Read Lashi COUNG" NGHEI 65 Bible Online

COUNG" NGHEI 65 - Lashi bible

COUNG" NGHEI 65

¹[29] Mangsoo we"- Ziun moo: nang gi: ngoonu" da" coung" nghei khyoo: kham: yu moin: su: nghoid. Nang ri byid: to" da" dang: thang" cab, ri we' ngoonu" cang pyeung nyid zi nghoid.

²Khasu" wim gari nang gi ngoonu" da" mho' yoid khyoo: ri tu" byid: bye:. Ngoonu" zei: shoid pyam bye: da" yooboo joem ri joyoo khyi, khang" moo" mo byumyu" acang: joeb bang: gi re" jang" moo: ju" re" boem wa zi nghoid.

³Ngoonu" shoid vhang: da" yooboo joem gi ngoonu" ri soem" joem: loo" nhang: pyam nghoid loug we' nang gi hau: khyoo: ri yooboo khyoid pyam byid: nyid.

⁴Nang khyen: yu lho:- re" da" gyeung" shang: joyoo mo: nyid wa shid re" nang shu" loo mo, gi ngilho' nyid. Re" da" gyeung" shang: Noku Yhoem: Moo" mainkaid jeju" joem- re" da" yhoem: mo ge lho, khyoo: joem yo' ngoonu" gi nheugshid: nheugdeug nyid boem wam: bye:.

⁵Nang gi ngoonu" ri oung: doid loo" nhang: khyo" ngoonu" ri tu" byid: nyid lho: ngoonu" ri khyoid yu wa da- mau" pho" moo" zeing: ri zei: byid: nyid bye:. Moug: gyab, goin" yo' panglai: kyo: da" joyoo loem: khang" moo" mo byumyu" yigi nang ri loem khau: nyid.

⁶Re" da" yoem: moo" yo' boem joem ri nya: da" joyoo moo: zhoug to" wigi re" da" athang agoin myonhoo: phung" yoeb zeing ri toin" shed nyid da:.

⁷Nang gi panglai: beung: mhoid baid myheung da" thui: yo' gyid ji: zoo" yi da" myeung fu: thui: ri tam" loo" nhang: nyid. Nang gi mung" byu yi da" myeung fu: thui: ri tam" loo" nhang: nyid.

⁸Re" da" moo" zoo" joem gi mougmyid joyoo lo" thang da" dashoid mo zi dashoid khyoo: ju" loo" sho' gau yi ngeibu: phau: nyho: khyoo: ri ci: loo" byid: nyid. Nang koid shoug da" nghoid thang khyoo: joem yoomo moug: gyab, goin" mau" fo, gyoug phau" nyid boem.

⁹Nang gi myidjang shid re" moug: ri voo nhang: khyo" wigi myid jang: ri yu" goin coung: nyid khyoo: ri toin" shed nyid. Nang gi hau: ziri yo" loo de, loo nhang: ziyo' myid xu: ri byeung" deung loo nhang:. Gyidzoo gyidzeing joem ri nang byeung" jo, nhang: wigi myidjang moo gug zoo: meiloem: joem yo' nang youg byeung" jo, nhang:. Hau: gu: gi nang nyheung to" ziza: nghoid nyid.

¹⁰Phoug sho" to" da" khyam: joem moo moug: ri agoin' ayu: nang voo nhang: nyid wigi zhoo" khi' joem ri gyid yo' deug byi loo" nhang: nyid. Myid xu: khi, joem gi moug: vo, nyhoin" byid: ziyo' hau: jang" mo shivoo: shiloem, joem ri nang youg gyi: loo nhang: nyid.

¹¹Nang gi gi koid byid: nyid yoomo shoug" shab yham" yu da" gug zoo meiloem: joem gi khamyhoo, myo: jo, boem lha". Nang so" ju" lo" da" joyoo khyi, khang" moo" moo athang agoin myo: loug loo nhang: nyid.

¹²Mhain" nu" jang: moo gougnyhoug daphung: yo' daphung: byeung" jo, wigi boug zoin" joem moo: we' gau yi ziyo' byeung" jo.

¹³Pa: dam moo: we' yang phung: joem yo' byeung" jo, wigi koo lhang joem moo: we' gug phyu: gug ni yo' byeung" jo. Jo, moo: jo, ziyoo dangain" gi nyho: phau: gau yi jikhoin" thui: yo' coung" nghei jikhoin" khoin" nyid boem.