Read Lashi COUNG" NGHEI 71 Bible Online

COUNG" NGHEI 71 - Lashi bible

COUNG" NGHEI 71

¹ASEING we"- goem loem byid: wa shid mo ngoo re" jang" moo: tain" loo bye:. Ngoo ri: khanham we' asoem" joem: loo" nhang:.

²Nang gi deungbyeung" su: nghoid nyid yoomo ngoo ri pang" thoug lho: khyoid yu we'. Ngoo mho' thui: ri tam" gyoo: byid: ziyo' ngoo ri khyoid khyi: yu we'.

³Nga" da" gau: nyu: nghe: khoug: joyoo yo' ngoo ri goem loem byid: wa da" gyidab, nghoid. Yoem bo da" nang gi nga" khoug: loo lug ug yo' theung shang" joyoo nghoid.

⁴Nga" Mangsoo we"- ngoo ri akhyeing" bang: da" lo, khoug: mo khyoid khyi: yu we'. Athoug" akhyoug: mo, yo' ashoeb mo, da" yoem so, khoug: mo ngoo ri khyoid yu we'.

⁵Myhang: thang da" ASEING we"- nang moo: ngoo nheug byu nyid. Ngoo ri: ngi shi" da" ayo, mo wigi nang moo: za: nghe: khau: nyid bye:.

⁶Ngoo gi nga" pyaid goin" nang moo: za: nghe: khau: nyid. Ngoo khu: lo da" bidnyid mo wigi nang ngoo ri lhoug zung" goem loem byid: bye:. Houg: yoomo ngoo gi nang ri: khanham we' coung" nghei nyid wa nghoid.

⁷Nang gi nga" yoem bo da gyivo su" nghoid nyid yoomo nga" apyaid gi byu myoo" sho' mo, da" shidkhoin" moo khoo" shid: bue" nyid bye:.

⁸Ngoo gi danyid" goin nang ri coung" nghei nyid lho: re" myonhoo: phung" yoeb ri tid fu" nyid wa nghoid.

⁹Akhid" gi ngoo mang: loo" bye: yoomo ngoo ri angeug pyam. Akhid" ngoo yoem neung: nyid bye: yoomo ngoo ri ashe: pyam too".

¹⁰Nga" gyivoo joem gi ngoo ri said pyam nau nyid boem- Nyangnu" gi ngoo ri thougtheung tu: lhoin" pyam wa shid mo sham: go" nyid boem.

¹¹Mangsoo gi nyang: ri she: pyam abye:- nyhang" nya: thang: moo cang yhe: lho: myheug yu boem shang. Nyang: ri khyoid yu wa byu dayug we' anyid" ga: wigi nyangnu" tid nyid boem.

¹²Mangsoo we"- gye" vi: moo: anyid nyid nga" Mangsoo we"- ngoo ri pang" yu wa shid mo myab myab ju" ri we' o".

¹³Ngoo ri: zain: lo nyid bang: soem" lo" wigi ngoo ri noo: nhang: wa shid mo yoem kaid nyid bang- sho thu lho: myonhoo: soem" loo" goo" baja".

¹⁴Nang moo: ngoo khanham we' nheug byu nyid hougsu" nang ri ngoo gi je" je coung" nghei nyid wa zi nghoid.

¹⁵Re" da" ge lho' khyoo: ri ngoo kho" kyo" nyid wa nghoid. Ngoo se' gyo: tho' moo dang: kang: je" no, jo. Nghoid loug we' re" da" khyoid yu khyoo: ri danyid" goin" ngoo tid kyo" nyid wa.

¹⁶Ngoo gi ASEING da" gyi: myhang: thang da yoem so, ri coung" byid: wa nghoid. Re" da" ge lho, khyoo: ri za: ngoo tid fu" nyid wa nghoid.

¹⁷Ngoo ngi shi" da" pyaid mo nyang:- nang gi ngoo ri jhau" byid: abye:. Re" da" mau" pho" moo" zoo" joem ri akhid" ju" sho' ngoo tid fu" nyid.

¹⁸Akhid" koem gi ngoo mang: loo" bye: ziyo' nga" xam: phyu: loo bye:. Mangsoo we"- ngoo ri ato" pyam- doem ju" loo wa myid: yam: zo: xeig yiri re" da" yoem so, ri tid fu" lo" uri ngoo yo' dage" bo nyid we'.

¹⁹Mangsoo we"- re" da" deingmain" da" khyoo: gi mougkhung: joem moo: myhi: jo. Nang gi gye" gyi: da" moo" zoo" joem ri zei: bye:. Nang yo' du su: gooyug dayug we' anyid loo.

²⁰Nang gi yau: khi" phu" zo: khyoo: yo' gyoug nain" khyoo: ri nga" tho' moo: thoung" shoug" nhang: nghoid loug we' Loeb duang: khoug: mo we' nang ngoo ri khyoid yu wa zi nghoid.

²¹Nang gi ngoo ri goonham tho' mo wigi je" gyi: sheung: loo nhang: wa zi nghoid. Nang gi ngoo ri nheug teung ung: doem teing byid: wa zi nghoid.

²²Ngoo gi nang ri gyeing" gyeing" nyang:- teing yo' baid coung" byid: wa zi nghoid. Nga" Mangsoo we"- re" da" nheigloem: zung" khyoo: ri ngoo coung" byid: nyid wa zi nghoid. Israela da" gyeung" shang: su: nang ri ngoo gi teing baid lho: coung" byid: wa.

²³Re" shid mo teing baid uri ngoo gau yi nyho: nyid wa. Nang gi ngoo ri khyoid yu bye: yoomo nga" nheigloem: ung: khoug: gung du dangain" yo' ngoo jikhoin" khoin" nyid wa nghoid.

²⁴Ngoo ri: noo nhang: wa khyo" yoem kaid nyid bang: gi soem" joem: lo" lho: wigi asho ashid: zi shoug" nyid boem bye: yoomo re" da" deingmain" da" khyoo: ri ngoo danyid" goin" tid fu" nyid wa bye:.