Read Lashi COUNG" NGHEI 22 Bible Online

COUNG" NGHEI 22 - Lashi bible

COUNG" NGHEI 22

¹[2] Nga" Mangsoo we"- nga" Mangsoo we"- nang cikoid wigi ngoo ri she: pyam to" lha". Ngoo ri pang" thoug yu wa shid re" ngoo nyho: yoid nyid. Nghoid loug we' akhid" ju" sho' are" pang" yu shi.

²Nga" Mangsoo we"- nyid" kyo, ayo, ri ngoo mho' yoid, nghoid loug we' nang atu" byid: nghoid da:. Myen" khoug" sang" gam, ri yoid mho' nghoid loug we' myenjham" khyoo" ayoo.

³Nghoid loug we' nang gi gyeung" shang: su: nghoid lho: khoo" zhung: nhang: da:. Israela byumyu" yi coung" nghei ziri kham: yu moin: yi" su: nghoid nyid.

⁴Ngoonu" da" phoug" phyid" yigi nang ri loem khau: boem. Ngoonu" gi nang ri loem khoug: yoomo nang gi ngoonu" ri khyoid yu abye:.

⁵Nyangnu" gi nang ri nyho: yoid, mho' nyid yoomo shid: gyoin mo loid byoin lo" boem bye:. Nyangnu" gi nang ri loem khoug: yoomo nheigloem: byo, yoin" zi ashoug.

⁶Nghoid loug we' ngoo gi byu dayug a nghoid loo. Tungsang" lugdung: danghoid lo- dangain" mo, gi ngoo ri aphoug" akhyoid she: pyam lho: ngheung" nyid boem bye:.

⁷Ngoo ri: myang mo, dangain" gi ngoo ri juang" yi nyid boem. Nyangnu" gi yhoo: ri toid lho: vhu" pyi: pyi: nyid ago".

⁸Nyangnu" gi «Nang ASEING ri loem khau:» ga: lho: nyang: gi nang ri «Ciwim akhyoid yu lha". ASEING gi nang ri jheddab vho ngei nghoid rigi ciwim wigi nang ri apang" yu lha"» ga: tid nyid boem.

⁹Nang gi ngoo ri nga" myhi' ung: khoug: mo nyang:- ce: noo aboo loo: khu: loo nhang: su: nghoid bye:. Noug" nu" nghoid nyid yo, ri we' nang gi ngoo ri gau: nyu: nhang: loo bye:.

¹⁰Ngoo gi khu: re" nyid" mo wigi nang ri za: loem khau: lo lho: Khanham we' nang za: nga" Mangsoo nghoid nyid.

¹¹Houg: yoomo nga" jang" mo ave: loo- yau: khe" khyoo: gi jhang loo bye:. Nyangnu" gi dayug we' ngoo ri ayo" pang" yu.

¹²Nga" gyivoo joem gi nuloo joem yhang: ti" lheung khoem lo. Nyangnu" gi Bashan mo gyoug ge da" nuloo: joem yhang: ti" ngoo ri lheung khoem to" boem bye:.

¹³Nyangnu" gi khangkhyi, joem yhang: ti" nhoid fo, gyab, lho: ngoo ri ngaid wa ga: soin nyid boem.

¹⁴Nga" da" yoem: vhoo"- myidjang moo: leung shoin: pyam da" gyid yhang: ti" kyoug kain" loo" khari" bye:. Nga" da" shooyoug: dangain" gi youg: xeig byed, jo, bye:. Nga" da" nheigloem: gi byoo shung" yhang: ti" yau, yu: lo" byug bye:.

¹⁵Nga" da" khyung" kang: gi myidzhoo" phei" yhang: ti" kyoug jo, lho: nga" da" yhoo: we' vhoo: moo: dab, byug bye:. Nang gi ngoo ri shid: wa shid re pheilhoug: boem" moo: she: pyam, too" bye:.

¹⁶Akhyeung" da" byu daphung gi ngoo ri lheung khoem to" boem bye:. Nyangnu" gi zeigni joem yhang: ti" nga" nam, moo: zeung: foem: lo lho: nga" khyid: lo, joem ri ngaid phyed pyam byid: boem bye:.

¹⁷Nga" shooyoug: dangain" ri myang nyid bye:- gyivoo joem gi ngoo ri yu" zhoug to" lho: gau, nyid boem.

¹⁸Nyangnu" gi nga" da" byimi joem ri phid baid lho: gam, go" pyam boem.

¹⁹O" ASEING we" nga" jang" mo ave: loo- ngoo ri myab, re" khyoid yu we'.

²⁰Sham: gyi lham: gyi mo ngoo ri khoid yu we'- nga" kangso' ri he: zeigni joem lo, mo khyoid yu we'.

²¹Ngoo ri: he: khang khyi joem da" lo, mo khyoid yu we'. He: nulam" joem da" shid: gyoin, moo ngoo gi phang: khoug: jang: ayoo" loo.

²²Nang zei: da" moo" zoo" ri nga" byumyu" yiri ngoo tid kyoo: wa nghoid. Nyangnu" da" zoebphung: moo: ngoo gi nang ri coung" nghei wa nghoid.

²³«ASEING da" deizoo: yi we' nyang: ri coung" nghei nyid we'. Yaku da" nya: myid: nya: zoo: yi we' nyang: ri myonhoo: byid: we'. Israela byumyu" yi we" nyang: ri noku goeb pid nyid we'.

²⁴Nyang: gi sho" jhen mo, ri ashe: pyam too"- nyangnu" da" sho" jhen kyi" khyeug khyoo: ri ayu" goin coung: loo: nyid wa zi anghoid. Nyang: gi nyangnu" jang" mo myonhoo: goo" shoid shu: loo" wa zi anghoid. Nyangnu" yoid mho' da" uri tu" byid: nyid.»

²⁵Byumyu" yi zeung: foem: da" phung moo" gung moo nang koid da" moo" zoo" joem shid re" ngoo nang ri coung" nghei wa. Nang ri coung" pid mo, da" shidkhoin" moo ngoo gi dang: theing to" da" xoin" ri ngei" byid: wa.

²⁶Sho" jhen mo, gi gyi" gyi: shoug" zo: boem wa. ASEING jhang khyoo: yu: tain" ri" mo, gi nyang: ri coung" ngei boem wa zi nghoid. Houg: bang: gi khanham we' yoo" zoo: yo" shoug nyid boem baja".

²⁷Byumyu" yi bain sho mo, gi ASEING ri boin: so" loo wa. Mougmyid gyab, goin" mo mo, gi re" jhang khyoo: doem tau" lo boem wa nghoid. Byukung: byuko' dangain" gi nyang: ri noku coung" pid lo boem wa nghoid.

²⁸ASEING gi khokham zeing nyang: nghoid yoomo byumyu" bain sho mo, ri vhoeb khang nyid.

²⁹Nghoid boin: lho: nheigloem: gyi: nyid bang: dangain" gi nyang: ri goeb pid lo boem wa. Shid: loo" se' da" byu yi dangain" mo, gi re" shidkhoin" moo: goeb pid lo boem wa.

³⁰Doem ju" loo wa da" byunyid xiyam: yigi nyang: ri dei dei byid: lo boem wa. Byumyu" yigi ju" loo wa da" byuxeig byuyam: yi moo ASEING da" khyoo: ri tid kyo" lo boem wa nghoid.

³¹«ASEING gi nya: byumyu" yiri khyoid yu bye:» ga: wigi akhu: ri" shi" da" byumyu" yiri tid kyo" lo" boem wa ga: tid.