Read Lashi COUNG" NGHEI 33 Bible Online

COUNG" NGHEI 33 - Lashi bible

COUNG" NGHEI 33

¹Deung byeung" bang: dangain" mo, we' ASEING koid bye: da" moo" zo" shid re" ngei pyo: ziyo' yoid phau: nyid we'. Nya: dang: tam" gyoo: bang: dangain" mo, we' nyang: ri coung" nghei we'.

²Teing baid lho: ASEING ri jeju" boin: ge'. tei" dab, lho: acang: joeb baid myheung ja: yo' nyang: ri jikhoin" khoin" we'.

³Jikhoin" dang: seig yo' nyang: ri khoin" we'. teing ri jhang: jhang: baid lho: ngei pyoo: tung" nyho: yhang: nyid we'.

⁴ASEING da" dang: joem gi deingmain" lho: nyang: zei: da" moo" dangain" we' loem ge" zi nghoid.

⁵ASEING gi nyeung veung" ziyo' deing byeung" da" khyoo: ri jheddab nyid. Mougmyid ri nya: geung: teung jhed khyeing: kang: khyeing: yo' byeung" nhang: to".

⁶ASEING gi nya: da" amyeing" yo' mougkhung: mougdi ri phain" so: too" bye:. Bid, kyi: lhammoo" ri we' nya: dang: dakhoin" yo' phain" so: to".

⁷Nyang: gi gyid thoem" moo" joem ri dakhyi, jang: moo: zheung" to". Nyang: gi no, da" nammugdara joem ri koug: yab joem moo: myhed" lhoung to".

⁸Myidjang dangain" ASEING ri coung" pid nyid we'. Moug: gyab, xangsu: byu yi dangain" nyang: ri phau" myang: nyid we'.

⁹Nya: mungdang: khyo" wigi mougmyid bue" loo bye:. Nya: amyeing" khyo" wigi jo, moo: jo, po thu' loo bye:.

¹⁰Hau: ASEING gi byumyu" yi sham: go" nyid khyoo: ri lhu: soid pyam byid nyid. Nyang: gi nyangnu" da" soin nyeung to" da" khyoo: joem ri toem' pyam byid: nyid.

¹¹Nghoid loug we' nyang: myid soin to" khyoo: gi khanham we' dageung: teung jo. Nyang: myid to" khyoo: we' pyaid moo too: moo: dageung: jo.

¹²Mangsoo ri ASEING ga: da" byumyu" yigi ngilho' nyid boem. Nya: byumyu" khyo" khyen: yu to" da- byu yi we' ngilho' nyid boem.

¹³Hau: ASEING gi mougkhung: mougdi mo goeb yu" nyid lho: xangsu: byu yi dangain" mo, ri myang nyid.

¹⁴Nyang: vhoebkhang" nyid da" joyoo mo mougmyid tho' moo: dei nyid mo, dangain" ri nyang: goeb yu" nyid

¹⁵Nyang: gi dangain" mo, da" nheigloem: ri phain" so: kaid su: nghoid yoomo nyangnu" koid moo" zoo" dangain" ri: se' nyid.

¹⁶Khokham phoo gi nya: da" yoem: bo gyiphung: yoomo oung: lo" zi anghoid. gyizoo: yi we' nyangnu" yoem: boo yoomo oung: lo" zi anghoid.

¹⁷Gyikhaid da" myang: gi oung: doid loo' wa shid re" ce" akyu" aboo. Nyangnu" da" gyi: thang yoem: vhoo" we' ayo" khyoid yu.

¹⁸ASEING gi nya: da" geung: teung jhed khyeing: kang: khyeing: moo loem khau: lho: nya: dang: ri tam" gyoo: mo, da" atho' moo lhoug zung" goem coung: nyid.

¹⁹Nyang: gi houg: bang: ri shid: gyoin mo lhoid pyoin yu. Nyang: gi zooyoid, phang" khoug shau" da" ayo, moo houg: bang: ri lhoid pyoin' kangso' dei nyid nhang: wa nghoid.

²⁰Ngoonu" da" nheig byu jang: gi ASEING moo: nghoid nyang: gi: ngoonu" da" goin coung: su: yo' ngoonu" da" pang" thoug su: nghoid.

²¹Ngoonu" gi: nya: gyeung" shang: myeing ri loem khau: nyid. Ngoonu" gi: nyang: yoomo gau yi ngei pyo: nyid boem.

²²ASEING we' nang gi: ngoonu" da" nheug byu jang nghoid ziyo' dakhyoo" ti" re" da" geung: teung jhed khyeing: kang: khyeing- ngoonu" yo' dage" dajo, nyid baja" o".