Read Lashi COUNG" NGHEI 37 Bible Online

COUNG" NGHEI 37 - Lashi bible

COUNG" NGHEI 37

¹Akhyeing" ashoeb zi koid mo, yoomo myid amyo: nyid. adeing amain" da" moo" zei: bang: ri ayu" no" nyid.

²Kyoug lo" byoug da" vu, fu" kyang: yhang: ti" nyangnu" gi khamyhang amyang" ri bei: lo" boug boem wa nghoid. Nyhau" lo" da" mhain" nyoug joem yhang: ti" Nyangnu" shid: lo" byoug boem wa.

³Hau: ASEING ri nghe: khau: lo- ge da" moo" ri zei: nyid we'. Mungdain: moo: nyid lho: gau: nyu: myenjham" nyid we'.

⁴Hau: ASEING moo: re" da" gau yi khyoo: sho: nyid we' Nyang: gi nang myid vho: khyoo: byid: wa zi nghoid.

⁵Re" da" gung du: hau" ASEING ri ab byid: we'. Nyang: ri loem we' nyang: gi nang ri pang" thoug yu wa zi nghoid.

⁶Re" da" deingmain" khyoo: ri nyid" gung mo bidbang yhang: ti" nyang: thoin" pang byid: wa zi nghoid.

⁷Hau: ASEING shidkhoin" moo: sam" zoo: nyid wigi nyang: zei: bui" byid: wa ziri lang" nyid we'. Akhyeung" bang: da" akhyeung" khyo" myid soin: lo" khyoo: moo oung: doid lo" wa ziri we' nyid gi nyid de lo ziri we' seing" ayu" kho" nyid goo.

⁸Myid amyoo- nheug we' ayo: nyid. Hau: zigi nang ri yau: khe" kyi" khyeug khyoo: za: dabui" nhang: nyid.

⁹Hau: ASEING moo: nghe: khau: nyid mo, gi mungdain: ri shoug" seung: nyid boem wa. Nghoid loug we' akhyeing" ashoeb bang: gi khaid thu pyam zi shau" boem wa nghoid.

¹⁰Hougsu" khamyhang amyang" ri akhyeing" ashoeb bang: gi bei: lo" byoug wigi nang gi nyangnu" ri shoo: nghoid loug we' akhyeing" ashoeb bang: gi khaid thu pyam zi shau" boem wa nghoid.

¹¹Nghoid loug we' nheigloem: khyo nyhoem: bang: koem gi mungdain: ri shoug" seung: nyid boem wa nghoid. Nyid gi nyid de khyoo: yo' ngei pyo: myenjham" khyoo: ri shoug" kham: yu boem wa.

¹²Akhyeing" ashoeb da" byu yigi byu gi bi" ri age khyo" soin: lho: Nyangnu" gi anoug angei da" myojid" yo' yu" zhoug to" ago".

¹³Nghoid loug we' akhyeing" ashoeb bang: gi khamyhang amyang" ri phyo' shoin pyam shoug" wa ziri ASEING gi se' nyid yoomo nyang: gi nyangnu" ri yu" yi nyid.

¹⁴Asho" ajhen: bang: yo' ca" nyid bang: ri we' said pyam wa ga: akhyeing" ashoeb bang: gi nyangnu" da" sham ri she: lho: lid: joem ri we' thoung: ci: abye: go".

¹⁵Nghoid loug we' nyangnu" gi nyangnu" da" sham: yo' nyang: said pyam zi shoug" wa ziyo' nyangnu" da" lid: joem ri we' myheug khyau" mhoin' pyam zi shau" boem wa.

¹⁶Byugi dayoug da" jonu" dajhi' kyeung" da” zigi akhyeing" ashoeb su: myoo" sho' yo" da" jonu" dangain" tho' moo phoug" je dab, nyid.

¹⁷Khasu" wim ga: ri ASEING gi akhyeing" ashoeb su: da" yoem: vhoo" ri khyoug" pyam byid: loo wa. Nghoid loug we' byugi yiri koem gi nyang: lhoug zung" goem coung: byid: nyid wa zi nghoid.

¹⁸ASEING da" dang: tam" gyo: nyid bang: rigi nyang: nheug khyeug shoo" myen: nyid wigi mungdain: ri nyangnu" apyaid atoo: shoug" seung: ci: boem wa zi nghoid.

¹⁹Yau: khe" kyi" khyeug shau" nyid da" bid nyid ri kyi" khyeug sho" jhen: zi nyangnu" shoug" wa zi anghoid. Zooyoid, phang" khoug gyo" uri nyangnu" gi ca" yo khyoo: agoin' agoo" shoug" kham yu boem wa zi nghoid.

²⁰Nghoid loug we' akhyeing" ashoeb bang: gi shid: boem: loo" goo" wa nghoid. ASEING da" gyivoo joem we' siyoo, mo da" bain: joem yhang: ti" shoem: lo" byoug wigi nyangnu" gi myikhoug" su" bei: lo" byoug boem wa.

²¹Akhyeing" ashoeb su: gi jhed" ci: lho: khanham we' ayo" doem xab, loo. Nghoid loug we' byugi yigi nyangnu" da" jhungshug jhung: lang: joem ri agoin: ayu byid:.

²²ASEING wigi mainkaid byid: zi shoug" mo, gi mungdain: ri shoug" seung: boem wa. Nghoid loug we' nya: jang" mo nheing" khoin" zang" jo, mo, koem gi koin" thu' pyam zi shau" boem wa.

²³ASEING gi byu ri nyang: yhi: eung: da" khyoo: moo vhu" she: nyid lho: nyang: vho: ngei bang: ri lhoug zung" byid: nyid.

²⁴Nyangnu" gi to' leung loo" nghoid loug we' jha" leung jo, wa zi anghoid. Khasu" wim ga: ri ASEING gi nyangnu" ri pang" tu: to' kaid wa zi nghoid.

²⁵Akhid" gi ngoo mang: bye:- ngoo gi ayo, myang" sho' nyid loo bye:. Nghoid loug we' byugi yiri ASEING wigi she: pyam to" ziri byugi yi da" nya: zoo: yi zoo: noem mho' zo: yen" ziri ngoo khanham we' amyang yu".

²⁶Nyang: gi ayo, khang moo agoin' ayu: byid: nyid wigi gooji yiri yo" jhed" byid: nyid. Nya: zoo: nya: myid: yi we' jeju" jhungshug bue" nyid boem.

²⁷Akhyeung" khyoo: ri jang" pyam, lho: ge da" moo" ri zei: nyid we'. Houg: lang" re" da" amyed ashen yigi hau: moug: moo: khanham we' shoug" nyid nyid boem wa nghoid.

²⁸Khasu" wim ga: ri ASEING gi deungmain" da" khyoo: ri jheddab nyid wigi nheigloem: zung" da" nya: byumyu" yiri ashe: pyam. Nyang: gi nyangnu" ri apyaid atoo: moo lhoug zung" goem loem byid: nyid loug we' akhyeing" ashoeb su: da" amyed, ashen yi rigi koin" thu' pyam zi shau" boem wa nghoid.

²⁹Deung byeung" da" byumyu" yigi mungdain: ri yo" seung: boem wa ziyo' hau: mungdain: moo: khanham we' shoug" nyid nyid boem wa nghoid.

³⁰Byugi dayug da" nhoid moo: gi phajhi" dang: bo nyid. Nyang: gi khanham we' akhyoo" jang lho: young" du nyid.

³¹Nyang: gi Mangso tarha" ri nya: nheigloem: ung: khoug: moo: shoung: to" wigi hau: tarha" ri khanham we' ashe: pyam nghoid da:.

³²Akhyeing" ashoeb su: gi byugi yiri co' nyid wigi nyang: ri said pyam wa shid re yoem: kaid nyid.

³³Nghoid loug we' ASEING gi nya: da" gyivoo pho, da" lo, moo: ab byid: pyam wa zi anghoid. Nyang: gi dang: phyed zi shoug" nyid uri yooboo dam kaid zi shoug" nhang: wa zi anghoid.

³⁴ASEING moo: nheug byu nyid wigi nyang: pyeung: to" da" dang: ri tam" gyo: nyid we'. Nyang: gi nang ri mungdain: byid: khyo" nang ri coung" nghei ngi: shab wa. Hau: lho: akhyeing" ashoeb bang: rigi koin" thu pyam ziri nang shau" myang wa nghoid.

³⁵Zeig zoo: ung: zo: nyid da" akhyeing" ashoeb su: ri ngoo dalheung: se' yu" bye:. Nyang: gi Lebanon boem mo shamu gam yhang: ti" yugkhang" mo, atho' moo: nghoeb ci: abye:.

³⁶Nghoid loug we' hau: thang: moo: ngoo lid lo' yu" uri nyang: hau: joyoo moo: anyid lo. Nyang: ri ngoo sho: yu" nghoid loug we' nyang: ri amyang loo.

³⁷Byugi yiri xoem" too" ge'- deungbyeung" su: ri yu" nyid we'. myenjham" su: gi amyed ashen myoo" sho' yo.

³⁸Nghoid loug we' yooboo dab da" byu yigi jhoid" nyang: byu xuid" vooyoem: zi shoug" lho: nyangnu" da" amyed ashen yigi shoem" thu' pyam zi shoug" nyid.

³⁹ASEING gi deing byeung" mo, ri khyoid yu wigi yau: khi" zi shoug" nyid da" ayo, moo Nyangnu" ri zung" byid: lhoug byid: nyid.

⁴⁰Nyang: gi nyangnu" ri pang" thoug lho lhoid pyoin yu nyid. Nyangnu" gi nya: jang" moo goem loem yu byid: wa shid re" ju" re" nyid boem yoomo nyang: gi nyang: nu" ri akhyeing" ashoeb bang: da" lo, mo khyoid yu byid: nyid.