Read Lashi COUNG" NGHEI 90 Bible Online

COUNG" NGHEI 90 - Lashi bible

COUNG" NGHEI 90

¹[47] ASEING we" nang gi khanham we' ngoonu" da" khoug: loo joyoo yo' yhoem: nghoid nyid.

²Boem joem ri aphain" so: too" shi" ziyo' mougmyid yoosoo" ri amyhu: too' shi" mo wigi nang gi pyaid mo too: mo Mangsoo nghoid.

³Nang gi mougmyid byu yiri myidzhoo" phei" doem bue" loo" nhang: wigi Nyangnu" ri akhang joyoo khyoo: doem tau" loo" loo: ge' ga: nang tid nyid.

⁴Re" shidkhoin" moo zain void dakhyeing" ga: zigi danyid" ti" te: nghoid nyid wigi hau: zigi lid lo" byug bye:- anyid" nab bidnyid yo' leung" da" myen" ayo, yhang: te" nghoid nyid.

⁵Nang gi ngoonu" ri gyid khyoid su" khyoid she: lo" byoug wigi ngoonu" gi yhoeb mo, yi, lang" amyang daso, kyeing" nghoid da" vufu" myo, yhang: ti" za: date: nghoid nyid. Dakhyo" ein: rigi ngoonu" gi nab kyoo' ri anyug toid re" wigi

⁶Youg gyi: lo lho: bo" young" jo, nghoid loug we' myen" thang: ju" lang" gi kyoug lo" byoug ziyo' shid: lo" byoug da" vufu" myo, joem yhang: ti" ngoonu" nghoid nyid boem.

⁷Re" da" nheug khoo" yo: ziyo' ngoonu" byo, yoin" zi shoug" nyid boem bye:. Re" nheigloem: nge" loung jang" mo ngoonu" gyoug nain" zi shoug" nyid boem bye:.

⁸Nang gi ngoonu" da" yooboo joem ri re" da" shidkhoin" moo: thoid to" wigi ngoonu" dayhoem" to" da" joyoo moo: too" byid: nyid da:.

⁹Re" nheug khoo" yo: jang" mo ngoonu" da" kangso' ri leung loo" nhang: pyam bye:. Hau: zigi dang: so' so' da" thui: yhang: ti" lid moo: bei: lo" byug wa nghoid.

¹⁰Ngoonu" da" kangso' gi nyhed xi: zain' nghoid- ngoonu" yoem bo boem nghoid ri koem gi shed xi: zain' ju" nyid boem. Nghoid loug we' hougsu" kangso' dei nyid da" bidnyid gu: moo yau: khi" ziyo' koug shu: khyoo: za: kham' zo: nyid boem. Daso, lang" apyaid we' lid lo" byoug wigi ngoonu" gi dang: lo" byoug boem wa nghoid.

¹¹Yoem moo" so' moo" yo' re" da" nheug khoo" yo: khyoo: ri hang" kham' zo: nyid lha". Re" da" nheug khoo" yo: khyoo" wigi yo" ze" bui" nhang: da" gyoug ci' ge da" khyoo: ri kha: yug se' nyid lha".

¹²Ngoonu" gi ung: yeig phajhi" se' loo wa shid re" ngoonu" da" apyaid khayhi' gyeing" leung" da" khyoo: ngoonu" ri jhau" byid: we'.

¹³Re" da" nheug khoo" yo" zigi khamyhang gyeing" myang" wa la". ASEING we" re" dei zoo: yiri nheig khyeug shi" we' o".

¹⁴Nab khang" moo" re" da" geung: teung jhed khyeing: kang: khyeing: yo' ngoonu" ri joeb byeung" loo nhang: we' houg: lang- ngoonu" da" apyaid kangso' gyung: khyoo: bain sho' moo gau yi ziyo' nang ri coung" nghei jikhoin" yo" khoin" nyid baja".

¹⁵Ngoonu" kyi" khyeug yau: khi" zi shoug" nyid da" zain' nyid dangain" jang" moo nang ngoonu" ri shoug" nhang: bye: da" kougshu: khyoo: ri akhid" ngoonu" ri gau yi ngei pyo: khyoo: byid: we' o".

¹⁶Re" da" dei zoo: yi ngoonu" ri re" da" gyi: myhang: moo" zoo" ri myang nhang: we' Ngoonu" da" nya: myid: nya: zoo: yi we' re" myonhoo: phung" yoeb bo da" yoem: zeing so, moo" ri shau" myang nhang: we'.

¹⁷Ngoonu" da" ASEING Mangsoo we"- re" da" mainkaid jeju" gi ngoonu" yo' dage" jo, jo, baja" ngoonu" zei: nyid da" moo" zoo" jid: zoo" bain sho' moo oung: doid lo" khyoo: ngoonu" ri byid: we' o".