Read Lashi COUNG" NGHEI 74 Bible Online

COUNG" NGHEI 74 - Lashi bible

COUNG" NGHEI 74

¹[37] Mangsoo we"- nang cikoid ngoonu" ri hid: yhang: ti" she: pyam, to" lha". Nanya: byu yiri pyaid moo: too: moo: nheig dajha" yo: nyid wa ein: la".

²Goonham gooco' mo nanyang: khyen: yu da" byumyu" yi yo' nanya: byu kung: bue" nyid wa shid re" join mo khyoid yu shau" da re" byu yi ri boin: so" nyid we'. Goonham nang nyid lid lo yu" da" Ziun boem ri myid boin: nyid we'.

³Jhoid" nyang: byo, yoin" jo, da" joyoo joem mo re" yu" we'. Ngoonu" da" gyivoo joem gi Noku Yhoem: Moo" khoug: mo zi yoo joem ri phyo' shoin' to" abye: go".

⁴Re" da" gyivoo joem gi oung: doid loo" bye: ga: re" Noku Yhoem: Moo" khoug: moo nyho: phau: nyid boem bye:. Nyangnu" da" dungkhoin: joem ri we' hau: joyoo moo oung: doid loo" bye: da- alhoo: again khyo" zhug to" abye: go".

⁵Nyangnu" gi nyangnu" da" voozung: joem yo' seiggam' joem ri kheing da" seig thug mo, yhang: ti" du nyid.

⁶Nyangnu" gi soolhoo: lhid" to" da- seig thi" dangain" ri we' ladu zeing yo' voozung zeung: wigi youg khyoeb pyam abye: go".

⁷Nyangnu" gi re" da" Noku Yhoem: Moo" ri we' youg khyoeb pyam lho: myi: yo' nghe' pyam abye: go". Houg: yhang: ti" nang ri noku coung" pid da" joyoo ri nyangnu" gi aco ajhoid koid pyam abye: go".

⁸Nyangnu" gi ngoonu" dangain" mo, ri jhoid" jhoid mhoin' pyam nau nyid ago". Nyangnu" gi hau: moug: mo gyeung" shang: da" joyoo dangain" ri myi: wigi nghe' jhoem" too" khare" boem bye:.

⁹Ngoonu" da" gyeung" shang: alhoo: again' joem dangain" ajo, loo. Hau: joyoo moo: Lapi: dayug we' anyid lo: ziyo' khamyhang myang" sho' hid: yhang: ti" bue" jo, wa ziri hang" we' asi, loo.

¹⁰Mangsoo we"- re" da" gyivoo joem gi khamyhang myang" sho' nang ri juang" yi nyid boem wa lha". Nyangnu" gi re" da" myeing khyang" ri khanham we' dajha" lu wim: nyid loo: wa la".

¹¹Nang gi ngoonu" ri pang" thoug byid: wa shid re" cikoid ngeug pyam nyid lha". Re" lo, ri ci: yoomo, shoung: pyam lha".

¹²Nghoid loug we' nang gi xang: shid mo nyang:- ngoonu" da" khokham nghoid bye:. Nang gi ngoonu" ri myoo" sho' lheing: we' khyoid khyi: yu yu" bye:.

¹³Re" da" yoem: moo" phung" yoeb yo' panglai: gyid thoem" ri kho' kang pyam lho: panglai: main jung: joem da" vhuloem ri we' youg khyoeb pyam yu" bye:.

¹⁴Nang gi mainjung Leviathan da" vhuloem ri we' mhoin' pyam wigi Nya: da" gung shoo" joem ri siyoo moo: nyid da- gougnyhoug joem ri gam zho" pyam da:.

¹⁵Nang gi gyid bug yo' gyid zoo: joem ri shau, kaid wigi gyid moo" lang joem ri khyoug kain" loo" nhang: nyid.

¹⁶Nang gi nyid" yo' myen" ri phain" so: to" wigi bid yo' lhammoo" ri we' Nyangnu" da" joyoo joem ri soin nyeung byid: to".

¹⁷Mougmyid da" kyoo" doem: ri we' nang ke byid: to" lho: zain' xung" ngam" da" ayo, ri nang phain" so: too" byid: bye:.

¹⁸Nghoid loug we' ASEING we" Mangsoo ayo" ziyo' nang ri aphoug" akhyoid koid nyid da- re" gyi voo joem gi nang ri juang" yi nyid boem ziri nang boin: nyid we'.

¹⁹Pang" thug wa bidnoem ayo" da" re" byumyu" yiri nheug ase' khyeug da" gyivoo joem da" lo, moo ashe: pyam too. Shen" yhen pyi: sho: zi shoug" nyid da" re" byumyu" yiri ato" myhed pyam.

²⁰Nyangnu" yo' nang dang: theing khoin" to" da" ziri ato" myhid daboin: so" nyid we'. Mougmyid moo: moug: coid thu: jo, da" jhoin: khang" moo" moo athoug" akhyoug: da" moo" zoo" joem jo, jo.

²¹Doin: zeig zo: ziri shoug" nyid mo ri sho' athu nyid nhang:. Asho" ajhen: mo, yo' ca" yo nyid bang: gi nang ri coung" nghei nyid goo" baja" o".

²²Mangsoo we"- nanyang: tho' re" nanya: moo" zoo" ri goem loem byid: we'. ce" Mangsoo we' abo bang: gi nyid" goin" goin" nang ri juang" yi nyid boem ziri boin: soo" we'.

²³Re" gyivoo joem gi nheig yoo: nheig teig nyho: yoid, nyid boem ziyo' Re" gyivoo joem da" nyho: tei" to" thui: ri ato" myhed nyid.