Read Lashi COUNG" NGHEI 72 Bible Online

COUNG" NGHEI 72 - Lashi bible

COUNG" NGHEI 72

¹[35] Mangsoo we"- re" da" deingmain" da" khyoo: yo' Tarha" dang: phyed wa shid mo khokham phoo ri jhau" byid: we'. Re" da" tarha" nyeung veung" khyoo: nyang: ri gam byid: we'.

²Hougsu" nyang: gi re" da" byu yiri nyeung veung" khyoo: re" yo" vhoebkhang" wa ziyo' doin: zeig zo: zi shoug" nyid mo, ri deing byeung" khyo" yo' vhoebkhang" wa zi nghoid.

³Mougmyid yoosoo" gi yo" loo de lo da" khyoo: ri goug goug yi yi shoug" kham: yu goo" baja"- deing: byeung" khyoo: moo: cang lo" nyid goo" baja".

⁴Khokham phoo gi asho" ajhen: bang: ri nyeung veung" khyo" tarha" dang: yo" phyed baja"- ca" yo nyid mo, ri we' yo" pang" thoug byid: baja". Nyangnu" ri doin: zeig zo: nyid mo, ri yo" soem" joem: loo" nhang: baja".

⁵Byu ngoug xiyam: moo: re" da" mung" byu yigi bidbang dabang nyid nyid gi nang ri loem khau: coung" pid nyid goo" baja". Kyi: yo' lhammoo" dabang jo, jo, gi nang ri coung" pid nyid boem goo" baja".

⁶Yoothung" dain" moo: moug: vo yhang: ti" myidjang tho' moo: byoem: loem: moug: vo gyo" nyid yhang: ti" khokham phoo we' hougsu" nghoid nyid baja".

⁷Deing byeung" khyoo: gi nya: pyaid goin" moo: gyi: sheung: loo baja". Lhammoo" gi nya: yoeb bang dayo" pang nyid nyid gi nyid gi nyid de lo khyoo: gi dageung: teung jo, baja".

⁸Nya: mungdain: gi panglai: mo zi panglai: moo: ju" sho' Uphrad gyid lang mo zi mougmyid thang jang" moo: ju" sho' gyi: sheung: ce" lam: loo" wa zi nghoid.

⁹Siyoo khoug: mo byu yigi re" shidkhoin" moo vhu" pid pid lo boem wa. Nya: gyivoo joem gi nya: shidkhoin" moo nyang: nya: gung ri nyang: myid jang: moo: goeb pye' to" boem wa.

¹⁰Spain mung" yo' gugyoo: kang: mo khokham yigi nyang: ri jhungshug jhung: lang: joem re" shug byid: lo boem wa.

¹¹Khokham nghoid moo: nghoid gi nya: shidkhoin" moo: re" goeb pid boem wa zi nghoid. Byumyu" yi bain sho' bang: we' nya: da" dei zoo: lo, nyab, yi bue" lo boem wa zi nghoid.

¹²Nyang: ri yoid mho' nyid da- asho" ajhen: bang: we' ca" yo nyid bang: yo' aphoug" akhyoid koid zi shoug" nyid mo, ri we' nyang: khyoid yu wa nghoid.

¹³yoem nu: mo, yo' asho" ajhen: mo, da" atho' moo: we' nyang: nheug khyeug nyid wigi ca" yo nyid bang: da" kangso ri we' khyoid khyu: yu wa zi nghoid.

¹⁴Nyangnu" da" kangso joem gi nya: shidkhoin" moo: phoug" dab, nyid yoomo nyang: gi nyangnu" ri doin: zeig zoo: bang: yo' athoug" akhyoug: da" moo" zoo" mo we' khyoid yu wa zi nghoid.

¹⁵Khokham phoo kang: sheung: nyid baja" Sheba mung" mo da" sheing: ri we' yo" khoem yu baja" nya: shid mo noku nyid mo ayo, loem: khang" moo" moo: mho' nyid goo" baja" Mangso mainkaid jeju" joem gi nya: tho' moo: dajo, jo, baja" o".

¹⁶Mougmyid moo: shivoo: shiloem ge lho, nyid baja" Lebanon moug: mo shivoo: shiloem ge lho, jo, yhang: ti" boug zoo: boug zeing joem moo gug zoo meiloem: byeung" jo, baja" pa: dam mo vu, fu" yoo yhang: ti" voozoo: voozeing moo: byumyu" yi byeung" shoin: loo" goo" baja".

¹⁷Khokham da" myeung ri khanham we' ato" myhid goo" baja" nya: myeung fu" nheung to" zigi bid moo" khyab yhang: ti" dageung: jo, baja". Khokham ri Mangsoo gi mainkaid jeju" byid: to" yhang: ti" byumyu" yi ja: khang moo" ri we' Mangsoo nyangnu" ri mainkaid byid: wa shid re" mho' nyid goo" baja".

¹⁸Israela da" Mangsoo- ASEING ri coung" byid: ge'. Nyang: kyeing" za: he: da" mau" pho" moo" zoo" zeing ri zei: nyid su: nghoid.

¹⁹Nya: myonhoo: phung" yoeb yo' byeung da" voolang myeing ri apyaid atoo: moo: ju" sho' dacoung" nghei nyid we'. Nya: da" myonhoo: phung" yoeb gi moug: gyab goin" jang" moo: byeung" shoin: loo" baja" o". Amen. Amen.

²⁰He: khyoo: gi Yese da" nya: zoo- David akyu" mho' jang" mo lo" thang mo akyu" mho' dang: nghoid.