Read Lashi COUNG" NGHEI 145 Bible Online

COUNG" NGHEI 145 - Lashi bible

COUNG" NGHEI 145

¹[75] Nga"Mangsoo yo' khokham phoo we"- re" da" phoug" dab, reung: thang khyoo: ri ngoo kho" kyoo" wa nghoid. Ngoo gi nang ri apyaid atoo: moo jeju" boin: lho: coung" ngei nyid. wa.

²Nyid" khang" moo" nang ri ngoo jeju" boin: dacoung" nghei nyid loo: wa. Nang ri ngoo apyaid atoo: moo: dacoung" nghei nyid wa nghoid.

³ASEING gi gyi: sheung: nyid yoomo gye" nyang: coung" nghei gi su: nghoid bye:- nya: da" gyi: sheung: khyoo: ri hang" we' atho' se' gyoo.

⁴nang zei: da" moo" zoo" jid: zoo" joem ri byunyid xiyam: moo: dacoung" ngei nyid boem wa re" da" phung" yoeb myo, nho: moo" zoo" ri we' nyangnu" kho" kyo" nyid boem wa zi nghoid.

⁵Re" da" myonhoo: phung" yoeb yo' khokham khoin" so, khyoo: ri we' nyangnu" tid fu" kyo" boem wa nghoid. Re" da" mau" pho" moo" zoo" jid: zoo: joem ri: we' ngoo damyid soin: yu" nyid wa zi nghoid.

⁶Re" da" gyi: myhang: moo" zoo" joem ri- byumyu" yi tid kyo" nyid boem wa nghoid. Re" da" gyi: sheung: khyoo: ri ngoo we' kho" kyo" nyid wa zi nghoid.

⁷Nyangnu" gi re" da" ge lho' khyoo: dangain" ziri tid kyo" boem wa nghoid. Re" da" nheig khyeug shoo" myen: khyoo: ri nyangnu" gi jihkoin" yo' coung" nghei nyid boem wa zi nghoid.

⁸ASEING gi jheddab ziyo' nheig se' khyeug su: nghoid yoomo nyang: gi nheig khoo" yo: khyoo: ri yo" kham: zeung: ziyo' athang agoin jheddab myid yo' byeung" jo.

⁹Nyang: gi dangain" bang: da" atho' moo: gisu: nghoid nyid wigi nyang: phain" so: to" da" zi dangain" da" atho' mo: we' nheig khyeug nheigloem: bo nyid.

¹⁰ASEING we"- nang phain" so: to" da" dei moo: dei bang: gi nang ri coung" nghei boem wa ziyo' re" da" byumyu" yi dangain" bang: we' nang ri jeju" boin: coung" nghei nyid boem wa.

¹¹Nyangnu" gi re" da" zau: myeing" myonhoo: phung" yoeb bang yo' re" da" athang agoin yoem moo" ri tid kyo" boem wa zi nghoid.

¹²Hougsu" gi re" da" zoug: myeing" myonhoo: phung" yoeb bang yo' re" da" athang agoin yoem" moo" ri tid kyo" boem wa zi nghoid.

¹³Re" da" vhoeb khang khyoo: gi pyaid moo: too" moo: dageung: jo, lho: wigi apyaid atoo: mo khokham phoo nyang: nghoid bye:.

¹⁴Nyang: gi yau: khi" zi shoug" nyid bang: ri pang" thoug byid: lho: wigi leung gyo" jo, bang: ri tu: to' kaid byid: nyid.

¹⁵Kang: dei so, shi: bang: dangain" gi nang ri nheig byu nyid zoore dayu" nyid boem zi nghoid yoomo Nyangnu" zoo: noem, ca" nyid da" uri nyangnu" ri: nang gi zoo: noem byid: nyid.

¹⁶Nyangnu" ri nang myoo" sho' byid: nyid wigi byu dangain" mo, da" ca" yo, khyoo: dangain" ri nang gi joeb byeung loo nhang: nyid.

¹⁷ASEING gi nyang: zei: da" moo" dangain" jang" moo deing: byeung" nyid zi nghoid yoomo nya: moo" zoo" dangain" jang" moo: nheig yu" khyeug nyid su: nghoid.

¹⁸Nyang: gi nyang: ri yoid ji nyid bang: yo' nheigloem: dain: khyo" nyang: ri yoid khi: bang: da" nam, tain" moo: nyid nyid.

¹⁹Nyang: ri gyoug phoug" bang: da" ca" yo, nyid khyoo: joem dangain" ri nyang: jhoeb, byeing byid: nyid wigi nyangnu" da" mho' yoid thui: ri shau" gyo: lho: nyangnu" ri khyoid yu bye:.

²⁰Nyang: ri jheddab nyid mo, dangain" bang: ri nyang: goem loem byid: nyid lho: akhyeung bang: ri koem gi nyang: phyo' shoin' pyam wa zi nghoid nyid.

²¹Ngoo gi ASEING ri khanham we' coung ngei nyid wa nghoid. Nyang: phain" so: to" da" dei, moodei loeb mooloeb, bang: gi nya: da" gyeung" shang: myeing khyang" ri pyaid moo: too: moo: ju" sho' dacoung" nghei nyid goo" baja" o".