Read Lashi COUNG" NGHEI 34 Bible Online

COUNG" NGHEI 34 - Lashi bible

COUNG" NGHEI 34

¹Ngoo gi khanham we' ASEING da" jeju" ri boin: so" nyid wa. Ngoo gi nyang: ri coung" nghei khyoo: khanham we' anoo: wa.

²Ngoo gi nyang: koid bye: da" moo" zoo" yoomo nyang: ri coung" nghei nyid wa. Shen" yen bang: dangain" mo, shau" gyo: lho: gau yi nyid goo" baja".

³Ngoo yo' dage- ASEING da" nghoid thang khyoo: ri tid fu" shang. Nya: da" myeing khyang" ri nyhangnu" dangain" coung" nghei shang.

⁴Ngoo gi ASEING ri mho' yoid lang- nyang: ngoo ri tu" byid: wigi nyang: gi gyoug ci khyoo: dangain" jang" mo ngoo ri loid byoin loo" nhang: bye:.

⁵Doin: zeug zi shoug" nyid mo, gi nyang: ri yu" lho: gau yi ngeibu nyid ago". Nyangnu" gi khanham we' yoem: shoin: zi shoug" wa zi anghoid.

⁶Pang" thoug khyoo: ayoo" mo, gi nyang: ri yoid lang" nyang: tu" byid: nyang: ri Nyangnu" da" yau: khe" khyoo: dangain" jang" mo khoid yu bye:.

⁷Nya: moug" lagyoo: yigi ASEING ri gyoug phoug" bang: ri lhoug zung" lho: gyoug pho" khyoo: moo nyangnu" ri khyoid yu.

⁸ASEING gi khayhi' gyeing" ge ziri nanyang: ca: yu" lho: si' we'. Nyang: moo: nghe: khoug: jang: myang mo, gi ngilho' nyid boem.

⁹Nya: byu phung: yi dangain" bang: we' ASEING ri phoug" tab, ngi: shab byid: we'. Nyang: ri tam" gyo: nyid mo, gi nyangnu" ca" nyid khyoo: joem dangain" ri yo" yu nyid boem.

¹⁰Khang khyi joem gi zoo: noem ayoo" yoomo zooyoid nyid. Nghoid loug we' ASEING ri tam" gyo: nyid mo, gi ge zi daja" we' amyung nghoid ago".

¹¹Ri" ge'- nga" byencang" nu" yi we' nga" dang: ri tam" gyoo: we'. ASEING ri gyoug phoug" wa shid re" nanu" ri ngoo jhau" byid: ba.

¹²nang gi ngei pyo: kang: dei khyoo: ri vho: ngei la". Kang: sheung: lho: gau yi ngei pyo: nyid nau la".

¹³Hougsu" nghoid rigi akhyeung" dang: tid khyoo: yo' mhau, fain" dang: tid ziri to" pyam we'.

¹⁴Akhyeung" khyoo: mo gang: lo" lho: ge da" moo" ri zei: we'. Myenjham" khyoo: ri re" nheigloem: emyed bain sho' yo' shoo: we'.

¹⁵ASEING gi deing byeung" mo, tho' moo: yu" nyid wigi Nyangnu" da" ngoug thui: joem ri tam" gyo: nyid.

¹⁶Nghoid loug we' nyang: gi akhyeing" ashoeb moo" zei: mo, ri thougtheung nyid. Hougsu" koid da" khyoo: gi mougmyid moo: nyangnu" shid: lo" uri nyangnu" gi houg: lang" to" myhed pyam zi ashoug" wa shid re" nghoid.

¹⁷Deing: byeung" mo, ASEING ri yoid, lang" nyang: gi tam" gyoo: byid: nyid. Nyang: gi nyangnu" da" kyi" khyeug khyoo: dangain" jang" mo nyangnu" ri khyoid yu bye:.

¹⁸ASEING gi yoem: gyoug: mo, nam, moo: nyid wigi nheig byu jang: dangain" ci: phyug pyam mo, ri khyoid yu nyid.

¹⁹Byu yigi yau: khe" khyoo: myoo" sho' shoug" nyid nghoid loug we' ASEING gi houg: yhang: te" khyoo: dangain" jang" mo nyangnu" ri khyoid yu nyid.

²⁰ASEING gi nyang: ri goolhoo: yu" coung: byid: nyid yoomo nya: da" shooyoug: joem dakhaid we' gyau: zi shoug wa anghoid.

²¹Akhyeung" da" khyoo: gi nheigloem: ge da" su: ri said pyam wa. deing byeing su:- ngheing" bang: gi yooboo dam kaid zi shau" boem wa.

²²ASEING gi nya: byumyu" yiri khyoid yu loo wa nghoid. Coung: goem yu wa shid re" nya: jang" moo: tain" yhi: mo, dangain" gi loid byoin lo" zi shau" boem wa nghoid.