Read Lashi COUNG" NGHEI 73 Bible Online

COUNG" NGHEI 73 - Lashi bible

COUNG" NGHEI 73

¹[36] Mangsoo gi Israela byumyu" yi da" atho' moo gyeung" nyang: ge nyid su: nghoid- je" wigi nheigloem: phyu: yung" bang: da" atho' moo gi su: nghoid.

²Nghoid loug we' ngoo gi nheugshid: nheugdeug khyoo: alug lug ci: phyug pyam bye:- nga" loem" jeung" nheigloem: we' alug lug thang byug bye:.

³Khasu" wim gari akhyeing" bang: shid re" khyoo: khaid khang" moo" ge lho, nyid da" khyoo: ri ngoo myang uri hau: khyoo: yoomo phau: khuang nyid mo, ri yu" noo" yoomo nghoid.

⁴No ziyo' phu" zo: khyoo: ri nyangnu" ci: ashau" yu" nghoid ago- Nyangnu" gi yoem bo ziyo' yang zain: nyid boem.

⁵Nyangnu" gi gootu: byu yi yhang: ti" phu" zo: khyoo: ri ashau" kham' zoo: nghoid ago". Gootu: byu yi shau" da" yau: khe" kyi" khyeug zi nyangnu" ashoug" nghoid ago".

⁶Hougsu" nghoid yoomo nyangnu" gi hau khuang khyoo: rigi yi: yhang: ti" athoug" akhyoug: koid khyoo: rigi adang byisheing: yhang: ti" void ci: boem ago".

⁷Nyangnu" da" nheigloem: ung: khoug: joem gi akhyeing" ashoeb khyoo: riza: foid, thu kaid nyid boem wigi nyangnu" da" nheigloem: emyed gi akhyeing" ashoeb khyo" myid soin: khyoo: joem yo' moo" myo: nyid ago".

⁸Nyangnu" gi gootu: byu yiri juang" yi nyid boem wigi ashoeb da" khyoo: riza: datid go" nyid boem. Nyangnu" gi phau: khuang nghoid boin: nyid boem ziyo' gootu: byu yiri doin: zeig zoo wa ziri myid soin: nyid boem.

⁹Nyangnu" gi Mougkhung: tho' mo Mangsoo ri lang- age da" gei sang: shang pyang: nyid boem lho: mougmyid tho' mo byu yiri nheigloem: thain: ziyo' amyeing" byid: nyid ago".

¹⁰Hougsu" koid nyid khyoo: gi Mangso byu yi lang" nyangnu" jhang khyoo: lheung: vang lo" boem wigi nyangnu" tid da" khyoo: ce ja: ri nghoid loug we' so, kho' tung" loem" jeung" nyid ago".

¹¹Nyangnu" gi" Mangsoo ri si' wa zi anghoid- myhang: thang su: shoug" shoo: wa zi anghoid" ga: tid nyid boem.

¹²Akhyeung" bang: ri hougsu" nghoid nyid boem wigi nyangnu" gi athang agoin nyid de lo boem lho: ayo, loem: khang" moo" moo je" ju yo" loo de lo nyid boem ago".

¹³Houg: yoomo nga" da" gung du: ri yooboo akoid loo: gyeung" shang: tung" yo" nyid zigi akoem: za: nghoid wa la".

¹⁴Mangsoo we"- nang gi ngoo ri nyid" goin" phu" zoo: shoug" nhang: nyid da:. Nang gi ngoo ri nab kyo, ayo, khang" moo shen" yhen nyid da:.

¹⁵Ngoo gi houg: yhang: te" da" khyoo: ri dato tid shoid nghoid rigi ngoo gi re" byumyu" yi mo byu dayug khyo" wigi yo" zei: so, nyid zi anghoid.

¹⁶He: da" sei: joem ri ngoo yoem kaid myid phoid sho: yu" bye:. Nghoid loug we' hau: khyoo: gi nga" shid re se' gyo: phoid yu wa zi gye" yau: nyid.

¹⁷Re" da" Noku Yhoem: Moo" khoug: moo ju" vang re" thang: ri akhyeing" bang: moo: khasu" bue" loo ziri ngoo se gyoo: bye:.

¹⁸Nang gi lung: ngei" zug lho: jhoid leung wa joyoo moo nyangnu" ri nyid nhang: lho: nyangnu" ri byo, yoin" wa joyoo khyoo: khyo' kaid wa zi nghoid.

¹⁹Nyangnu" gi houg: jang:- phyo' shoin pyam zi shau" wigi Nyangnu" da" lo" thang mo khyoo: gi gyoug ci jo yoo khyoo: gyo" yhe: lo" nyid.

²⁰ASEING we" ngoonu" gi nab soin: ayo, moo byoug byoug da" yhoebmo, su" za: nghoid nyid wigi ASEING nang to' lo da" uri nyangnu" gi anyid byug lo: boem.

²¹Ngoo myid soin: nyid khyoo: moo kyid kyid: kho" wigi ngoo kham' zo: nyid khyoo: moo nheigloem: no nyid uri

²²Gougnyhoug ti" ngoo ko" pa" lo" lho: ngoo nang ri ase gyoo: loo.

²³Nghoid loug we' ngoo gi nang yo' khanham we' jhang jhang nyid ziyo' re" lo, gi ngoo ri zei: ci.

²⁴Re" da" jhau" shed khyoo: yo' ngoo ri vhu" shu" she: nyid lho: Thang" thang phoug" tab, ngi shab khyo" nang gi ngoo ri lhoem: kham: yu wa zi nghoid.

²⁵Mougkhung: moug: di moo nang mo lid lho: ngoo gootu: ciyo" lha". Ngoo gi nang ri bain yo" too" bye:- mougmyid tho' moo: ngoo civhoo: shi wa lha".

²⁶Nga" nheigloem: yo' gung du: gi yoem neung: loo" wa nghoid. Nyang: gi apyaid atoo: mo nga" yhouggyen: da" jonu" nghoid.

²⁷Nang ri she: pyam mo, gi gyeing" nyang: joem: lo" boem wa zi nghoid. Nang moo: nheigloem: azung" bang: ri nang gi phyo' shoin' pyam wa zi nghoid.

²⁸Nghoid loug we' nga" shid re" koem gi Mangso jhang yo" tain" tab yhe: lo" khyoo: phung" yoeb bo da" ASEING Mangso jang" mo goem loem byid: khyoo: shoug" kham: yu lho: nyang: zei: bye: da" moo" zoo" joem dangain" ri yo" tid fu" wa zigi khayhi' mau" pho" khyoo: nghoid lha".