Read Lashi COUNG" NGHEI 76 Bible Online

COUNG" NGHEI 76 - Lashi bible

COUNG" NGHEI 76

¹[38] Yuda meing: moo gi Mangsoo ri se ago"- nya: myeing khyang" ri Israela meing: moo phoug" tab, ngi: shab nyid boem ago".

²Nya: yoem gi Yerusalem moo: jo, lho: Ziun boem tho' moo nyang: nyid nyid.

³Hau: joyoo moo nyang: gi gyivoo joem da" myoo: joem ri khyau" pyam byid: nyid. Nyangnu" da" goo joem yo' sham: lham: joem ri we' nghoid bye:- nyangnu" da" gyizi gyikhoo: joem dangain" ri we' khyau" mhoin' pyam byid: bye:.

⁴Mangsoo we"- re" da" myonhoo: phung" yoeb gi khayhi' gyi: bang jo, lha". Re" gyivoo joem ri nang oung: pyam da" joyoo- boem tho' mo wigi nang doem tau" lo ri nang gi khayhi' myonhoo: phung" yoeb bo jo, wa lha".

⁵Nyangnu" da" rhe, gyizoo: yigi nyangnu" da" yoo" moo: yoo" dangain- lhoid khyoid pyam zi shau" wigi akhid" gi nyangnu" shid: leung yoin" too" bye:. Nyangnu" da" yoem vhoo" yo' se, jhang: da" khyoo: dangain" gi akoem: za: danghoid boem aloo: go".

⁶Yaku da" Mangsoo we"- nang gi nyangnu" ri kyug nhain'" kaid uri myang: joem yo' Nyangnu" da" myang: jui: bang: gi byed gyo" shid: loo" byoug boem bye:.

⁷Nghoid loug we' ASEING we" nang ri byu dangain" mo, gi gyoug phau" myang: nyid boem ago". Nang nheig yo: lo da" uri hang" we' re" shidkhoin" moo: ayo" to' yab jo, boem nghoid aloo go.

⁸Nang gi: re" da" tarha" dang: phyed khyoo: ri mougkhung: mougdi tho' mo wigi si' nhang: nyid. Mougmyid tho' moo: doin: zeig zo: zi shoug" bang: ri khyoid yu wa shid re" nang to' lho: dang: phyed uri mougmyid gi gyoug nain" lho: sam" zoo: tam" to" abye:.

¹⁰Byu yi da" nheig yo: khyoo: gi nang ri: coung" nghei joyoo je" bui" nhang: nyid. Gyipui" moo: ashid: looza- deung dei nyid bang: gi re" da" pui" joem moo shoug" bo vang loem" wa zi nghoid.

¹¹Nang nyang: ri byid: to" da" dangsoo" khoin" yo' dakhyoo" ti" re" Mangsoo ASEING ri byid: we'. Ayam aqei: moo: nyid nyid da" byumyu" yi bain sho bang: we' nyang: ri jhung" shug jhung: lang: shug byid: we'. Mangsoo gi nyang: ri gyoug phoug" wa shid re" byumyu" yiri koid nyid.

¹²Nyang: gi nghoid boin: da" khokham yuggi zoo: yiri doin: khyo' pyam lho: gye reung: thui: gyo: nyid da" khokham yiri kyug nhain' nyid.