Read Lashi COUNG" NGHEI 53 Bible Online

COUNG" NGHEI 53 - Lashi bible

COUNG" NGHEI 53

¹[18] Mangsoo anyid- ga: wigi koodoug: yigi nyangnu" da" nheigloem: koug: moo: datid nyid boem. Nyangnu" dangain" bang: gi yoem: zam: lo" boem ziyo' gyoug pho" moo" ri nyangnu" zei: abye: go". Hau: jo da" moo" ri zei: wa byu hang" we' anyid.

²Nyang: ri noku loem khoug: wa ziyo' phajhi" boo mo, hang" nghoid loug to' nyid nghoid rigi hau: ziri yu" wa shid re" Mangsoo gi mougkhung: mougdi mo wigi xangsu: byu yiri goeb yu" nyid.

³Nghoid loug we' nyangnu" dangain" bang: gi shoid vhang: boem abye: go". Hau: jo da" moo" ri zei: wa shid re" nyangnu" moo: dayug we' aboo nghoid ago". Gyeing" nyang: dayug we' anyid nghoid da:.

⁴Mangsoo gi «Nyangnu" ase' gyoo: go" la". He: da" akhyeing" ashoeb moo" zei: mo, ci" we' asi' bang: nghoid go" la". Nyangnu" gi nga" byumyu" yiri phyo zo: khyo" wigi nyid ago". Nga" jang" moo: khanham we' akyu" amho' yu" nghoid ago"» ga: wigi myid nyid boem.

⁵Houg: lang" nyangnu" gi shid phyang" khanham we' athoung" shoug" yu" shi" da- gyi: thang da" gyoug nain" ja: ri thoung" shoug" lo" boem wa nghoid. Khasu" wim ga: ri Mangsoo gi nya: byumyu" yi da" gyivoo joem shooyoug: shooyang joem ri lhu: sain" pyam byid: wa nghoid. Mangsoo gi nyangnu" ri he: gyang: pyam nyid yoomo Israela byumyu" yigi nyangnu" ri jhoid yo" oung: doid pyam wa zi nghoid.

⁶Israela byumyu" yi da" oung: doid lo" khyoo: gi Ziun mo ju" ri" wa shid re" ngoo khayhi' gyeing" akyu" mho' nyid lha". Mangsoo gi Israela byumyu" yiri dalheing: doem nyid gi nyid di nhang: lo ri nyangnu" gi khayhi' mo gau yi ngeibu: boem wa lha".