Read Lashi COUNG" NGHEI 66 Bible Online

COUNG" NGHEI 66 - Lashi bible

COUNG" NGHEI 66

¹[30] Byumyu" yi bain' sho' bang: we"- Mangsoo ri gau yi nyho: phau: ziyo' coung" byid: ge'.

²Nya: myeing khyang" da" myonhoo: phung" yoeb ri coung" nghei nyid ge'. Myonhoo: ngi bo da" jikhoin" dang: yo' nyang: ri khoin" ge'.

³Nang koid da" moo" zoo" joem gi khayhi' mau" pho" khyoo: nghoid lha". Nang ci: da" zoug: myeing" yoem: vhoo" gi yoem: so' gye" boo yoomo Re" gyivoo joem gi re" shid moo: gyoug nain" zoore dagoeb, jo, lo: boem.

⁴Mougmyid tho' moo: nghe: khau: nyid da" byu yugkhang" moo" gi nang ri noku loem khau: lo boem wa nghoid. nang yo' re" myeing khyang" ri nyangnu" jikhoin" yo' coung" nghei nyid boem.

⁵Mangsoo nyang: koid shug bye: da" moo" zoo" yo' byu xangsu: yi da" agyoo: moo nya: da" mau" pho" moo" zoo" joem ri re" wigi yu" yu" we'.

⁶Nyang: gi panglai: ri kyug kyiri" da" tunggung bui" nhang: pyam lho: ngoonu" da" phoug" phyid" yigi hau: gyid lang moo: khyid: khyo" yo" so" lid: lo" boem bye:. Hau: joyoo moo nyang: koid shug bye: moo" zoo" joem yoomo ngoonu" gi gye" gau yi ngeibu: boem bye:.

⁷Re" athang agoin da" yoem: moo" yo' pyaid moo: too: moo: davhoeb khang" nyid wigi byumyu" ja: khang" moo' ri nyang: dayu" zhoug to". Nyang: ri hang" we' ayo" thougtheung boem.

⁸Byumyu" yi dangain" mo, we' yha" da" Mangsoo ri coung" byid: we'. Nanu" da" coung" nghei jikhoin" thui: ri shoug gyoo: nhang: we'.

⁹Nyang: gi nyhang" ri dei nyid nhang: lho: ngoonu" agoin: joem: gyo" loo" wa shid mo nyang: akhang" byid: wa zi anghoid.

¹⁰Mangsoo we"- nang gi myid: wigi ngei ri shau, kyeung yu" yhang: ti" ngoonu" ri kyeung yu" nyid da- nang gi ngoonu" ri hougsu" bain kyeung yu" abye:.

¹¹nang gi ngoonu" ri lhid moo: myi" nhang: wigi ngoonu" da" seing" khung: tho' moo lid: da" yoovoin' ri ki" byid: da:.

¹²Ngoonu" da" gyivoo joem ri nang ngoonu" da" atho' moo: nang: nhang: wigi ngoonu" gi myigyi gyidgyi ri- thoung" shau" lid lo yu" bye:. Nghoid loug we' akhid" koem gi nang ngoonu" da" goem loem joyoo khyoo: shu" lo" nyid abye:.

¹³Ngoo gi re" yhoem: khyoo: myi: nghe' xoin" ri ci: ri" wa zi nghoid. Ngoo dang: theing to" ziyo' dakhyoo" ti" nang ri xoin" to' byid: wa zi nghoid.

¹⁴Ngoo yau: khi" zi shoug" nyid uri ngoo nang ri tid kyo" lid loo bye: ziyo' dakhyoo" ti" ngoo nang ri byid: wa nghoid.

¹⁵Ngoo gi phoin: tho' moo myinghi, xoin" to' wa shid re" yang joem ri: to' byid: wa zi nghoid. Nu: jung joem yo' coidbaid ri we' to' byid: wa zi nghoid. Hougsu" nghe to' byid: da" myikhoug" gi mougkhung: khyoo: ju" do, loo" wa.

¹⁶Mangsoo ri gyoug phoug" mo, dangain" bang: we' re" tam" gyo: yu" we'. Nyang: nga" shid re" koid shug bye: da" moo" zoo" joem nang ri ngoo tid kyoo" wa.

¹⁷Pang" thoug yu wa shid re" ngoo nyang: ri yoid bye:. Ngoo nyang: ri lidjhoem" jihkoin" joem yo" coung" byid: bye:.

¹⁸Nga" yooboo joem ri ngoo cishu: anhang: pyam nghoid rigi ASEING ngoo ri tam" gyoo: byid: wa zi anghoid.

¹⁹Nghoid loug we' Mangsoo gi ngoo mho' yoid dang: thui: joem ri gyeing" nyang: shoug" gyoo: bye:. Nga" da" akyu" mho' dang: ri we' nyang: tam" gyoo: byid: bye:.

²⁰Nyang: gi nga" akyu" mho' dang: thui: joem ri angeug pyam byid: ziyo' nyang: da" geung: teung jhed khyeing: kang: khyeing nga" jang" mo ayoeb, yu byid: yoomo ngoo Mangsoo ri: coung" nghei nyid.