihkoin" khoin" nyid wa nghoid.

¹⁰nang gi khokham yiri oung: doid loo" nhang: nyid ziyo' re" deizoo: David ri khyoid yu bye:.

¹¹Nheig khyeug shoo" ase' myen: da" nga" gyivoo joem lo, mo ngoo ri: khyoid yu we'. tungbau byumyu" da" yoem: so' khoug: mo ngoo ri khyoid khyi: yu we'. Nyangnu" gi deingmain" da" dang: ri khanham we' atid nyid boem ziyo' jham tang: too" bye: khoug: mo lang" gi damhau, fain" nyid boem ashi" go.

¹²Ngoonu" da" yuggi zoo: yigi nyangnu" da" void yam" pyaid moo seiggam nu" joem youg toid lo yhang: ti" bui" baja". Nyangnu" da" myiyi: zoo: yi we' khanham we' khokham khoo" yhoem: moo" jhoin: moo: lhoo, yhoug to" da- lugzeing" bung: moo" joem yhang: ti" du nyid goo" baja".

¹³Ngoonu" da" gug jhi: joem moo shivoo myoug: cang: joeb byeung" jo, baja". Ngoonu" da" mhain" nu" dain" moo: nyid da" yang phung: gi anu" khyeing" moin" xang" myo, loo baja".

¹⁴Ngoonu" da" nukyung moo: xang" shoin' byoug lo" zi we' aboo looza- myo: lung: je: be: lo" nyid baja". ngoonu" da" fu" moo" khyoo: joem moo myid myoo: ung: loug yoid ngau thui: we' athu, loo baja".

¹⁵Hid: yhang: ti"- deingmain" khyo" nyid da" byumyu" yigi ngilho' nyid ASEING ri Mangsoo ga: wigi lhoem: yu loem" jeung" nyid da" byumyu" yigi ngilho' nyid boem o".