Read Lashi COUNG" NGHEI 35 Bible Online

COUNG" NGHEI 35 - Lashi bible

COUNG" NGHEI 35

¹ASEING we" ngoo ri thougtheung mo, ri lhoem: thougtheung we'. Ngoo ri: lhoem: zain: mo, ri bo zain: we'.

²Re" goo yo' gyikhen ri void, ci: wigi Ngoo ri: re" khyoid yu we'.

³Ngoo ri: cang khaid zain: loo bang: ri re" lham: toid yo' voozung: ci: lho: khaid pyam byid: we'. Nang gi ngoo ri khyoid yu wa" ein:- dang: theing byid: we'.

⁴Nga" kangso' ri kuang nyid mo, ri soem" joem: loo" nhang: lho: sho' thu nhang: baja". Ngoo ri: lhoem: thougtheung mo, gi doem yu: tau" lo" zi shoug" lho: vhu" nhung nhung gyoo" baja".

⁵Nyangnu" gi ASEING moug: lagyoo yi wigi cang khaid lang" nyangnu" gi lid hau, tang" lo" da" phei" pyang" yhang: ti" moid tang" pyam zi shoug" goo" baja".

⁶ASEING da" moug: lagyoo: yigi nyangnu" ri khaid thu lo" da" uri Nyangnu" da" khyoo: gi moug: coid ziyo' gye" jhoid da" khyoo: nghoid baja".

⁷Khasu" wim ga: ri nyangnu" gi ce: sei: abo jang" moo: ngoo ri myhi' wa shid re" tei" gau" khyo' to" lho: nga" kangso' ri: yu pyam wa shid re" gyoin: du: to" ago".

⁸Nghoid loug we' nyangnu" ci: aboin: shi" uri byo, yoin" lo" zi nyangnu" mo: ju" loo nhang: we'. Nyangnu" khyo' to" da" tei" moo: nyangnu" ri myi" nhang: lho: nyangnu" gi byo, yoin" khyoo: moo: byid gyo" loo" goo" baja".

⁹Houg: lang" ngoo gi ASEING yoomo gau yi ngei pyo: nyid wa nghoid. Nyang: gi ngoo ri: khyoid yu yoomo ngoo gi gau yi nyid wa.

¹⁰«Nang yo' du goo" su: dayug we' anyid- nang gi yoem: boo mo, khoug: mo doin: zeig zo: zi shoug" nyid mo, khoug: mo sho" jhen su: ri coung: goem nyid.» ein: nga" da" ung: khoug: nheigloem: bain sho' yo' ngoo gi ASEING ri tid nyid.

¹¹Akhyeung" da" byu yigi ngoo ri thougtheung lho: ngoo nyang: lang" ase' da" youg: moo" moo ngoo ri zoug: zhoug.

¹²Ge da" khyoo: yoomo nyangnu" gi ngoo ri age khyo" latoo: phoug wigi ngoo nheigloem: thang nyid bye:.

¹³Nghoid loug we' ngoo gi nyangnu" no nyid uri ngoo gi kougshu: byimi ri void, ci: lho: zoo: noem zeung: nyid.

¹⁴Ngoo gi nyangnu" ri nga" bidnoem yo' mang: nhung" shid re" yhang: ti" akyu" mho' byid: Nga" vhuloem ri goeb lho: nya: myhi' shid re" kougshu: su: dayug yhang: ti" ngoo gi dang goug" sho' kougshu: nyid.

¹⁵Hougsu" nghoid loug we' ngoo yau: khi" zi shoug" nyid uri nyangnu" gi gau, lho: ngoo ri juang" yi wa shid re" zeung: foem: to" boem. Ngoo asi, mo, ngoo ri: nhoug lho: thoug" thoin: ago".

¹⁶Nyangnu" gi khyid: gyoug: su: ri coem juang" yhang ti" ngoo ri we' zheung: juang" lho: ngheung" ziyo' yu" zhoug to" boem.

¹⁷ASEING we" nang khamyhang ju" sho' yu" nyid shi" wa lha". Nyangnu" ngoo ri: zain: lo jang" mo lhoid pyoin yu we'. He: khangkhyi joem phung: mo nga" kangso' ri khyoid yu we'.

¹⁸Houg: lang" ngoo gi re" byumyu" yi phoung: foem: jang" moo nang ri jeju" boin: nyid wa. Ngoo gi nyangnu" dangain" mo, shidkhoin" moo nang ri coung" nghei nyid wa.

¹⁹Ngoo ri: juang" nyid da" nga" gyivoo joem ri ngoo soem" joem: lo" khyoo: agau, yi nhang: nyid. Ce" sei: we' abo jang" moo ngoo ri nheung" nyid mo, rigi ngoo kougshu: khyoo: yoomo agau, yi nhang: nyid.

²⁰Nyangnu" gi veing" goo" wa da" dang: atid boem- myen myen jham" jham" jhed jhed koug koug- nyid da" byu phung: yi da" khyoo: ri mhau, da" dang: aja: ja: khyo" goemlu khyo, nyid ago".

²¹«Ngoonu" gi nang cikoid ziri myang bye:» ga: nyangnu" gi ngoo ri: yooboo zhoug lho: nyho: nyid ago".

²²Nghoid loug we' o" ASEING we" hid: yhang: te" ziri nang myang bye:. Houg: yoomo ASEING we" sam" zoo: anyid nyid. Nga" jang" mo ave: gang: loo:.

²³Nga" ASEING we" nanya: gung ri lhoug: nhau" lho: ngoo ri gyi ve, pyam byid: we'. Nga" Mangsoo we"- to' lo lho: nga" sei: ri sho' pyam byid: we'.

²⁴O" ASEING we"- nang gi deing: byeung" su: nghoid yoomo ngoo ri yooboo ayoo" su: nghoid ein: tid fu" byid: we'. Nga" gyivoo joem ri nga" tho' moo: ayu" gau nyid nhang:.

²⁵«Nyhang" gi nyang: ri ung: bye:. Nyhang" vho: ziri hid: nyang: nghoid bye:» ein: nyangnu" ri atid nhang:.

²⁶Ngoo yau: khi" zi shoug" nyid uri yu" gau nyid mo, gi jhoid soem" joem: lo" byoug wigi lhu: nhoung pyam zi shoug" goo" baja".

²⁷«ASEING gi khayhi' gyi: myhang: lha". Nyang: gi nya: deizoo: oung: doid lo" khyoo: moo nheugshid: nheugdeug nyid» ga: wigi nga" tho' moo: yooboo adab da" khyoo: ri myang noug mo, gi gau, yi tung" nyho: yoid lho: poug lho: poug lho: tid nyid goo" baja".

²⁸Hau: lho: wigi ngoo gi re" da" deing: byeung: khyoo: ri tid fu" byid: nyid wa. Ngoo gi nang ri danyid ri danyid" goin' coung" nghei nyid wa zi nghoid.