Read Lashi COUNG" NGHEI 45 Bible Online

COUNG" NGHEI 45 - Lashi bible

COUNG" NGHEI 45

¹[11] Khokham pho, shid re" he: da" jikhoin" ri ngoo lhid" da" uri nga" nheigloem: ung: khoug: moo young" du da" dang: yo' byeung" jo. Gye" reung da" mougsoug" lhid" sara: phoo ci: da" mhug youg: yhang: ti" nga" da" yhoo: gi dang: zhoem tid wa zi jen" jen" nghoid nyid.

²Nang gi yug gi nu" yi moo gung du: young" thang su: nghoid bye:. Nang gi dang: khyoo" jang jang yo" tid su: nghoid bye:. Mangsoo gi nang ri khanham we' mainkaid byid: nyid bye:.

³Yoem: moo" bo da" Khokham phoo we' re" sham ri voin ri re,. Nang gi myonhoo: phung" yoeb yo' amyeing" akhang" yo' byeung" jo, su: nyang: nghoid bye:.

⁴Deingmain" ziyo' nyeung: veung" da" tarha" ri lhoug zung" zoore

⁵re" da" myoo: joem gi coin: zi nghoid wigi re" gyivoo yi da" nheigloem: khoin: jhung: ri beug kyang byid: nyid. Byumyu" yi we' re" da" khyid yang: moo: leung gyo" lo boem wa.

⁶Mangsoo nang ri byid: bye: da" mungdain: gi apyaid atoo: moo: dageung: teung jo, wa zi nghoid. Nang gi re" da" byumyu" yiri nyeung veung" da" tarha" yo' vhoebkhang" nyid wa zi nghoid wigi

⁷nang gi deingmain" da" khyoo: ri nang jheddab nyid lho: akhyeing" ashoeb da" moo" ce" ja: ri we' ngheung" nyid. Hougsu" nghoid yoomo Mangsoo re" da" Mangsoo gi nang ri khyen: yu lho: gootu: khokham hang" tho' moo: we' je" gau yi ngei pyo: da" khyoo: nang ri: foid shoin" byid: nyid.

⁸Re" da" byimi joem gi mura bain: soug joem yo' nam pyo: nyid wigi music phung: bang: gi xang: zei yo' mhoin" to" da" khokham khoo" moo: nang ri shapyoo: byid: nyid boem da:.

⁹Re" khokham khoo" mo zoomyi: yi moo khokham yi da" zoomyi: yi we' bo nyid boem ago". Re" zhungtang da" lo, yo shoid moo myo, yi lo" da" sheing: ziyo' lho, yhoung ci: da- khokham myhi' yab jo.

¹⁰Khokham pho, da" myhi' seig we' ngoo citid ziri tam" gyoo: we'. Re" da" byumyu" yi yo' re" da" seing" tain" bidnoem yiri to" myhed pyam we'.

¹¹Re" da" younglho' gungdu: yoeb bang gi khokham pho, da" nheigloem: ri lang: yu vho: ngei nhang: wa zi nghoid. Nyang: gi re" da" ASEING nghoid nyid yoomo nang gi nya: dang: ri tam" gyo: nyid ca.

¹²Turu byumyu" yigi nang ri jhungshug jhung: lang- re" byid: lo boem wa zi nghoid. Yoo" mo, di mo, we' re" da" myonhoo: sho lo boem wa zi nghoid.

¹³Khokham zoomyi: zoo: yigi khokham khoo" vang khoug: moo nyid. Nyang: gi khayhi' gyeing" young" lha. Nya: byisheing: gi sheing: khyeing: joem yo' yo, to".

¹⁴Vedvoo: aja: ja: yo' joeb da- byisheing: joem yo' lho, yhoung ci: da" myhi' seig ri khokham shidkhoin" khyoo: shu" yhe: lo" zi shoug" nyid. Myhi, seig da" dang: cang: myhi' joem we' bo cang lo" lho: khokham jhang khyoo: shu" vang lo" zi shoug" nyid boem.

¹⁵Gau yi ngeibu: ziyo' Nyangnu" re" lo boem lho: Khokham khoo" khyoo: vang lo" boem ago".

¹⁶Re" phoug" re" phyid" da" khokham azuang joem ri xo' kham: yu wa shid re" nga" da" khokham phoo we' nang moo: yug gi zoo: myoo" sho' khu: loo wa zi nghoid. Nang gi nyangnu" ri mougmyid gyab, goin" da" tho' moo vhoeb da" zoug: ludaid bui" nhang: wa.

¹⁷Nga" da" jihkoin" dang: joem gi re" da" myeing khyang" ri pyaid moo: too: moo bugthu sheing" jhu" nhang: wa zi yo' byu yugkhang" moo" gi nang ri pyaid moo: too: moo coung" nghei nyid boem wam bye: o".