Read Lashi COUNG" NGHEI 50 Bible Online

COUNG" NGHEI 50 - Lashi bible

COUNG" NGHEI 50

¹[15] Gyi: myhang: da" Mangsoo tid zigi bid thu' mo bidvang ju" sho' mougmyid gyab, goin" ri nyang: khe: nyid.

²Mangsoo gi nya: da" joeb byeung" young" du, jo voomoo" Ziun mo wigi thoin" pang byid: nyid.

³Ngoonu" da" Mangsoo gi re" lo nyid uri sam" zoo: ju" ri" zi anghoid. Nya: shidkhoin" moo: myiyham: dab nyid wigi nya: ayam' aqei: moo thain: da" uglid zeing hau, nyid.

⁴Nya: da" byumyu" yiri nyang:- tarha" dang: phyed zi shau" myang wa shid re" ASEING gi mougkhung: mougdi yo' mougmyid yoosoo" ri thang" cab koid wa ga: khe: nyid bye:.

⁵Xoin" to' zho" lho: ngoo yo' dang: theing go" too" bang- nga" da" nheigloem: zung" byumyu" yiri thang" cab koid wa ga: khe: nyid bye:.

⁶Mangsoo gi deing byeung" su: nghoid yoomo nyang: nyang: tarha" agyi nghoid nyid ziri mougkhung: mougdi gi tid fu" byid: nyid.

⁷Nga" da" byumyu" yi we' tam" gyoo: ge' ngoo dang: tid wa. Israela we' ngoo nang ri yooboo foin: da" sagse: kham' kyoo" ba. Ngoo gi Mangsoo- re" da" Mangsoo nghoid.

⁸Nang gi ngoo ri khanham we' re" da" joeb byeung" xoin" yo' myi nghi, xoin" ngoo ri to' byid: nyid yoomo ngoo nang ri gyikoid wa zi anghoid.

⁹Nghoid loug we' re" da" kyung mo nuloo: ri nghoid loug we' re" da" khyam: mo coidbaid joem ri we' ngoo avhoo.

¹⁰Siyoo sigam: moo: nyid da- gougnyhoug goug: doo: dangain" yo' bouggung khyeing" moin" moo: nyid da- gougnyhoug goug: doo: joem we' nga" zi nghoid.

¹¹Moug: moo: dang: da" ngho' dangain" yo' mhain" lham" jang: dam moo: dei nyid da" gougnyhoug dangain" we' nga" zi nghoid.

¹²Ngoo zooyoid nyid ri zoo: noem shid re" nang ri mho' wa zi anghoid. Khasu" wim ga: ri mougmyid gyab goin" yo' hougmoo: jo, moo: jo, gi nga" zi nghoid.

¹³Ngoo gi nu: joem da" shoo" zo: nyid la". Coidbaid joem da" suid" shoug nyid la".

¹⁴Jeju" boin: coung" ngei zigi Mangsoo ri: nghei" byid: da" re" xoin" nghoid baja". nang dangsoo" byid: to" zi dangain- gyi: myhang: Mangsoo ri byid: pyam we'.

¹⁵Yau: khe" zi shoug" nyid uri nang ngoo ri yoid we' ngoo gi nang ri khyoid khyu: yu wa zi nghoid. Houg: lang" nang gi ngoo ri coung" nghei byid: wa anghoid ga: tid.

¹⁶Nghoid loug we' Mangsoo gi akhyeung" su: rigi nang gi ci yoomo nga" da" Dang: theing khoin" ri yo" tid nyid wa la". nang gi ciwim wigi nga" da" dang: theing khoin" ri tid nyid wa lha".

¹⁷Ngoo so' koid so' soin da" dang: ri nang gi ngeug pyam lho: wigi nga" da" amyeing" dang: joem ri nang she: pyam nyid da:.

¹⁸Nang gi shoug" go" da- khoug" foeb yugkhang" mo" da" byencang" bue" lho: myilhoid lang lhoid bang: yo' dage- nang zoem" nyid yen" da:.

¹⁹Nang gi akhyeung" dang: tid wa shid re" khanham we' nhoid yid moo: bo jo, da:. Mhau' fain" da" dang: ri tid wa shid re" nang khanham we' anei" nyid nghoid da:.

²⁰Re" da" noug" shoin" mang: nhung" yiri yooboo foin: wa ziyo' Nyangnu" ri age khyo" myang wa shid re" we' nang jen" jen" nghoid.

²¹Hau: khyoo: dangain" ri nang koid lo yu" abye:- ngoo ce" dang: we' atid yoomo nang yhang: ti" nghoid ga: nang myid nyid da:. Nghoid loug we' akhid" koem gi ngoo nang ri jhau" shed byid: ziyo' nang ri hau: khyoo: bang bang tid kyoo" wa.

²²Ngoo ri: asi, goin koid su: nang we' he: da" dang: khoin" ri tam" gyo: yu" we'. Hougsu" anghoid rigi ngoo nanu" ri lhu: phyo' sain" pyam, byid: wam: bye:. Nang ri khyoid yu wa zi dayug we' nyid loo: wa zi anghoid.

²³Jeju" boin: so" khyoo: joem gi ngoo ri phoug" tab, ngi: shab xoin" nghoid. Nga" da" dang: tam" gyoo: bang: dangain" mo, ri ngoo gi gyeing" gyeing" nyang: khyoid yu wa zi nghoid.