Read Lashi COUNG" NGHEI 44 Bible Online

COUNG" NGHEI 44 - Lashi bible

COUNG" NGHEI 44

¹[10] O" Mangsoo we"- ngoonu" da" nu khyab, yo' hau: khyoo: ri shau" gyo: yu" boem bye:. Ngoonu" da" phoug" phyid" yi we' lid loo" bye: bidnyid joem ein: da- nyangnu" da" ayo, moo nang koid shug bye: moo" zeing ein: da-

²Mangsoo ano" da" byumyu" yiri nang khasu" khaid thu pyam bye: da" khyoo: yo' nyangnu" da" mougmyid moo: re" da" byumyu" yiri joyoo soin byid: bye: da" khyoo: gootu: byumyu" yi rigi nang khasu" shen: yhen byid: lho: re" da" byumyu" yi rigi nyid gi nyid di nhang: bye:.

³Re" da" byumyu" yigi he: mungdain: ri nyangnu" da" sham: yo' yoo" zain: oung: yu zi anghoid. Nyangnu" da" yoem: vhoo" yo' hau: ziri yo" yu zi anghoid. Hau: zigi re" da" yoem: so' yoomo we' re" da" athang agoin yoem: moo" yoomo we' nyangnu" ri toin" shed bye: ein: da" nang nyangnu" da" akhoug: moo: dage" nyid nyid da- nheugshid: nheugdeug khyoo: yoomo we' yo" seung: yu da" zi nghoid. Hau: zigi nyangnu" ri nang khayhi' jheddab nyid khyoo: toin" shed byid: nyid.

⁴Nang gi nga" khokham yo' nga" Mangsoo nghoid. Nang gi re" da" byumyu" yiri oung: doid lo" khyoo: ri byid: lho:

⁵Re ” da" yoem: so' khyo" ngoonu" gi ngoonu" da" gyivoo joem ri soem" joem: loo" nhang: bye:.

⁶Ngoo gi nga" lid: ri we: aloem- nga" sham: we' ngoo ri yo" khyoid yu zi anghoid.

⁷Nghoid loug we' nang gi ngoonu" ri gyivoo joem da" lo, mo yo" khyoid yu lho: ngoonu" ri ngheung" nyid bang: ri soem" joem: loo" nhang: abye:.

⁸Ngoonu" gi nang ri apyaid atoo: jeju" daboin: nyid boem wa zi nghoid.

⁹Nghoid loug we' akhid" nang ngoonu" ri she: pyam too" bye: ziyo' soem" loo" nhang: bye:. nang gi ngoonu" da" gyizoo: yi yo' dage" pui" khyoo: abo cang loo: nghoid da:.

¹⁰Nang gi ngoonu" ri ngoonu" da" gyivoo joem jang" mo wigi phang: thu loo" nhang: lho: nyangnu" gi ngoonu" da" ziyoo joem ri nyangnu" shid re phyo' yu nhang: pyam.

¹¹Yang joem ri yhang: ti" ngoonu" ri said pyam wa shid re" nang akhang" byid: pyam bye: ziyo' nang gi ngoonu" ri tungbau mungdain: khyoo: khaid sain' pyam byid: abye:.

¹²Re" byumyu" yigi phoug" dajhi' za: date: dab, lo yhang: ti" nang gi nyangnu" ri aphoug dajhi' za: yo' te: ung" byid: nyid.

¹³Ngoonu" da" yhoem: kyoo" cang" yigi nang ngoonu" ri khasu" koid nyid ziri myang pyam byid: yoomo nyangnu" gi ngoonu" ri yi foo: khyo" juang" yi nyid boem bye:.

¹⁴Sube" byumyu" yi da" mo, phung: gung moo nang gi ngoonu" ri yinoug tu pyam byid: joyoo koid pyam yoomo nyangnu" gi ngoonu" da" vhuloem ri: lhei, byid: wigi ngoonu" ri juang" yi gei sang: nyid boem.

¹⁵Ngoo gi khanham we' myonhoo: shoem: nyid ngoo gi khanham we' sho' dathu nyid.

¹⁶Nga" gyivoo joem yo' ngoo ri: ngheing" bang- juang" yi ziyo' aphoug" akhyoid koid mo, da" thui: ri shoug" gyoo: yoomo nghoid.

¹⁷Ngoonu" gi nang ri ato" myhed ziyo' ngoonu" ri nang too" byid: bye: da- dangsoo" khoin" joem ri we' a ein: phyo' boem rilang" hau: khyoo: dangain" gi ngoonu" moo: bue" lo nyid bye:.

¹⁸Ngoonu" gi nang moo dang: azoung" bang: anghoid. Re" da" amyeing" dang: joem ri atam" gyoo: bang: we' anghoid.

¹⁹Nghoid loug we' nang gi ngoonu" ri gougnyhoug joem da" mo, phung: moo pang" byu aboo loo: za: nyhid: kho' lho wigi no, thu: thang da" moug: coid khoug: moo nang ngoonu" ri she: pyam, to" abye:.

²⁰Ngoonu" gi ngoonu" da" Mangsoo ri noku coung" pid khyoo: ri no: pyam, lho: tungbau Mangsoo ri ngoonu" akyu" mho' nyid boem nghoid rigi

²¹Ngoonu" da" nheigloem: ung: khoug: moo: yhoem" to" da- myid soin: khyoo: joem ri nang si' byid: nyid yoomo nang gi hau: khyoo: ri deing" deing nyang: myang si' byid: wam: bye:.

²²Nghoid loug we' nang yoomo ngoonu" gi ayo, khang" moo said pyam zi shoug" nyid boem ziyo' zain: said pyam zi shoug" wa yang joem yhang: ti" ngoonu" we' shoug" nyid boem.

²³ASEING we" too' we'- nang cikoid yhoeb pyo: jo, lha". Re" da" gung ri nhau" too, re- ngoonu" ri apyaid atoo: moo ashe: pyam too!

²⁴Nang ciwim gi ngoonu" jang" moo gau" jo, lha". Ngoonu" da" phu" zo: khyoo: yo' kyi" khyeug khyoo: joem ri ato" myhed pyam.

²⁵Ngoonu" gi myid keing: doem: mo doin: khyoeb, to" zi shau" boem bye:. Ngoonu" gi soem" joem: jo, bye: yoomo myidzhoo" phei" tho' moo: dalu: leung nyid boem lo.

²⁶Ngoonu" ri pang" thoug wa shid re ri" we'. Re" da" geung: teung jhed khyeing: kang: khyeing: yoomo ngoonu" ri: khyoid yu we'.