Read Lashi COUNG" NGHEI 79 Bible Online

COUNG" NGHEI 79 - Lashi bible

COUNG" NGHEI 79

¹Mangsoo we"- tungbau byumyu" yi re" mungdain: ri re" vang zain: boem wigi re" da" gyeung" shang: Noku Yhoem: Moo" ri nyangnu" aco' ajhoid koid pyam nyid boem ziyo' Yerusalem voomoo" ri we' lhu: phyo' lhu: shoin' too" khare" boem bye:.

²Nyangnu" gi re" byumyu" yi da" shid: mang joem ri join yu joem shid re" yo' re" lang: jhang joem da" shid: mang joem ri zeigni gougnyhoug joem phyo' zoo: wa shid re" she: pyam to" ago".

³Nyangnu" gi re" byumyu" yi da" suid" ri Yerusalem joyoo khyi khang" moo" moo gyid su" yau, nyid nhang: lho shid: da" byu yi mang myhoeb shoung: wa byu dayug we' aboo loo.

⁴Bid noem mungdain: mo byumyu" yigi ngoonu" ri aphoug" akhyoid koid pyam boem ziyo' Nyangnu" gi ngoonu" ri juang" yi lho: yu" nge pyam nyid boem ago".

⁵ASEING we" nang gi ngoonu" ri apyaid atoo: moo: ju" sho' nheig dajha" yo: nyid wa ein: la". re" da" nheigloem: loung nyid zigi myi: yhang: ti" khanham we' dajha" nge" nyid wa ein: la".

⁶Nang ri anoku loem khau: myid abo bang: yo' nang ri akyu" amho' bang: da" tho' moo re" da" nheigloem: nge" loung zi foid shoin" kaid we'.

⁷Khasu" wim ga: ri nyangnu" ri re" da" byumyu" yiri said pyam byid: ziyo' re" da" mungdain: ri we' nyangnu" lhu: phyo' lhu: shoin pyam byid: abye: go.

⁸Nyangnu" da" nya: phoug" nya: phyid" be" yooboo yoomo nyangnu" ri yooboo abyid: nyid loo. Nyangnu" da" nheug byu jang: dangain" ci: phyug pyam bye: yoomo akhid" nyang:- ngoonu" ri neig khyeug yu shi" we' o".

⁹Mangsoo we"- ngoonu" ri pang" thoug yu lho: khyoid yu shi" we'. Re" da" myonhoo: phung" yoeb shid mo ngoonu" ri lhoid pyoin yu wigi ngoonu" da" yooboo joem ri khyoid pyam byid: we'.

¹⁰Re" da" Mangsoo khayoo: nyid la". gootu: byumyu" yi ciwim gi ngoonu" ri hougsu" myid: wa joyoo boo nhang: nyid la". Re" deizoo yi da" suid" ri ein: foid pyam byid: nyid da" byumyu" yiri nang shen" yhen dam kaid nyid da" khyoo: ngoonu" ri: myang nhang: we'.

¹¹Thung: loung" jo, bang: da- nookyeing" thui: ri tam" gyoo: byid: we'. said pyam wa shid re" dang: phyed shoug" jo, mo, ri re" da" gyi: thang yoem moo yo' loid byoin loo" nhang: kaid we'.

¹²ASEING we" tungbau mungdain: yi da- shid moo: sho' thu nhang: lho: Nyangnu" gi nang ri rue" nyid yoomo nyangnu" ri nyhed zhang ju" sho' latoo: doem phug byid: we'.

¹³Houg: lang" gi re" mung" byu yi ein: da" re" yang phung: mo yang joem ngoonu" gi nang ri apyaid atoo: moo jeju" daboin: nyid boem wa ziyo' doem ju" loo wa bidnyid ayo, dangain" moo: we' nang ri coung" byid: nyid boem wam: bye: o".