Read Lashi COUNG" NGHEI 25 Bible Online

COUNG" NGHEI 25 - Lashi bible

COUNG" NGHEI 25

¹ASEING we" ngoo gi nang ri noku nyid.

²Nga" da" Mangso- ngoo gi nang ri za: loem khau: nyid. Joem: lo" lho: sho' thu da" khyoo: mo ngoo ri khyoid yu we'. Nga" gyivoo joem gi ngoo ri ayu" juang" nyid nhang:.

³Nang ri loem khoug mo, gi asoem" lo" yu. Nghoid loug we' nang ri thoug shang doin: lhoem" hain: nyid mo, za: soem" joem: lo" ago".

⁴O" ASEING we" re" da" khyoo: ngoo ri jhau" byid: we'. Hau: gu" ngoo ri si' nhang: we'.

⁵Re" da" deingmain" khyoo: khyo" se' nyid sho' ngoo ri jhau" byid: we'. Khasu" wim gari nang gi ngoo ri khyoid yu da" nga" Mangsoo nghoid. Ngoo gi khanham we' nang ri za: daloem khau nyid.

⁶ASEING we" re" da" nheug khyeug khyoo: yo' geung: teung jhed khyeing: kang: khyeing: ri damyid boin: nyid we'. Lai loo" bye: da" ayo, moo: yhang: ti" nang toin" shed nyid we'.

⁷Zooyam, yo, mo wigi ngoo shoid vhang: yooboo yo' ajo da" khyoo: ri khyoid pyam byid: we'. ASEING we" re" da" geung: teung jhed khyeing: kang: khyeing: yo' ge da" khyoo: khyo" ngoo ri myid boin: so" nyid we'.

⁸ASEING gi ge thang su: yo' deingmain" su: nghoid nyid yoomo yooboo shoid vhang: nyid mo, ri ge soo" eung: da" khyoo: ri jhau" byid: nyid.

⁹Nheigloem: nyhoem: khyo' nyid mo, ri deingmain" da" khyoo: moo: shu" yhe: lo" lho: nyang: myid vho: khyoo: nyangnu" ri jhoug" byid.

¹⁰Nya: da" deizoo: ri tam" gyoo: byid: lho: nya: dang: thang" cab ri cang ri cang mo, gi jheddab khyo" we' deingmain" khyo" we' khyoo" shed vhu" she: lo" nyid.

¹¹ASEING we" nga" yooboo gi tid loo aoung: myo: tham: jo, bye:. Houg: yoomo dang: theing khoin" ri: cang pyeung" khyo" nga" yooboo ri khyoid pyam byid: we'.

¹²ASEING ri gyoug: phau" nyid mo, gi nyangnu" soo" eung: da" khyoo: ri nya: jang" moo jhau" yu boem wa nghoid.

¹³Houg: bang: gi khanham we' yoo" zoo: yoo" shoug wigi nyangnu" da" nya: zoo: yigi mungdain: ri shoug" seung: boem wa.

¹⁴ASEING gi nya: mungdang: ri tam" gyo: cang nyid mo, yo' zoem" khau: nyid lho: nyang: gi houg: bang: yo' nya: dang: theing khoin" ri geung: teung jo, nhang:.

¹⁵Ngoo gi pang" thoug yu zi shoug" wa shid re" ayo, khang" moo" moo ASEING ri yu" nyid lho: nyang: gi ngoo ri shid: gyoin' mo khyoid yu nyid.

¹⁶Hougsu" nga" jhang khyoo: tau" lo lho: ngoo ri nheug khyeug yu shi" we' o". Khasu" wim ga: ri ngoo gi dayug kyeing" nyid lho: yoem: nu: su: nghoid.

¹⁷Nga" da" myid myoo: ung: loug khyoo: dangain" jang" mo ngoo ri khyoid yu lho: wigi yau: khe" kyi" khyeug khyoo: ja: khang" mo" mo khyoid yu we'.

¹⁸Ngoo kham' zo: nyid da" kyi" khyeug ziyo' kyi" khyeug dangain" ri myid boin: byid: lho: nga" yooboo dangain" ri khyoid pyam byid: we'.

¹⁹Ngoo moo: gyivoo khamyhoo, bo ziri bo yu" nyid we'. nyangnu" gi ngoo ri: khayhi' ngheung" nyid boem ziri bo xoem" too" byid: we'.

²⁰Ngoo ri: coung: goem lho: khyoid yu we'. Ngoo ri asoem" loo" nhang: lhe"- ngoo gi re" jang" moo: gau: nyu: nyid wa shid re" tain" lo.

²¹Nga" ge da" khyoo: yo' gyoug phau" nheigloem: zung" khyoo: gi ngoo ri lhoug zung" byid: nyid baja" khasu" wim ga: ri ngoo nang ri loem khau: nyid.

²²O" Mangsoo we"- re" da" byu phung: Israela yiri nyangnu" da" yau: khe" kyi" khyeug jang" mo khyoid yu we'.