Read Lashi COUNG" NGHEI 41 Bible Online

COUNG" NGHEI 41 - Lashi bible

COUNG" NGHEI 41

¹[7] Sho" jhen: da" byu yi shid re" myid myoo: ung: bo loug nyid bang: gi ngilho' nyid. Nyangnu" yau: khe" kyi" khyeug nyid" ri ASEING gi nyangnu" ri pang" thoug yu wa zi nghoid.

²ASEING gi nyangnu" ri lhoug zung" goem coung: byid: ziyo' nyangnu" da" kangso' ri zoem: shoung: too" byid: wa zi nghoid. Nyang: gi mungdain: moo nyangnu" ri gau yi ngei pyoo: nhang: wa. Nyangnu" da" gyivoo joem lo, moo nyangnu" ri byid: pyam wa zi anghoid.

³Nyangnu" noo phyoo" shoug" nyid uri ASEING gi nyangnu" ri pang" thoug yu wa zi nghoid wigi nyangnu" ri yang" zain" khyoo: byid: loo wa zi nghoid.

⁴ASEING we" ngoo nang ri yooboo koid bye:- ngoo ri nheug khyeug yu wigi ngoo ri yang" zain" loo nhang: we" ein: wigi ngoo tid bye:.

⁵Nga" da" gyivoo joem gi nga" da" khyoo: ri akhyeung" khyo" tid go" nyid boem wigi nyangnu" gi ngoo shid: lang" byu yigi ngoo ri to" myhed pyam boem wa shid re" vho: ngei nyid ago".

⁶Nga" jang" moo: lhoung lam" ri" bang: gi nheigloem: yung" mo, anghoid. Nyangnu" gi nga" khyoo: yo' sen: da: age da" lu dang: ri zheung" young: to" lho: joyoo khyi, khang" moo" hau: khyoo: ri tid fu" sain" lo boem.

⁷Ngoo ri: ngheung" da" byu dangain" bang: gi nyangnu" nyang: cang" nga" khyoo: ri dang: so, so, go" nyid. Nyangnu" gi nga" khyoo: ri gye" akhyeung" khyo" myid thu nyid ago".

⁸Nyang: gi shid: noo no nyid wigi nya: yhoeb cuang mo khanham we' yo" too loo zi anghoid" ga: nyangnu" tid go" nyid.

⁹Ngoo ri: je nghe: khau: lho: ngoo yo' dage" voem: shoin" zo: da- nga" seing" tain" byencang" yi lang ngoo ri atoug" khyo" gyi dakoid lo.

¹⁰ASEING we" ngoo ri nheug khyeug yu lho: yang" zain" loo wa khyoo: ngoo ri doem kaid byid: we' houg: lang" nga" gyivoo joem ri latoo: doem yo" phug wa zi nghoid.

¹¹Nyangnu" gi ngoo ri yo" oung: loo" wa zi anghoid. Nang ngoo ri vho: ngei nyid zigi ngoo yo' se' loo wa zi nghoid.

¹²Deingmain" da" moo" ri ngoo zei: nyid yoomo nang ngoo ri pang" thoug yu wa zi nghoid. Nang gi ngoo ri nanya: shidkhoin" moo pyaid didu lhoug zung" nyid wa zi nghoid.

¹³Israela da" Mangsoo ASEING ri coung" nghei nyid we'. Akhid" mo wigi pyaid moo: too: moo coung" nghei nyid boem shang o". Amen Amen.