Read Lashi COUNG" NGHEI 89 Bible Online

COUNG" NGHEI 89 - Lashi bible

COUNG" NGHEI 89

¹ASEING we" re" da" athang agoin jhed khyeing: kang: khyeing: ri ngoo khanham we' jihkoin" dakhoin" nyid wa. Re" da" zung" nheigloem: ri ngoo pyaid moo: too: moo: tid kyo" nyid wa.

²Re" da" jheddab khyoo: gi pyaid didu moo: geung: jo, wa ziyo' re" da" zung" nheigloem: we' mougkhung: mougdi yhang: ti" geung: jo, ziri ngoo se' nyid.

³nang tid to" zigi" ngoo khyen: too" su: yo' ngoo dang: theing too" bye: nga" dei zoo- David ri dang: theing byid: too" bye: ziyo' dakhyoo" ti

⁴Re" da" amyed ashen" mo khanham we' khokham bui" nhang: wa nghoid. Re" da" khokham byumyu" ri pyaid moo: too: moo dageung: teung jo, nhang: wa, ga: wigi tid bye:.

⁵ASEING we" mougkhung: mougdi joem gi nang koid to" mau" pho" ziri jihkoin" khoin" nyid boem. Gyeung" shang: bang: gi re" da" nheigloem: zung" khyoo: joem ri jihkoin" khoin" nyid boem.

⁶ASEING we" moug khung tho' moo: we' nang yo' du zi hang" anyid loo. Moug khoung: zoo: yi hang" we' nang yo' yo" du goo" wa zi anghoid.

⁷Nang gi gyeung" shang: mo, da" phung: moo gyoug phau" zi shoug" kham yu nyid. Nyangnu" dangain" mo, gi nang ri mau" yab jo.

⁸Gyi: myhang: thang da" ASEING Mangsoo we"- nang yhang: ti" yoem zeing so, moo" boo su- hang" we' anyid nyid loo. ASEING we"- nang gi khyoo: khaid gu: khang" moo" moo dang: zung" su: nghoid nyid.

⁹Nang gi yoem moo" bo da" panglai: gyid mung" ri vhoebkhang" nyid wigi houg: mo thain: da" being: mhoid joem doin: lhoem" lo boem ri nghoid loug we' nang gi no: jham" loo" nhang: nyid.

¹⁰Nang gi gyid mainjung: Rahab, ri ne, mhoin' pyam wigi said pyam wa bye:. Nang gi re" da" gyivoo joem ri re" da" yoem moo" yo' oung: doid loo" bye:.

¹¹Mougkhung: mougdi gi re" da" zi nghoid. Mougmyid yoosoo" we' re" da" zi nghoid. Mougmyid yo' hougmoo: jo, da" ziyoo dangain" ri we' nang koid to" zi za: nghoid.

¹²Mougzhung: yo' mougpyi: we' nang phain" so: to" abye:- Tabora boem yo' Hermon boem joem ri we' nang ri gau, yi jikhoin" thu: yo' khoin" nyid boem bye:.

¹³Nang gi zoug myeing" yoem vhoo" gye" boo su: nghoid nhung: re" da" yoem vhoo' gi gye gyi: jo, nyid.

¹⁴Re" da" mungdain: gi deingmain" ziyo' nyeung vho, khyoo: moo zheung: tam" to". Nang zei: da" moo" ja: khang" moo" moo jheddab khyoo: yo' zung" da" nheigloem: ri toin" shed nyid.

¹⁵Jihkoin" khoin" lho: nang ri noku loem khoug: bang: khayhi' ngilho' nyid boem nhung: lha". Re" da" nheig khyeug shoo" myen da- bidbang khoug: moo so" nyid da" byumyu" yigi khayhi' ngilho' nyid boem nhung lha.

¹⁶Nang yoomo nyangnu" gi nyid" goin" gau yi ngei pyo: nyid boem ziyo' re" da" ge thang khyoo: yoomo nyangnu" nang ri coung" nghei nyid boem.

¹⁷Nang gi nyangnu" shid re" gyi: thang oung: doid lo" khyoo: zeing ri byid: nyid da:. Re" da" jheddab nheigloem: khyo" ngoonu" ri oung: doid loo" nhang: nyid.

¹⁸ASEING we" nang gi ngoonu" ri goem loem byid: wa su: khyen byid: nyid da:. Israela da" gyeung" shang: Mangsoo we" nang gi ngoonu" shid re" khokham byid: too" bye:.

¹⁹Goonham' dalheung: ri re" da" yoeb myang daloem: moo re" nheigloem: zung" da" dei zoo: yiri nang tid zigi hid: su" nghoid. Myeung gye" fu" da" gyizoo: dayug ri ngoo khyen: yu wigi khokham zhungtang ab byid: bye:.

²⁰Nga" da" dei zoo: David ri gyeung" shang: da" mainkaid xu: yo' joid, byid: wigi Khokham aya: dang: byid: bye:.

²¹Nga" da" yoem vhoo" gi nyang: yo' dage" khanham we' dabo jo, wa ziyo' nga" da" yoem so, yo' nyang: ri yoem lung: byid: wa zi nghoid.

²²Nya: gyivoo joem gi nyang: ri khanham we' yo" ung: wa zi anghoid. akhyeung" su: we' nyang: ri yo" soem" joem: loo" nhang: wa zi anghoid.

²³Nya: gyivoo joem ri ngoo ne, mhoin pyam byid: wa ziyo' nyang: ri ngheing" bang: hang" ri we' Ngoo said pyam byid: wa zi nghoid.

²⁴Ngoo gi nyang: ri jheddab nyid wigi nya: atho' moo: nheug yo: nyid wa zi anghoid. Ngoo gi nyang: ri khanham we' oung: loo" nhang: wa zi nghoid nyid.

²⁵Ngoo gi nya: mungdain: ri Medi panglai: mo zi Uphrad gyid lang ju" sho' gyi: lam: loo" nhang: wa zi nghoid.

²⁶Nyang: gi ngoo ri nang gi nga" phoo yo' nga" Mangsoo nghoid da- nang gi nga" da" goem loem su: yo' ngoo ri khyoid yu da" ASEING nghoid nyid ga: wigi tid wa nghoid.

²⁷Ngoo gi nyang: ri nga" zooshid" da" aya: moo tu: to' too" wa zi nghoid. Khokham yi dangain" da" atho' moo je" gyi: su: ngoo bue" loo nhang: wa zi nghoid.

²⁸Nga" da" dangsoo" khoin"- khanham we' nyang: moo: geung: jo, nhang: wigi nyang: yo' theung go" to: da" dangsoo" khoin" pyaid didu moo: ju" sho' dageung: teung jo, nhang: wa zi nghoid.

²⁹Nya: da" khokham byu kung: yiri mougkhung: su" geung: teung jo, nhang: wa. Nya: da" amyed ashen" joem gi khanham we' khokham bue" loo" goo" wa zi nghoid.

³⁰Nghoid loug we' nya: da" akung: ako' joem gi nga" da" tarha" ri atam" gyo: boem wigi nga" amyeing" dang: joem yo' dakhyoo" ti" acang lo" boem nghoid loug we'.

³¹Nga" da" jhoug" myeing" jhoug" thui: ri nyangnu" cishu: anhang: boem nghoid wigi Nga" da" Dang: theing khoin" joem ri acang lo" boem nghoid loug we'

³²Ngoo gi nyangnu" zei: shoid bye: da" yooboo joem yoomo nyangnu" ri yooboo dam kaid wa zi nghoid. Nyangnu" da" shoid vhang: lo" khyoo: joem yoomo ngoo gi nyangnu" ri kyi" khyeug khyoo: phu" zoo: nhang: wa zi nghoid.

³³Nghoid loug we' ngoo gi David ri khanham we' jheddab nyid nyang: ri to" byid: da" nga" dang: theing khoin" ri we' lhu: phyo' pyam byid: wa zi anghoid.

³⁴Nyang: yo' koid to" da" nga" dang: theing khoin" joem ri we' ngoo lhu: phyo' pyam wa zi anghoid. Nyang: moo: to" da" dangsoo" khoin" rilang" ngoo doem tau" yu wa zi anghoid.

³⁵Nga" da" gyeung" shang: myeing khyang" yo' dalheing: dam ngoo gi dang: theing byid: too" bye:. Ngoo gi David ri khanham we' mhoug wa zi anghoid.

³⁶Nya: da" amyed ashen yigi xo' loo: xo' danyid nyid boem wa zi nghoid bidbang dajo, jo, gi ngoo nya: mungdain: ri dazoung" yu" nyid wa zi nghoid.

³⁷Mougkhung: moo nheigloem: zung" da" thang" cab bue" jo, da- lhammoo" yo' dakhyoo" ti" hau: mungdain: we' dageung: jo, wa nghoid ga: tid.

³⁸Nghoid loug we' nang gi nanyang: khyen: yu da" khokham phoo ri nheig yo: nyid da:. Nang gi nyang: ri she: pyam ziyo to" pyam to" abye:.

³⁹Re" da" dei zoo: yo' too" go" da" dang: theing khoin" ri nanyang: lhu: phyo' pyam byid: ziyo' nya: bidmug ri pheilhoug: boem" moo nang khyoid khyo' pyam byid: bye:.

⁴⁰Nya: da" voomoo" vang" khyam: ri nang phyo' pyam byid: wigi nya: gyidab, ri nang byo, yoin" loo" nhang: bye:.

⁴¹So" lid lo" da" byu yi dangain" bang: gi khokham da" ziyoo joem ri khau" yu lo" boem ziyo' nya: yhoem: kyoo" cang" yi dangain" we' nyang: ri juang" yi nyid boem bye:.

⁴²Nang gi nya: gyivoo joem ri oung: doid loo" nhang: wigi nyangnu" dangain" ri nang gau yi nhang: nyid abye:.

⁴³Nang gi nya: gyizi gyikhoo: joem ri lhu: phyo' pyam byid: wigi nyang: ri gyi zain: jang: moo: soem" loo" nhang: nyid da:.

⁴⁴Nya: da" khokham amyeing" lhamdung: ri nang yu pyam byid: wigi Nya: da" khokham zhungtang ri myidjang moo: tu: se: pyam byid: abye:.

⁴⁵Nang gi nyang: ri ayo, aju" shi" ri mang: loo" nhang: wigi sho' thu gyoug thu nhang: nyid.

⁴⁶ASEING we" nang gi nanya: gung ri nanyang: dajha" yhoem" too" wa ein: bye: la". Re" da" nheigloem: nge" zigi myi: yhang: ti" khamyhang ju" sho' dange" nyid wa ein: la".

⁴⁷Nga" kangso' khayhi' leung" jo, ziri myid boin: we' shid: byug se' da" ngoonu" dangain" mo ri nang phain" so: to" ziri we' boin: so" nyid we'.

⁴⁸Houg: su: gi khanham ju" sho' ashid: abyug loo: yo" nyid wa la". Byu yigi nyang: gung nyang: loeb duang: khoug: khyoo: avang loo" sho' khasu" koid yo" toem too' wa lha".

⁴⁹ASEING we" goonham mo da" re" jheddab nheigloem: thang" cab gi akhid" khayoo: nghoid lha". David ri: nang byid: to" da" dangsoo" khoin" gi akhid" khayoo: nghoid bye: lha".

⁵⁰Re" da" dei zoo: ngoo khasu" aphoug" akhyoid koid zi shoug" nyid khyoo: ri ato" myid. Mangsoo ri aloem" ajeung" da" tungbau byumyu" yi da" nheing" myeing" ri ngoo khamyhoo, kham zeung: nyid ziri we' nang ato" myhed pyam byid.

⁵¹ASEING we"- nang khyen: nyheung to" da" khokham phoo ri re" da" gyivoo joem aphoug" akhyoid, koid nyid boem. Nyang so" lo" joyoo khyi khang" moo" moo: «Nyang ri nyangnu" gi aphoug" akhyoid koid nyid boem.

⁵²ASEING khanham we' coung" nghei nyid.