Read Lashi COUNG" NGHEI 61 Bible Online

COUNG" NGHEI 61 - Lashi bible

COUNG" NGHEI 61

¹[26] Mangsoo we"- nga" ngoug thui: ri gyoo: byid: we' nga" da" akyu" mho' dang: ri: tam" gyoo: byid: we'.

²Yhoem: yo' ve: gang: jo, wigi nheigloem: thang nyid uri ngoo nang ri yoid nyid. Ngoo ri: gau: nyu: phang: khoug: jang: khyoo: shu" loo" we'.

³Khasu" wim gari nang gi ngoo ri lhoug zung" su: yo' gyivoo joem ri lhoem: yo" thougtheung su:- nga" da" geung: teung theung shang" joyoo nghoid nyid.

⁴Nga" da" pyaid goin" re" da" gyeung" shang: joyoo mo ngoo ri nyid nhang: we'. Re" da" dung soo" khoug: moo ngoo ri gau: nyu: nhang: we'.

⁵Mangsoo we"- nang gi nga" da" dang: theing khoin" joem ri shoug" gyoo: bye:. Nang ri phoug" tab ngi shab mo, ri byid: da" agyid asoo: joem nang gi: ngoo ri byid: abye:.

⁶Khokham pho, da" apyaid ri zain nyid myoo" sho' lung: byid: shi" we'. Nyang: ri xo' loo: xo' kangso' dei nyid nhang: we'.

⁷Mangsoo we"- re" da" shidkhoin" moo nyang: gi apyaid atoo: davhoeb khang" nyid baja". Re" da" geung: teung jhed khyeing: kang: khyeing: yo' nheigloem: zoung" khyoo: khyo" wigi nyang: ri goem loem byid nyid baja".

⁸Houg: yoomo ngoo dang: theing byid: to" ziyo' dakhyoo" ti" nang ri nyid khang" moo" xoin" ngei" byid: nyid wigi nang ri khanham we' jikhoin" yo' coung" nghei byid: nyid wa nghoid.