Read Lashi COUNG" NGHEI 40 Bible Online

COUNG" NGHEI 40 - Lashi bible

COUNG" NGHEI 40

¹[6] ASEING da" pang" thoug khyoo: yoo" wa shid re" ngoo gi nheigloem: sheung: ziyo' dalang" nyid. Houg: lang" ngoo ri nyang: gi tam" gyoo: byid: wigi nga" da" mho' yoid thui: ri shoug" gyoo: byid: bye:.

²Gyoug pho" joem: duang: khuang" yo' noeb shid: loo" se' da" thoem" nhoin' mo nyang: ngoo ri lang: she: yu wigi lug moo" boem tho' moo gau: gau: akhid" nyang: ngoo ri nyid nhang: lho: ngoo ri lhoug zung" goem coung: byid: nyid.

³Nyang: gi ngoo ri jikhoin" dang: aseig khoin" wa shid re" jhau" byid: bye:. Hau: zigi ngoonu" da" Mangsoo ri coung" da" jikhoin" daloem: nghoid. Byu myoo" sho bang: gi hau: ziri myang lho: gyoug lhed zed" zoore" ASEING ri nyangnu" gi loem khau: nyid boem ago".

⁴Phara" soolhoo: thang: moo: acang loo" loo: za: mhau, da" yu phara" apyeug joem ri we' anoku khoug: loo: za: ASEING riza: loem khau: nyid bang: gi ngilho' boem.

⁵Ngoonu" da" ASEING Mangsoo we"- ngoonu" shid re" nang koid too" byid: bye: da moo" zoo" joem gi myo: tham: jo, bye:. Nang yo' du goo" su: hang" we' aboo loo. Ngoonu" shid re" mau" pho" da" nyheung soin' khyoo: myoo" sho' nang koid too" byid: abye:. Hau: zigi soung myo: jo, yoomo tid loo a ung: loo.

⁶Nang gi ngei" byid: xoin" joem yo' jhungshug ri vho: ngei nyid su: anghoid. Phoin: tho' moo: byeung" sho' nghe: to" da" gougnyhoug xoin" du: joem yo' yooboo joem ri khyoid pyam byid: wa shid re" to' byid: da" xoin" joem ri nang mho' nyid zi anghoid.

⁷Ngoo gi" «Ngoo hid: moo: nyid nyid. Nga" da" shid re" re" da" jhoug" myeing" joem gi tarha" mougsoug" pug moo: bo jo.

⁸Nga" da" Mangsoo we"- nang myid vhoo: khyoo: ri koid wa ziri ngoo khayhi' vho: ngei nyid lha". Re" da" jhoug" myeing" jhoug" thui: joem ri nga" da" nheigloem: ung: khoug: moo ngoo xoin" to' ein: ngoo phoug tu" bye:.

⁹ASEING we" re" byumyu" yi da" meing: zoebphung: moo nang ngoonu" ri khyoid yu bye: da- hau: ngeibu: lu dang: gi ri ngoo tid kyoo" bye:. Ngoo hau: khyoo: ri khanham we' anoo: ayab, loo: za: tid kyo" nyid wa ziri nang se' nyid.

¹⁰Hau: khyoid khyi: yu da" lu dang: gi ngoonya: gung nyang: yhoem" too" wa zi anghoid. Re" da" dangsoo" khoin" yo' pang" thoug yu da" khyoo: ri re" byumyu" yi dangain" mo, da" meing: zoebphung: moo nang loem: lug da" khyoo: yo' geung: teung jhid khyeing: kang: khyeung: khoo: ri ngoo gi atid loo za: nyid wa zi anghoid.

¹¹ASEING we" ngoo ri nheug khyeug shoo" myen: nyid da" khyoo: nang khanham we' no: pyam wa anghoid: khyoo: ri ngoo se' nyid. Re" da" geung: teung jhed khyeing: kang: khyeing: yo' loem: loug khyoo: gi ngoo ri khanham we' gau: nyu: nhang: nyid wa.

¹²Ngoo gi nghab, loo aoung: da- yau: khe" kyi" khyeug khyoo: myoo" sho' lheung khoem too" shoug" su: nghoid. Ngoo gi lang" atho' oung: myang loo: sho' nga" yooboo joem gi ngoo ri myheug too" bye:. Hau: zigi nga" vhuloem mo xam: khaid joem tho' moo: je myo: jo, wigi nga" nheigloem: yoem: shoin: byug bye:.

¹³ASEING we" ngoo ri khyoid yu shi" we'. Ngoo ri: akhid" nyang: pang" thoug yu we'.

¹⁴Ngoo ri: said wa soin nyid bang: dangain" joem: lo" wigi zoid phang: lo" zi shoug" goo" baja". Nga" kyi" khyeug khyoo: yoomo gau yi nyid bang: gi nungthang khyoo: zuid phang: lo" wigi asho' ashid: zi shoug" goo" baja".

¹⁵Ngoo ri: juang" yi nyid bang: gi nyangnu" soem" joem: lo" khyoo: myonhoo: shoem: loo" baja".

¹⁶Re" jhang moo: ju" ri" mo, dangain" bang: gi vho: ngei ziyo' gau yi nyid goo" baja". Re" da" khyoid yu khyoo: ri ASEING gi khayhi' gyeing" gyi: sheung: jo, lha" ga: khanham we' tid nyid kho" wigi re" khyoid yu khyoo: ri dangain" mo, jeju" boin: so" nyid goo" baja".

¹⁷ASEING we" ngoo gi yoem: nu: lho: asho" ajhen: nghoid nyid. Nghoid loug we' nang gi ngoo ri to" myhed pyam nyid zi anghoid. Nang gi nga" khyoid yu su: yo' nga" Mangsoo nghoid. Ngoo ri: pang" thoug yu wa shid re" hain" hain: ju" ri" we'.