Read Lashi COUNG" NGHEI 69 Bible Online

COUNG" NGHEI 69 - Lashi bible

COUNG" NGHEI 69

¹[33] O" Mangso ngoonu" ri khyoid yu we'. Gyid gi nga" leung zeing: ju" sho' nhau, do loo bye:.

²Ngoo gi no, da" thoem" boeb, moo: noeb lo" nyid wigi hau: joyoo moo nang: theing wa thain: da" myidzhoo" ajo. No, da" gyid khoug: khyoo: ngoo noeb vang lo" nyid wigi beung: mhoid joem gi ngoo ri se" shid: nhang: wa soin, lo nyid.

³Ngoo gi pang" thoug yu boem wa shid re" nyho: yoid, wim" yoomo myoung: dau lo ziyo' nga" khyung" kang: we' noo bye:. nang pang" thoug yu wa ziri yu" nyid yoomo nga" myojid" khe" nho: nyid bye:.

⁴Ce" yooboo we' abo jang" moo ngoo ri ngheung" nyid mo, gi nga" da" vhudi xam: khaid tho moo: je myo: nyid boem. Nga" gyivoo yigi ngoo ri mhau, fain" juang" yi da" dang: tid boem lho: tu: lhoin" lo nyid boem ago". Nyangnu" gi yoem bo boem wigi ngoo ri said pyam nau nyid boem- ngoo akhau" yu da" ziyoo joem ri doem xab, nhang: nyid boem.

⁵Mangsoo we"- nga" yooboo joem gi re" jang" mo yo" yhoem" pyam wa zi anghoid loo:- ngoo khayhi' gyeing" nheug agyeing: koid loo bye: ziri we' nang se' nyid abye:.

⁶Athang agoin yoem moo" bo ziyo' gyi: myhang: da" ASEING we"- nang ri nghe: khau: nyid mo, gi ngoo yoomo sho' athu goo" baja". Israela da" Mangsoo we"- nang ri loem khau: noku bang: ri ngoo yoomo myonhoo: asoem" loo" nhang: nyid ja".

⁷nang yoomo ngoo gi aphoug" akhyoid zi thoung" shau" nyid ziyo' ngoo gi sho' thu zi shoug" nyid bye:.

⁸Nga" mang: nhung" yi da" phung: moo tungbau byu yhang: ti" nga" da" ikoin deunghku: byu yi phung: moo tungbau byu dayug yhang: ti" ngoo bue" nyid bye:.

⁹Re" da" Noku Yhoem: Moo" khoug: moo loem khau: coung" pid da" nga" nheigloem: gi myi: su" nge" loung nyid. nang ri aphoug" akhyoid koid da" khyoo: gi nga" tho moo: ju" jo, bye:.

¹⁰Zoo: noem jang" lho: nga" gung ri ngoo khyo, nyhoem: nyid uri Meing: byu yigi ngoo ri aphoug" akhyoid koid nyid ago".

¹¹Koug shu: da" byimi ngoo void ci: da uri Nyangnu" gi ngoo ri juang" yi nyid ago".

¹²Voomoo" fu" moo" khyoo: joem moo- Nyangnu" gi nga" khyoo: gei sang: yen" boem yi yo' yhid: yed bang: gi nga" khyoo: ri lid jhoem" yang" nyid boem.

¹³Nghoid loug we' ASEING we"- ngoo koem gi nang moo: za: akyu" damho' nyid wa. Mangsoo we"- nang vho: ngei ayo, moo: ngoo ri tu" byid: we'. Re" da gyi: thang jheddab nheigloem: yo' khyoid yu wa ga: nang to" da" dangsoo" khoin" yo' dakhyoo" ti" ngoo ri tu" byid: we'.

¹⁴Thoem" boeb, moo: noeb lo" jang" mo ngoo ri xue: yu we' nga" gyivoo joem da" lo, mo khyoid yu we'. No, da" thoem" thi" mo ngoo ri xue: yu we'.

¹⁵Gyid khyoid zoo" moo ngoo ri anhe, boem" pyam nhang:- no, da" gyid thoem" moo: ngoo ri ase" shid: nhang:- loeb duang: khuang" moo: we' ngoo ri anoeb, vang loo" nhang:.

¹⁶ASEING we" re" da" geung: teung jhed khyeing: kang: khyeung: da" ge lho' khyoo: moo: ngoo ri tu" byid: we'. Re" da" gyi: sheung: nheug khyeug shoo" myen: nheigloem: yo' nga" jhang khyoo: lheung: loo we'.

¹⁷Ngoo gi yau: khe" khyoo: zeing ri shoug" nyid yoomo nanya: gung nyang: re" join' pho, jang" mo agau" lo" byug akhid" nyang: ngoo ri tu" byid: we'.

¹⁸Ngoo ri: khyoid yu wa shid mo tain" ri" we'. Nga" gyivoo joem da" lo, mo ngoo ri khyoid khyi: yu we'.

¹⁹Ngoo gi khayhi' gyeing" aphoug" akhyoid koid ziri shoug" nyid wigi khayhi' gyeing" sho thu lho: khayhi' gyeing" phoug" yoid zi shoug" nyid zigi nang se' nyid gu nghoid.

²⁰Aphoug" akhyoid koid da" khyoo: gi nga" nheigloem: thang bye:. Nheug se' khyeug da" byu ri ngoo nheug byu lang" nyid. Nghoid loug dayug we' anyid. Nheug teing ung: teing byid: wa shid re" nheug byu lang" nyid nghoid loug we' ngoo hang" ri we' amyang.

²¹Ngoo zooyoid nyid uri nyangnu" gi ngoo ri myoono, byid: zho" ago". Ngoo gyid shed nyid uri nyangnu" ngoo ri gyid jhen: yeung byid: jhoug ago".

²²Nyangnu" da" zo: shoug pui" gi nyangnu" ri byo, yoin" loo" nhang: baja". Nyangnu" da" phoug" dab, zoo: shug pui" gi nyangnu" ri joem: gyo" loo" nhang: pyam, baja".

²³Nyangnu" da" myojid" joem gi ayo" myang loo" sho' myo, jed loo" goo" baja". Nyangnu" da" dang khung: gi khanham we' yoem: neung: jo, boem goo" baja".

²⁴Nyangnu" da" atho' moo re" nheug yo: khyoo: foid gyoin: kaid we' re" da" nheug khoo" yo: khyoo: gi nyangnu" jang" moo: myhi: loo" baja".

²⁵Nyangnu" da" zeung: foem: dab, joem gi jham" dung" khi" bui" baja". Nyangnu" da" zoem" joem moo dayug we' adei nyid loo goo" baja".

²⁶nang wigi shen" too" mo, ri nyangnu" gi pyi: sho: shen" yhen nyid boem ziyo' nang dam, tab, too" shoug" mo, da" phu" zo: khyoo: joem ri nyangnu" gei sang: nyid boem.

²⁷Nyangnu" da" yooboo joem dangain" ri lhid" xoem" too" we' Re" khyoid yu khyoo: moo nyangnu" ri dakhyam" dayam, khyalang" ashoug" nhang:.

²⁸Re" da" kangso' mougsoug" pug mo nyangnu" da" myeing ri said pyam byid: we'- re" byumyu" yi da" lhid xoem" moo: nyangnu" abo boem baja".

²⁹Nghoid loug we' ngoo gi noo phyoo" shoug" lho: nheigloem: thang bye:. Mangsoo we"- ngoo ri vu, to' yu lho khyoid yu we o".

³⁰Mangsoo ri jikhoin" dang: yo' ngoo coung" nghei nyid wa Jeju" boin: ziyo' nya: da" nghoid thang khyoo: ri ngoo tid fu" byid: nyid wa.

³¹Hau: zigi nujung xoin" ngei" byid: da" tho' moo ASEING ri je" gau yi ngeibu: nhang: nyid. Xu: da" nujung loo: xoin" to' byid: tho' je" vho: ngei wa zi nghoid.

³²Doin: zeig zo: nyid zi shoug" bang gi hau: khyoo: ri myang boem lang" nyangnu" gi gau yi ngei pyo: lo boem wa Mangsoo ri loem khau: noku bang: gi nheigloem: yoem yo" yu boem wa nghoid.

³³ASEING gi ca" yo nyid bang: da" akyu" mho' dang: ri tam" gyoo: byid: nyid wigi thung: loung" jo, da" nya: byu yiri to" myhed pyam nghoid da:.

³⁴Mougkhung: yo' myidjang- panglai: yo' hougmoo: loung" jo, dei moo: dei bang: we' Mangsoo ri coung" nyid we'.

³⁵Nyang: gi Yerusalem ri khyoid yu wa ziyo' Yuda mung" mo voomoo" joem ri we' doem so' zhoug too" wa zi nghoid. Nya: byu yigi hau: joyoo moo yo" khau: nghe: nyid boem wigi mungdain: ri yo" seung: yu boem wa zi nghoid.

³⁶Nya: dei zoo: yi da" amyed ashen yigi hau: da" mid ri kham: yu boem wa ziyo' nyang: ri jheddab nyid mo, hau: jang" moo: shoug" nyid boem wa zi nghoid.