Read Lashi COUNG" NGHEI 6 Bible Online

COUNG" NGHEI 6 - Lashi bible

COUNG" NGHEI 6

¹O" ASEING we" ngoo ri nheug yo: lho: ajhau" mho' nyid loo. Nang nheug yo: ziyo' ngoo ri yooboo dam akaid nyid.

²O" ASEING ngoo gi myoung: dau yoem: nu: su: nghoid nyid wigi ngoo ri nheig khyeug shoomyen: shi" we'. Yoem: dajhi' we' aboo loo: yoomo ngoo ri yoem: byid: shi" we'.

³Ngoo gi nga" da" gung goin" moo atho' tid loo sho yau: khi" kyi" khyeug nyid bye:. O" ASEING we" nang ngoo ri pang" yu wa ziri khanham ju" sho' lang" nyid wa lha".

⁴ASEING we" ju" gyo" lo lho: ngoo ri khyoid yu we' re" da" jheddab nheug khyeug ziyo' ngoo ri shid: gyoin mo khyoid khyu: yu we'.

⁵Moovo moug: moo: gi nang ri myid boin: bang: hang" we anyid. Hau" joyoo moo: hang" we' nang ri ayo" coung" nghei loo.

⁶Ngoo gi myid myoo: ung: loug kyi" khyeug nyid yoomo myen khang" myen ngoo ngau wigi nga" yhoeb yoo deug bye:. Nga" ngoug byid wigi vhu" khug yoem: bye:.

⁷Gyivoo joem koid yoomo ngoo ngau wigi nga" myojid" yam: bu" jo, lho: yu" ri we' myo, thoeb byug bye:.

⁸Akhyeung" bang: nanu" nga" jang" mo thu loo" ge'. ASEING gi nga" ngougmyeing" shoo" thui: ri tam" gyo: nyid.

⁹Pang" thug byid: wa shid re" ngoo mho' yoid thui: ri shoug" gyoo: byid: yoomo nga" akyu" mho' dang: ri nyang: tam: gyoo: byid:.

¹⁰Nga" da" gyivoo dangain" bang: gi soem" joem: gyo" lo" boem bye: yoomo sho' gye" thu boem wam: bye:. Nyangnu" gi dalheung: dam, abyoo asain" koin" thu pyam zi shau" boem wa nghoid.