Read Lashi COUNG" NGHEI 38 Bible Online

COUNG" NGHEI 38 - Lashi bible

COUNG" NGHEI 38

¹[4] O" ASEING we" re" da" nheug yo: ziyo' ngoo ri khashen" yhen nyid.

²Re" da" myookhaid joem yoomo ngoo dam dab, jo, bye:. nang gi ngoo ri baid lheung: to" abye:.

³Re" da" nheug yo: khyoo: yoomo ngoo atho' tid no nyid bye:. Nga" yooboo joem yoomo nga" da" gung goin" noobau: phyoobau: vang jo, bye:.

⁴Ngoo gi ngoonya: da" yooboo gyid ji: zoo" moo bo noeb lo" nyid bye:. hau: khyoo: joem gi atho' oung: kham' sho' lid: da" yoolid: daloem: nghoid nyid.

⁵Ngoo gi akoo" afang: su: danghoid loo: yoomo nga" dam joid joem gi boeb, nam nyid bye:.

⁶Ngoo gi gyau: nghoug jo, bye:- ngoo gi thoung" mhoin' pyam zi shoug" bye:. Houg: yoomo ngoo gi danyid" goin" danyho: ngau nyid.

⁷Ngoo gi gung nge" no nyid ziyo' shid: loo" looyid danghoid lo:.

⁸Ngoo gi myoung: dau nyid ziyo' gyeing" nyang: mhoin' mhoin' zi danghoid lo:. Nga" nheigloem: emyed we' myid myoo: ung: loug zi shoug" lho: amyen akhyoid nookyeing" dakyeung" nyid lo.

⁹O" ASEING we" ngoo cenoem ri vho: ngei nyid ziri nang se' nyid. Nga" nookyeing" thui: dangain" ri we' nang shoug" gyoo: byid: nyid bye:.

¹⁰Nga" nheigloem: seing" gung thoung" nyid bye:- nga" yoem: so' we bain thang bye:. Nga" myojid" we' yoem: aboo loo.

¹¹Nga" da" dam, noo joem yoomo nga" byencang" yi yo' yhoem: kyoo" cang" yigi nga" jang" moo: are" lo boem loo: wa. Nga" da" yhoem: byu yi lang" nga" jang" mo ve: gang: loo" bye:.

¹²Ngoo ri: said pyam noug mo nga" shid re" lhid thoung: to" boem wigi ngoo ri noo nhang: noug mo, gi ngoo ri yo" lhu: phyo' pyam wa shid re" kyug nhain' nyid ago". Nyangnu" gi anoo: ayab, loo ngoo ri: age khyo" soin' nyid ago".

¹³Ngoo gi nujed su: dayug yhang: ti" ci" we' ashoug" gyoo. Nhoid jed, su: dayug yhang: ti" ci" we' ayo" tid loo.

¹⁴Ngoo gi ashoug" gyoo: yoomo ayo" phoug tu" da- byu dayug yo' du nyid.

¹⁵Nghoid loug we' o" ASEING we" ngoo gi nang ri za: daloem khau: nyid. Nga" ASEING Mangsoo we"- nang gi ngoo ri tu" byid: wa zi nghoid.

¹⁶Ngoo ri gyi koid nyid mo nga" da" myid myoo: ung: loug da" khyoo: moo ayu" gau, nyid nhang:. Ngoo gyo" soem" lo" da" khyoo: moo: we' nyangnu" ri aphau: khuang nyid nhang:.

¹⁷Ngoo gi leung loo" wa zi date: nghoid lo: ziyo' atheing: loo: no nyid.

¹⁸Nga" yooboo joem ri we' ngoo yhen: yu nyid. Hau: yooboo joem gi ngoo ri myid myoo: ung: loug nhang: nyid.

¹⁹Nga" gyivoo joem gi- yang" zain" boem ziyo' yoem: bo nyid boem. Ce" yooboo we' ayoo" yoomo ngoo ri nheing" mo, myoo" sho' nyid.

²⁰Ge da" moo" zo" shid re" akhyeing" ashoeb khyo" latoo: phoug nyid mo, gi ngoo jo da" moo" zei: yoomo ngoo ri thougtheung nyid boem.

²¹ASEING we" ngoo ri ato" pyam- nga" Mangsoo we"- ngoo yo' vi" vi: moo: anyid ja.

²²Ngoo ri: khyoid yu da" ASEING we" ngoo ri akhid" nyang: pang" thoug yu we' o".