Read Lashi COUNG" NGHEI 55 Bible Online

COUNG" NGHEI 55 - Lashi bible

COUNG" NGHEI 55

¹[20] Mangsoo we"- nga" da" akyu" mho' dang: ri tam" gyoo: byid: we'. Ngoo mho' yoid uri myonhoo: goo" khyoo: alheung: loo.

²Ngoo ri: tam" gyo: lho: tu" byid: we'. Nga" da" myid myoo: ung: loug khyoo: joem moo ngoo myoung: dau myid.

³Nga" gyivoo joem kyug nhain' lo jang" moo ngoo gyoug nain" nyid. Akhyeing" ashoeb bang: da" doin: zeig zo: jang" moo ngoo gyau: moin" zi shoug" nyid. Nyangnu" gi ngoo ri pyi: sho: shen" yhen nyid ziyo' Nyangnu" gi ngoo ri nheug yo: lho: ngheung" nyid ago".

⁴Shid: no da" gyoug dain' khyoo: gi ngoo ri nhe, mhoin' to" lho: ngoo gi gyoug nain" nyid.

⁵Ngoo gi gyoug dain khyoo: ze wigi myheug lhoung to" zi shoug" nyid. Ngoo gi byoodain byooshoo" yo' zeung" lhoung" pyam zi shoug" bye:.

⁶Pheing" kyoug" su" dung dab, wa ziri ngoo myid ngei nyid. Hougsu" nghoid ri ngoo gi vi: khyoo: dang: lo" lho: doug no: nyid nau.

⁷Ngoo moug: vi: khyoo: dang: lo" wigi siyoo moo: nyid nyid, wa.

⁸Ngoo gi lid doin: zoo" yo' uglid zeing mo loid loo" wa da" nga" khau: nghi: joyoo myab, myab, shoo: wa nghoid.

⁹ASEING we"- nga" gyivoo joem tid nyid da" dang: ri lhu: lheug pyam byid: we'. Voomoo" khoug: moo: athoug" akhyoug: anhung akhoid khyoo: ri ngoo myang.

¹⁰Hau: voomoo" moo nyid" ri myen" ri lheung khoem to" wigi hau: voomoo" ri yooboo shoid vhang: khyoo: yo' myid myoo: ung: loug khyoo: byeung" jo.

¹¹Joyoo khyi khang" moo" moo byo, yoin" khyoo: bue" nyid wigi fu" moo" khyoo: joem moo zeig zoo: ung: zo: ziyo' mhoug zoo: fain" zoo: mo, byeung" jo.

¹²Gyivoo joem ngoo ri gei sang: juang" yi nyid boem nghoid rigi ngoo hau: khyoo: ri yo" kham' zeing: wa. Nga" gyivoo joem gi nga" da" atho' moo phau: khuang nghoid boin: nyid boem rigi nya: jang" mo ngoo yo" phang: gau" byug wa zi nghoid.

¹³Nghoid loug we' hau: khyoo: gi nang nga" bidnoem phoo nga" luzoem" cang" yo' nga" seing" tain" byumyu" cang" nghoid nyid.

¹⁴Nga" eig yug nyang: cang" dagung dashoo" lhoung doem go" lho: Noku Yhoem: Moo" khoug: moo: dage" coung" pid loo wa.

¹⁵Nga" gyivoo joem gi nyangnu" da" ayo, aju" shi" ri shid: doem lo" boem goo" baja". Nyangnu" gi moo: vo, moug: moo: adei phab phab gyoo" lo" boem goo" baja". Hau: akhyeing" ashoeb khyoo: gi nyangnu" da" yoem: yo' nyangnu" da" nheigloem: moo: bo jo.

¹⁶Nghoid loug we' pang" thoug yu wa shid re" ngoo gi ASEING Mangsoo ri mho' yoid wigi nyang: gi ngoo ri khyoid khyi: yu wa zi nghoid.

¹⁷Nab soin: ayo, nyid" khyoug ayo- myen" mo" ayo, joem moo nga" da" mho' yoid ziyo' nookyeing" thui: gi nya: jang" moo: kyang ju" do, lo" wigi nyang: gi nga" thui: ri tam" gyoo: byid: wa zi nghoid.

¹⁸Gyivoo joem myoo" sho mo, yo' ngoo zain: go" da" meing: zain: jang: moo nyang: gi ngoo ri goug: goug: nyu: nyu: doem shu" tau" loo wa nghoid.

¹⁹Goonham gooco' pyaid mo wigi vhoebkhang" nyid da" Mangsoo gi nga" dang: ri tam" gyoo: byid: lho: wigi nyangnu" ri soem" joem: loo" nhang: wa zi nghoid.

²⁰Nga" da" goonham, mo byencang" phoo gi nya: bidnoem yiri thougtheung wigi nya: da" dang: theing khoin" ri we phyo' pyam bye:.

²¹Nya: da" nhoid khoin" thui: joem gi tho" baid tho moo: je jhoid nyid nghoid loug we' nya: nheigloem: ung: khoug: moo: gi ngheung" nyid. Nya: dang: gi shooxu: yhang: ti" yhui nyid loug we' tho' da" lhab' sham: yhang: ti" yham" phyed lo.

²²Re" da" kyi" khyeug yau: khe" khyoo: ASEING moo: ab too" we'. Nyang: gi nang ri goem loem byid: zi nghoid. Deung byeung" bang: ri nyang: gi khanham we' soem" joem: loo" nhang: wa zi anghoid.

²³Nghoid loug we' Mangsoo we"- nang gi byu said mo, yo mhau, fain" da" byu yi rigi nyangnu" da" pyaid agung lang" ayo" kho' shi" ri nyangnu" da" loeb duang: khuang" khyoo: khyo' pyam wa zi nghoid. Ngoo koem gi nang ri loem khau nyid wa zi nghoid.