Read Lashi COUNG" NGHEI 27 Bible Online

COUNG" NGHEI 27 - Lashi bible

COUNG" NGHEI 27

¹ASEING gi nga" da" bidbang yo' khyoid yu khyoo: nghoid yoomo ngoo hang" ri we' gyoug aca" wa. Pyaid mo too: mo da" ASEING gi gyoug ci' ja: dangain" jang" mo ngoo ri lhoug zung" nyid yoomo ngoo khanham we' gyoug dain zi ashoug" loo: wa.

²Akhyeung" bang: gi ngoo ri thougtheung lho: said pyam, wa ga: yoem: kaid lo boem nghoid loug we' nyangnu" gi thoem: tho: lho: wigi leung lo" boem wa.

³Gyidab, goin" ngoo ri lheung khoem to" boem nghoid loug we' ngoo gyoug dain' wa zi anghoid. Gyivoo joem ngoo ri zain: lo boem nghoid loug we' ngoo gi Mangsoo ri za: loem khau: nyid wa.

⁴Ngoo gi ASEING ri daja: mho' bye:- ngoo vho: zigi daja: kyeing" za: nghoid. ASEING da" yhoem: moo: dapyaid goin" shoug" nyid lho: nya: da" ge khyoo: ri hougmoo: myid fang wigi nyang: khyoo: shed yu wa ziri: mho' nyid.

⁵Yau: khe" kyi" khyeug zi thoung" shau" da" bidnyid ri ASEING nyang: ngoo ri lhoug zung" byid: wa zi nghoid. Nya: da" Noku Yhoem: Moo" moo ngoo ri myenjham" nyid nhang: lho: myhang: da" lug moo" boem tho' moo ngoo ri gau: nyu: nhang: nyid.

⁶Hougsu" nghoid yoomo ngoo ri lheung khoem to" da" gyivoo joem ri oung: pyam wa nghoid. Gau, yi ngei pyo: da" thui: yo' nya: Noku Yhoem: Moo" moo xoin" to' byid: wigi nga" jikhoin" lid jhoem" thui: khyo" ASEING ri coung" byid: nyid wa.

⁷ASEING we" nang ri ngoo yoid mho' da" uri tam" gyoo: byid: we'. ngoo ri: nheug khyeug zoore tu" byid: we'.

⁸Nga" da" jang" moo: tain" re" lho: coung" pid we' ga: nang tid uri ngoo gi ASEING jang" moo: ju" tain" ri" wa ein: tu" bye:.

⁹Nga" da" jang" mo re" da" myonhoo: goo khyoo: alheung: loo. Re" da" deizoo: ngoo ri akhaid thu pyam. Ngoo ri: nheug ayoo: nang gi ngoo ri pang" thoug nyid su: nghoid. Nga" da" khyoid yu ASEING Mangsoo we"- ngoo ri ashe: pyam, too.

¹⁰Nga" myhi' phoo yigi ngoo ri she: pyam, nghoid loug we' ASEING gi ngoo ri lhoug zung" nyid goin coung: nyid.

¹¹ASEING we" nang zei: nhang: nau da" moo" zoo" ngoo ri jhau" byid: lho: ngoo ri gau: nyu: da" khyoo: moo: shu" soo" we'. Khasu" wim ga: ri ngoo moo: gyivoo myoo" sho' nyid.

¹²Mhau' kyoug fain" vo lho: thougtheung gyikoid da" gyivoo joem lo, moo ngoo ri akhaid lham, too.

¹³ASEING da" ge lho khyoo: joem ri ngoo dei nyid shi" da" he: pyaid moo: nyang:- shau" myang kham' zoo: wa nghoid ziri ngoo se' nyid.

¹⁴ASEING ri loem khau: nyid we' nheigloem: abyo, loem" jeung" nyid we'. ASEING ri loem khau: nyid we'.