Read Lashi COUNG" NGHEI 59 Bible Online

COUNG" NGHEI 59 - Lashi bible

COUNG" NGHEI 59

¹[24] Nga" Mangsoo we"- nga" gyivoo joem lo, mo ngoo ri: khyoid yu we'. Ngoo ri: zain: loo mo, da" lo, mo we' ngoo ri goem loem yu we'.

²Akhyeing" ashoeb, bang: da" lo, mo we' ngoo ri goem loem yu we'. Byu said da" moo" zei: bang: lo, mo we' ngoo ri khyoid khyi: yu we'.

³Yu" ge' Nyangnu" gi ngoo ri said pyam wa shid re" lang" nyid boem. Nheig khyeug shoomyen: ase' da" byu yigi ngoo ri lhoem: thougtheung wa shid mo zeung: foem: nyid ago". Hougsu" koid nyid boem zigi ngoo zei: shoid pyam da" shoid vhang: khyoo: yo' yooboo joem yoomo we' anghoid.

⁴ASEING we"- nyangnu" gi nyangnu" da" joyoo moo meing: zain: wa shid re" jen" jen" lang" nyid khyoo: gi nga" shoid vhang: khyoo: ce ja: yoomo we' anghoid.

⁵Gyi: myhang: su: ASEING Mangsoo we"- ngoo ri pang" yu wa ri" we'. Israela Mangsoo we"- nanya: gung nyang: yu" yu" we' to' wigi Mangsoo ri aloem mo, ri shen" yhen we'.

⁶Nyangnu" gi myen" ri doem tau" lo wigi lakhuid" joem yhang: ti" nyeung xue: ci: lho: voomoo" khoug: moo: nyangnu" lam" lheung: yen" boem ago".

⁷Nyangnu" da" aphoug" akhyoid koid ziyo' kyug nhain' nyid dang: ri tam" gyoo: byid: we'. Nyangnu" da" nhoid khoug: mo yhoo: joem gi sham: yhang: ti" tho' nyid boem wigi nyangnu" tid sang: da" dang: joem ri hang" we' ashoug" gyoo: ga: nyangnu" gi zheung: myid nyid boem.

⁸Nghoid loug we' ASEING we" nang gi nyangnu" ri yi juang" pyam nyid da:. Mangsoo ri aloem mo, ri we' nang nhoomyeing myeung pyam byid: nyid da:.

⁹Ngoo gi re" da" yoem: so' moo nheugshid: nheugdeug nyid. Mangsoo we"- nang gi nga" da" khoug: nghe: lug ug nghoid nyid.

¹⁰Nga" Mangsoo gi ngoo ri jheddab nyid wigi nga" jang" moo: ju" ri" wa nghoid. Nga" gyivoo joem soem" lo" khyoo: nyang: ngoo ri myang nhang: wa zi nghoid.

¹¹Mangsoo we"- nyangnu" ri asaid pyam. Hougsu" anghoid ri nga" byumyu" yi to" myhed pyam boem wa. Ngoonu" ri goem loem byid: da" ASEING we" re" yoem: vhoo" yo' nyangnu" ri khaid sain" pyam wigi nyangnu" ri oung: pyam we'.

¹²Yooboo joem gi nyangnu" da nhoid yid joem moo: bo jo, wigi nyangnu" tid sang: da" dang: khoin" dangain" we' yooboo za: dazheung: nghoid nyid. Nyangnu" da" phau: khaung khyoo: moo: myi" goo" baja". Nyangnu" gi nheing" myeing" nheing" thui: yo' mhau, fain" vo da" dang: za: tid nyid boem yoomo

¹³re" da" nheug yo: ziyo' nyangnu" ri phyo' shoin' pyam we'. Nyangnu" ri shang" shang phyo' shoin' pyam we'. Houg: lang" Mangsoo gi Israela ri vhoebkhang" nyid khyoo: gi byu yugkhang" moo" se' lo wigi nya: da" vhoebkhang" khyoo: gi moug: gyab goin" moo je" byeung" lo" khyoo: ri we' yugkhang" moo" se' lo" boem wa nghoid.

¹⁴Nga" da" gyivoo joem gi myen" ayo, ri doem tau" lo" lho: lakhuid" su" myeing myhu" lho: voomoo" khoug: moo: nyangnu" lam" lheung: yen" goo" baja".

¹⁵Nyangnu" gi zoo: noem gyi: sho' ashoug" zo: boem yoomo myeung yen" wigi zoo: noem sho: lheung: yen" da" lakhuid" joem yo' du nyid.

¹⁶Nghoid loug we' re" yoem: zeing so, mo" khyoo: ri ngoo gi jikhoin" yo' coung" nghei nyid wa. Re" da" geung: teung jhed khyeing: kang: khyeing: ri nab soin: ayo, khang" moo" moo ngoo thui: zeing yo' jihkoin" nyid wa. Nang gi nga" da" phang: khoug: jang: bue" jo, wigi ngoo yau: khi" zi shoug" nyid ayo, moo gau: da" khoug: loo joyoo nghoid.

¹⁷Nga" da" goem loem su:- nang ri ngoo coung" nghei nyid wa. Mangsoo gi nga" da" phang: khoug: jang nghoid nyid ziyo' ngoo ri jheddab da" Mangsoo we' nghoid nyid.