Read Lashi COUNG" NGHEI 9 Bible Online

COUNG" NGHEI 9 - Lashi bible

COUNG" NGHEI 9

¹ASEING we" nang ri nga" ung: khoug: nheigloem: bain sho yo' nang ri coung" nghei nyid wa. Nang koid bye: da" mau" pho" moo" zoo" bain sho ri ngoo tid fu" nyid wa.

²Nang ri nghe: khau: ayang: koid lho: ngoo gau yi lid jhoem" yang" wa. Myhang: thang da" Mangsoo nang ri ngoo coung" nghei jikhoin" dang: tid nyid wa nghoid.

³Nga" gyivoo joem gi nang thu' myhang: loo lang-" yu: zoid phang: lo" lho: nyangnu" gi leung gyoeb shid: lo" boem bye:.

⁴Nang gi tarha" dang: phyed khyoo: moo nyeung nyeung veung" ziyo' deungbyeung" zi nghoid lho wigi nang gi nga" shoid khyoo: dang: phyed byid: nyid.

⁵Nang gi Mangsoo abo bang: ri dang: phyed byid: lho: akhyeing" ashoeb bang: ri mhoin' pyam wigi nyangnu" gi toem: pyam zi shoug" bye:.

⁶Ngoonu" da" gyivoo joem gi apyaid atoo: moo: joem: thang byug bye:. Nang gi ngoonu" da" voogung joem ri we' phyo' sain" pyam byid: wigi hau: voogung joem gi khanham we' jha" byoug loo" bye:.

⁷Nghoid loug we' apyaid atoo: mo ASEING gi apyaid ato: khokham" nghoid. Nyang: gi yooboo dang: phyed wa shid re" nya: zhungtang ri nyeung too" bye:.

⁸Nyang: gi deing: byeung" khyo" mougmyid ri vhoebkhang" nyid lho: nyeung veung" khyo" byumyu" cang: joeb bang: ri dang: phyed byid: nyid.

⁹ASEING gi doin: zeug shoug" bang: da" phang: khoug: jang- yau: khe" kyi" khyeug shau" da" uri loid byoin myenjham" joyoo nghoid.

¹⁰ASEING we" nang ri si bang: gi nang ri loem" jeung" loem khau: lo boem wa zi nghoid. nang gi re" jhang khyoo: tain" tab, loo bang: hang" ri we' alhoem: khaid pyam.

¹¹Ziun moo: vhoebkhang" nyid da- ASEING ri coung" nghei jikhoin" khoin" nyid ge'. Nyang: koid moo" zoo" dangain" byumyu" bain sho mo, ri: tid kyoo" ge'.

¹²Mangsoo gi yau: khe sho" jhen bang: ri myid boin: nyid. Nyang: gi nyangnu" da" ngau yoid thui: ri ato" myhid. Nyangnu" tho' moo: age khyo" koid mo, ri yooboo dam kaid nyid.

¹³ASEING we" ngoo ri nheug khyeug shi" we'. Gyivoo joem koid yoomo ngoo khayhi' kyi" khyeug sho" jhen: shoug" nyid da" khyoo: ri yu" xoem" too" byid: we'. Ngoo ri shid: gyoin mo khyoid yu shi" we'.

¹⁴Houg: lang" ngoo gi Yerusalem voo byu yi shidkhoin" moo yo" yab jo, lho: ngoo nang ri coung" nghei khyoo: dangain"- nyangnu" ri yo" tid kyoo" wa zi nghoid.

¹⁵Mangsoo ayoo" mo, gi gyoin: du: to" boem- Nyangnu" gi nyangnu" da" gyoin: moo: byed, gyo" zi shau" boem abye: go".

¹⁶ASEING gi: deungmain" khyo" dang: phyed nyid wigi nya: gung du: ri pang shug bye:. Akhyeung" da" byu yigi nyangnu" nya: da" moo" zoo" khyo" nyang: khyo' tei" moo: nyang: myi" jo, boem abye:.

¹⁷Mangsoo ri she: pyam bang: dangain" mo, yo' akhyeing" ashaoeb mo, dangain" da" khyoo: lo" thang moo: gi shid: lo" khyoo: za: nghoid.

¹⁸Ca" nyid yo nyid mo, ri khanham we' to" myhed pyam wa zi anghoid. Sho" jhen: kyi" khyeug shoug" mo, gi nheug byu jang: ayoo" loo: sho' dapyaid goin" doin: zeug to" zi shoug" nyid wa anghoid.

¹⁹ASEING we" gyoo" loo we' byu yi nang ri yo" juang" wa akhang" abyid:- Mangsoo aboo mo, ri re" shidkhoin" moo: zheung" yu lho: nyangnu" ri dang: phyed byid: we'.

²⁰O" ASEING we" nyangnu" ri gyoug dain' nyid nhang: we'. Nyangnu" gi byo, yoin" shid: lo" ja: za: nghoid nyid ziri si' nhang: we'.