Read Lashi COUNG" NGHEI 42 Bible Online

COUNG" NGHEI 42 - Lashi bible

COUNG" NGHEI 42

¹[8] Xaid gi gyid jham" gyung: ri nheug nhei: nyid yhang: ti" Mangsoo we"- ngoo we' nang ri nheug nhei: nyid.

²Dadei nyid da" Mangsoo we"- ngoo nang ri gyid su' shed nyid. Ngoo gi re" da" shidkhoin" moo khanham ri she' yo" ju" re" wigi yo" coung" pid nyid wa lha".

³Ngoo gi nyid" ri myen" ri dangau nyid. Houg: yoomo ngoug byid gi nga" da" zoo: noem bue" nyid. «Re" da" Mangsoo khayoo: nyid la"» ga: wigi nga" gyivoo joem gi ayo, khang" moo ngoo ri damyed: nyid boem.

⁴Lai loo" bye: da" khyoo: joem ri ngoo myid yu" kaid uri nga" nheigloem: moo: atho' tid kougshu: nyid. Mangso yhoem: khyoo: byu phung: yi yo' dage" ngoo do, lo" uri gau yi da" byuphung: gi Mangsoo ri jikhoin" coung" nghei thui: yo' gau yi nyho: nyid boem wigi nyangnu" ri shu" do, lo" yu bye:.

⁵Ci: yoomo ngoo gi hid: yhi' gyeing" kougshu: nyid lha". Ngoo gi ciyoomo hid: yhi' gyeing" kyi" khyeug zi shoug" nyid lha". Ngoo gi Mangsoo moo: nheug byu nyid lho: nga" da" khyoid yu ASEING yo' nga" Mangsoo ri dalheung: doem coung" nghei wa nghoid.

⁶Ngoo gi goo" meing: khaid thu shau" da- he: jo yoo moo nga" nheigloem: gye" nge" nyid bye:. Hougsu" nyang: gi koug shu: being: mhoid joem ri nga" atho' moo: du" phyu" to" nyid bye:. Lhu: phyo' lhu: shoin' khyoo: gi gyid ji: zoo" yhang: ti" nga" shid moo: myeung nyid. Hau: zigi hermon boem yo' Miza boem mo wigi Yodan gyid lang khyoo: moug: goem: thui: yhang: ti" myeung gyoo' lo" da thui: yo' du nyid.

⁸ASEING gi nyid" ayo, moo nya: da" geung: teung jhed khyeing: kang: khyeing: ri toin" shed nyid baja". Houg: yoomo myen" ayo, moo ngoo gi jikhoin" yo' coung" nghei nyid wigi nga" kang so, ASEING Mangsoo ri akyu" mho' baja".

⁹Nang gi ci yoomo ngoo ri to" myhed pyam nyid lha". Nga" gyivoo joem akhyeung" da" khyoo: mo ngoo gi ci yoomo xo' phu" zoo: ca" wa lha" ein: wigi nga" da" goem loem Mangsoo ri ngoo myid: bye:.

¹⁰«Re" Mangsoo khayoo: nyid lha"» ga: wigi nyangnu" ngoo ri khanham we' damyed: nyid boem yoomo nyangnu" da" juang" yi da" kyi" khyeug ri kham' zo: nyid.

¹¹Ngoo gi ciyoomo- hid: yhi' gyeing" kougshu: nyid lha". Ngoo gi ciyoomo- hid: yhi' kyi" khyeug zi shoug" nyid lha". Ngoo gi Mangsoo moo: nheug byu nyid lho: nga" da" khyoid yu ASEING yo' nga" Mangsoo ri ngoo dalheung: dam coung" nghei wa.