Read Lashi COUNG" NGHEI 68 Bible Online

COUNG" NGHEI 68 - Lashi bible

COUNG" NGHEI 68

¹[32] Mangsoo gi to' lo lho: nya: gyivoo joem ri khaid sain" pyam bye:. Nyang: ri ngheung" nyid bang: soem" lo" ziyo' phang: lo" byoug boem abye: go".

²Myikhoug" thu' bei: lo" yhang: ti"- nyang: gi nyangnu" ri koin" thu pyam bye:. Byoomain" gi myikhyoem yam' moo: yau, yu: lo" yhang: ti" akhyeung" bang: gi Mangso shidkhoin" mo byo, yoin" lo" byoug ago".

³Nghoid loug we' deing byeung" bang: gi gau, yi lho: nya: shidkhoin" moo ngei bu: nyid boem.

⁴Mangsoo ri coung" byid: ge'. Nya: myeing khyang" ri nghei byid: ge'. Jhoemmoug" tho' moo: zhung: su: shid re" khyoo: nyheing byid: ge'. Nya: shidkhoin" moo: gau, yi ngei bu: nyid ge'.

⁵Mangsoo gi nya: da" gyeung" shang: Noku Yhoem: Moo" khoug: moo: nyid lho: cougzoo: cougmoo" yiri goin coung: lhoug zung" nyid.

⁶Nheug kyoo" nheuggyam wim nyid su: ri nyid wa joyoo yhoem: ri soin byid: nyid wigi thung: loung" jo, mo, gau yi loid byoin da" akhang" yo" loo wa shid re" nyang: shu" vhu" she: nyid. Nghoid loug we' thougtheung gyi koid nyid mo, ri koem gi kyug kyiri" da" mougmyid moo: shoug" nyid boem wa zi nghoid.

⁷Mangsoo we"- re" byumyu" yiri nang shu" vhu" she: lo wigi siyoo khoug: khyo" shu" phyed lid lo da" uri

⁸Mougmyid gi nain" lho: mougkhung: gi moug: ri vo, khyo kaid. Khasu" wim gari Sina boem da" Mangsoo- Israela da" Mangsoo ju" gyo" loo yoomo nghoid.

⁹Nang gi moug: ri agoin' ayu: vo khyo' kaid wigi re" da" kyug byug bye: mougmyid ri doem joem: to' loo nhang:.

¹⁰Re" da" mung" byu yigi hau: da" joyoo moo: yhoem: joem gi asho" ajhen: bang: shid mo nyheung byid: nyid.

¹¹ASEING gi mungdang: tarha" ri byid: kaid ziyo' myi yi: yi myoo" sho' bang- hau: lu dang: ri voin, so" yen".

¹²«Khokham yi yo' nyangnu" da" gyiphung yi phang: lo" byoug boem abye:. Yhoem: moo: nyid da" myiyi: yigi ngei yo' thoeb pyam lho: dung soo" joem moo: gi sheing: gyeing" yo' doug bang jo, da" pheing" kyoug" lhoo: lanyhoeb joem ri gam yu ago".

¹³(Nyangnu" mo dayham" bang: gi ci: yoomo meing: zain: nyid da" bidnyid moo yang khyam: joem cang nyid nyid boem la".)

¹⁴Gyi: myhang: da" Mangsoo gi khokham joem ri Zalmon boem khyoo: kaid sain" kaid uri nyang: gi hau: joyoo moo gyu: khyoo, nhang: nyid.

¹⁵Bashan boem gi gye" gyi: zi nghoid wigi boem phyoo" myoo" sho' loem: bo da" boem nghoid nhung.

¹⁶Gyi: myhang: thang boem phyoo" joem mo wigi Mangsoo nyid wa ga: khyen: yu to" da" boem ri cikoid nang yu" juang" nyid lha". ASEING gi hau: joyoo moo apyaid atoo: danyid nyid wa zi nghoid.

¹⁷ASEING gi khyeing" moin myo: da yoem: bo da" gyi myang: rheing" joem yo' ASEING gi Sina boem mo wigi gyeung" shang: joyoo khyoo: gyoo" lo.

¹⁸Gyipui" mo myheug lo da" byu yi myoo" sho' yo' hau: myhang: da" boem khyoo: nyang: do' lo" nyid. Nyang: gi tu: lhoin" da" byu yi jang" mo jhungshug joem ri lhoem: yu to". ASEING Mangsoo gi hau: joyoo moo: danyid nyid wa nghoid.

¹⁹Yha" da" yoovoin' ri nyid" khang" moo" bo voin byid: nyid da- ASEING ri coung" byid: we'. Nyang: gi nyhang" ri khyoid yu da" Mangsoo nghoid nyid.

²⁰Yha" da" Mangsoo gi khyoid yu da" Mangsoo nyang: nghoid bye:. Nyang: gi ASEING nghoid. Shid: gyoin' noogyoin' mo khyoid khyi: yu da- yha" ASEING nyang: nghoid bye:.

²¹Yooboo khyoo: moo: jhen" yhe: lo" da- nya: gyivoo joem da" vhuloem ri Mangsoo gi gyeing" nyang: baid khyoeb pyam byid: wa zi nghoid.

²²ASEING gi «Re" da" gyivoo joem ri ngoo Bashan mo doem khe: tau" yu wa zi nghoid. Nammugdara da" no, thang joyoo moo we' ngoo nyangnu" ri khe tau" yu wa zi nghoid.

²³Hougsu" wigi nyangnu" da" suid" moo nang nang: lid loo" wa ziyo' re" lakhuid" joem gi vho: myhoo' yo" shug goo" baja"» ga: tid.

²⁴Mangsoo we"- nga" da" khokham Mangsoo gi nya: gyeung" shang: da" joyoo khyoo: oung: doid lo" ziyo' thoid yhe: lo" ziri dangain" mo, coem myang nyid boem.

²⁵Jikhoin" khoin" bang: gi shid khyoo: yhe: lo" wigi music phung: gi thang: moo: cang lho: agung moo: gi jhabceing baid da" zoomyi: yi cang nyid boem.

²⁶Nya: mung" byu yi da" zoebphung: moo Mangsoo ri coung" byid: we'. Yaku da" akung: ako' dangain" bang: we" ASEING ri coung" ge'.

²⁷Zoo thang nghoid da" Benyamin akung: bang: shid khyoo: yhe: lo" lho: hau: thang: moo: Yuda vhujhung: yi yo' Nyangnu" da" mo, phung: zeing- Zebulun yo' Nabthali da" vhujhung: yi xo' lho: cang lo" boem wa zi nghoid.

²⁸Mangsoo we"- ngoonu" ri nang ci: yhung: byid: we' ngoonu" shid re" nang ri jhungshug re" byid: boem bye:.

²⁹Yerusalem re" noku yhoem: mo" khoug: moo khokham yigi nang ri jhungshug re" byid: boem bye:.

³⁰Gyidpheing" pa: mo kyang: da" gougnyhoug goug: doo: ein: da" Egutu ri nang gyikoid we'- nujung loo: joem yo' nyangnu" da" nujung bam: joem ein: da" byumyu" joem gi nang ri poid thug coem thoug wigi nyangnu" da" ngei thung: ci: lho: lo pid da" mung" byu yiri lhu: sain" pyam we'.

³¹Egutu meing: mo mung" lagyoo: yi ju" re" boem wa. Etiopi byu yi we' nyangnu" da" lo, tu: lho: Mangsoo ri akyu" mho' boem wa.

³²Moug: gyab, mo mungdain: joem we' Mangsoo ri coung" byid: ge'. ASEING ri coung" nghei nyid ge'.

³³Goonham gooco' mo wigi Mougkhung: moo: zhoung: jo, su: ri phung bo da" thui: zeing yo' nyho: kaid da" nya: thui: ri tam" gyoo: ge'.

³⁴Mangso yoem so, yo' koid da" moo" zoo" ri tid fu" ge'. Nya: da" myonhoo: phung" yoeb gi Israela byumyu" yi da" atho' moo dajo, jo.

³⁵Nya: da" gyeung" shang: joyoo mo wigi re" lo da" Israela Mangsoo gi khayhi' gyeing" gyoug phoug" gi su: nghoid lha". Nyang: gi nya: mung" byu yiri yoem: vhoo" yo' yoem: so' byid: nyid. Mangsoo ri coung" nghei nyid ge' o".