Read Lashi COUNG" NGHEI 18 Bible Online

COUNG" NGHEI 18 - Lashi bible

COUNG" NGHEI 18

¹[1] ASEING we" ngoo gi nang ri atho' tid loo sho' jheddab nyid. nang gi nga" gyivoo joem ri ve: pyam byid: su nghoid.

²ASEING gi nga" goem coung: lhoug zung" su- nyang: gi ngoo loem ge" geung: da" gyidab, nghoid. Nga" da" Mangsoo gi ngoo ri lhoug zung" goem coung: khyoo: yoomo nyang: moo: ngoo myen tab, gau: nyu: nyid. Nyang: gi goo, yhang: ti" ngoo ri gooloo goem byid: nyid. Nyang: gi nga" gyivoo joem ri ve, pyam byid: lho: ngoo ri goug: nyu: tung" nyid nhang: to".

³Ngoo gi ASEING ri mho' yoid- nyang: gi ngoo ri gyivoo joem da" lo, mo khyoid yu nyang: gi coung" nghei byid: zi shoug" moin: nyid.

⁴Gyoug pho" shid: gyoin, gi ngoo ri: dangain" lheung khoem to"- lhu: phyo' pyam wa da" beung: mhoid joem gi nga" atho' moo: doin: lhoem" too" bye:.

⁵Gyoug pho shid: gyoin gi- ngoo ri lheung khoem too" bye:. Loeb duang: gi nga" shid re" gyoin: kham: to" abye:.

⁶Ngoo gi nga" kyi" khyeug khoug: mo ASEING ri yoid bye:. Ngoo ri pang" yu wa shid re" nga" Mangsoo ri ngoo yoid bye:. Mangsoo gi noku yhoem: moo" khoug: mo nga" thui: ri shoug" gyoo: bye:. Pang" thug wa shid re" ngoo ngau: yoid thui: ri nyang: tam" gyoo: byid: bye:.

⁷Houg: lang" Mangsoo nheug yo: wigi mougmyid gi nain" lho: lei" loo bye:. Boem lang joem we' apoem: mo nyang: yoid yoid ga: wim lho: lei" nyid.

⁸Nya: nhoo: duang: mo myi khoug nghoid loug we' nya: nhoid mo nge" dab, nyid da" myiyham: yo' myigyu: joem ri: moid thu' kaid nyid.

⁹Nyang: gi mougkhung: ri lang: khyo' kaid lho: ceug yo no, da" jhoemmoug" thei" ri nya: khoovoo: khug: moo: kaid ci: lho: nyang: gyoo" lo.

¹⁰Nyang: gi dung dab gougnyhoug tho' moo: zhoung: lho: gye" myab, sho' dang: lo. Nyang: gi lid zoo" dungsoo" joem yo" gyung: so" lo.

¹¹Nyang: gi nya: gung ri moug: coid yo' nghoeb too" nhang:- gyid byeung" sho bo da" joem" moug" yo' nyang: ri lheung khoem to" nhang: nyid.

¹²Nyang: da" shidkhoin" mo leug voo yo' myiyham: joem gi lhab' myeug nyid jang" mo thu lo lho: teung: no, da" jhoem" moug: khoug: mo kyang thu lo.

¹³Houg: lang" ASEING gi mougkhung: khyo" moug: goem: myheung thui: yo" myeung thu lo lho: myhang: thang su: da" thui: ri shoug" gyo.

¹⁴Nyang: gi myoo: ri beug tang" kaid nyid wigi gyivoo joem ri byi, sain" loo" nhang:. Lhab' ri myeug nhang: lho: wigi Nyangnu" ri phang: thu loo" nhang:.

¹⁵ASEING we" nang gi gyivoo joem ri gyikoid lho: Nyangnu" ri nheug khoo" yo: nhain' nyid da" uri panglai: gyid thoem" thi" gi akoem: bue" lo" byug bye:. Mougmyid da" apoem ayang: gi yhoin" thu' lo nyid bye:.

¹⁶ASEING gi tho mo lo, yhoin" kaid lho: ngoo ri zei: ci: wigi gyid byid thoem" thi" mo ngoo ri she: thu' yu bye:.

¹⁷Nyang: gi yoem: bo da" gyivoo joem lo, mo nghoid loug we' yoem: moo" bo lho: ngoo ri ngheing" bang: dangain" mo, da" lo, mo we' khyoid yu bye:.

¹⁸Ngoo kyi" khyeug shoug" nyid da" bidnyid moo nyangnu" gi ngoo ri khaid zain: lo nyid boem. Nghoid loug we' ASEING gi: ngoo ri lhoug zung" goem coung: byid: nyid.

¹⁹Nyang: gi ngoo ri gyoug dain khoug: mo pyoin yu bye:. Nyang: gi ngoo ri jheddab vho: ngei nyid yoomo khyoid yu bye:.

²⁰Ngoo gi deungbyeung" su: nghoid yoomo ASEING gi ngoo ri ngi: shab jhungshug byid: bye:. Ngoo gi ce: yooboo adab, su: nghoid yoomo nyang: gi ngoo ri mainkaid byid: bye:.

²¹Ngoo gi ASEING da" tarha" ci: cang loo bye:- nga" Mangso jang" mo aphang: lo" yu.

²²Ngoo gi nya: da" tarha" bain sho' ri zoem: ci- nya: da" dangsoo" khoin" ri we' angeug pyam.

²³Ngoo ce: yooboo ayoo" su: nghoid ziri we' yooboo joem ri jang" pyam, nyid su: nghoid ziri we' nyang: se' nyid.

²⁴Ngoo gi deing byeung" su: nghoid yoomo we' ngoo gi ce: yooboo ayoo" su: nghoid ziri si' yoomo we' nyang: gi ngoo ri ngi: shab jhungshug byid.

²⁵Nang gi nheigloem: zung" mo, tho' moo nheung loem: zung" nyid. Ce" yooboo foin: cang aboo mo, da" atho' moo lo" thang sho' ge nyid.

²⁶Nang gi nheigloem: phyu: mo, ri nheigloem: phyu: khyo" koid. Nghoid loug we' akhyeing" mo, rigi gyi koid nyid.

²⁷Nang gi nheigloem: nyhoem: khyoo, mo, ri khyoid yu nyid. Nghoid loug we' nghoid boin: nyid mo, ri koem gi doin: khyo' pyam nyid.

²⁸O" ASEING we" nang gi ngoo ri bidbang byid: nyid. Nga" da" moug: coid ri bei: loo" nhang: nyid.

²⁹Nang gi gyivoo joem yo' zain: goo" wa da" yoem: so' nghoid loug Nyangnu" da" dab, zeing ri phyo' pyam wa da" yoem: vhoo" ri nghoid loug we' ngoo ri byid: nyid.

³⁰He: Mangsoo koid da" moo" zoo" joem gi gye" joeb byeung" nyid. Nya: dangsoo" khoin" joem we loem ge" nyid. Nyang: gi nyang: ri loem khau: loo mo, dangain" shid re" goo yhang: ti" nghoid.

³¹ASEING kyeing" za: Mangsoo nghoid Mangsoo kyeing" za: ngoonu" da" gyidab, nghoid.

³²Nyang: gi ngoo ri yoem: boo nhang: da" Mangsoo nghoid. Nyang: gi gau: da" khyoo: ngoo ri soin byid: nyid.

³³Nyang: gi nga" da" khyid: ri xaid' khyid: yhang: ti" geung: teung nhang: nyid. Nyang: gi ngoo ri boem tho' moo: gau: nyu: nhang: nyid.

³⁴Gye" kyoung: da" lid gi gyipui" moo: yo" yhung: wa shid re" nang gi ngoo ri jhoug" byid.

³⁵Nang gi ngoo ri lhoug zung" goem coung: khyoid yu nyid. Re" da" yu" goem khyoo: gi ngoo ri gyi: myhang: loo nhang: bye:. Re" da" yoem: so' gi ngoo ri gau: nyu: nhang: nyid.

³⁶Nang gi ngoo ri subi" hang" we' ayo, re" myheug: loo" sho' lhoug zung" byid: yoomo ngoo gi khanham we' gyoeb gyo" loo" wa khyoo: ajo.

³⁷Ngoo gi nga" gyivoo joem ri cang khaid lho yu. nyangnu" ri yo" mhoin' pyam jang" moo: ju" sho' ayab atheing: loo.

³⁸Ngoo gi nyangnu" ri yo" mhoin pyam yoomo nyangnu" gi ayo" to yab boem loo. Nyangnu" gi nga" shidkhoin" moo: soem" leung jo, boem abye: go.

³⁹Nga" gyivoo joem ri oung: pyam lho: meing: yo" zain: wa shid re" nang ngoo ri yoem: vhoo" byid: nyid.

⁴⁰Nang gi nga" shidkhoin" mo gyivoo joem ri phang: thu loo" nhang: bye:. Ngoo we' ngoo ri ngheing" bang: ri mhoin' pyam bye:.

⁴¹Nyangnu" gi pang" thoug yu wa shid re" yoid nyho: nyid boem nghoid loug we' nyangnu" ri hang" we' akhyoid yu boem. Nyangnu" gi ASEING ri yoid nghoid loug we' nyang: gi nyangnu" ri atu" byid.

⁴²Lid hau, tang" lo da- pheipyang" yhang: ti" bue" loo" wa shid re" nyangnu" ri ngoo mhoin' pyam bye:. Khyoogung mo thoem" boeb, ri yhang: ti" nyangnu" tho' moo: ngoo nang: pye" pyam bye:.

⁴³Nang gi ngoo ri tu: lhoem" lo da" mung" byu lo, mo khyoid yu lho: byumyu" bain sho' tho' moo ngoo ri vhoeb khang nhang: bye:. Ngoo gi ngoonyang: ase' da" byumyu" yiri akhid" vhoebkhang" wa da" amyeing" yo" jo, bye:.

⁴⁴Tungbau byumyu" yigi nga" shidkhoin" moo: vhu' pid goeb pid to" ago". Nyangnu" gi nga" amyeing" shoug" gyoo: lang" cang lo" ago".

⁴⁵Nyangnu" gi sarhi' anghoid byoug loo: yoomo nyangnu" da" gyidab, khoug: mo gyoug nain" thu' lo" byoug boem abye:.

⁴⁶ASEING gi dei nyid su: nghoid- nyang: ri lhoug zung" nyid su: ri coung" nghei we'. Ngoo ri: khyoid yu da" Mangso gyi: thang khyoo: ri nyho: fu" nyid ge'.

⁴⁷Nyang: gi ngoo ri nga" gyivoo joem da" tho' moo: oung: loo" nhang: bye:. Byumyu" yiri nga" da" lo, zhoeb khoug: moo: vang lo nhang: lho: wigi

⁴⁸gyivoo joem da" lo, mo ngoo ri khyoid yu o" ASEING we" nang gi ngoo ri nga" gyivoo joem ri oung: loo" nhang: lho: wigi akhyeung" byu yi da" gyi mo ngoo ri goem coung: yu bye:.

⁴⁹Hougsu" nghoid yoomo ngoo gi byumyu" bain sho' mo, da" shidkhoin" mo nang ri coung" nghei nyid. Ngoo gi nang ri jikhoin" myeing" khyo" coung" nghei nyid.

⁵⁰Mangsoo gi nya: khokham ri gyi" sho' da" oung: doid lo" khyoo: byid: bye:. Nyang: gi nyang: khyen: yu to" da" David yo' nya: byukung: byuko, yiri pyaid moo: too: moo: jheddab nheigloem: toin" shed nyid.