Read Lashi COUNG" NGHEI 91 Bible Online

COUNG" NGHEI 91 - Lashi bible

COUNG" NGHEI 91

¹Goem loem byid: khyoo: shoug" yu wa shid re" ASEING jhang ju" ri bang: hang" nghoid loug we' gyi: myhang da" goem loem byid: su: akhoug: moo shoug" khau: nghe: nyid su: nghoid bye:.

²Nang gi nga" da" yoem yu joyoo yo' ngoo ri lhoug zung" goem coung: byid: su: nghoid- nang gi nga" Mangsoo nghoid.

³Nyang: gi ayo" myang da- gyoug pho" shid: gyoin' joem yo' yo" shid: loo" nhang: da- noo phyoo" dangain" jang mo nang ri gau: nyu: sho' goem loem khyoo: ri yo" byid: zi nghoid.

⁴Nyang: gi nang ri nya: dung soo" joem yo' yo" nghoeb shoung: ci: wa zi nghoid. Nya: da" yu" goin' yu" coung: jang" moo nang gau: nyu: nyid wa zi nghoid. Nya: da" nheigloem: zung" da" khyoo: joem gi nang ri goem loem lhoug zung" byid: nyid wa zi nghoid.

⁵Myen" moo: bue" loo se' da" khayhang: te" gyoug pho" shid: gyoin' ri nghoid loug we' nyid" gung moo: bue" lo da" nyeigdain tung" gyi zain: go" khyoo: ri nghoid loug we' nang gyoug anoo.

⁶Xo' lho: wigi moug: coid moo: bue" lo da" noobau: phyoobau: ri nghoid loug we' nyid" khyoug ri akhyeing" ashoeb bang: khaid said loo nghoid loug we' nang gyoug anoo.

⁷Re" da" gung yam moo: byu dakhyeing" re" da" ayam aqei: moo damoin" shid: leung jo, nghoid loug we' nang moo: noo shoug" wa zi anghoid.

⁸Akhyeing" bang: gi khayhang: te" da" shid: gyoin' thoung" shoug" nyid ziri nang myang wa zi nghoid.

⁹Nang gi ASEING ri re" da" lhoug zung" joyoo yo' myhang: thang da" phoo ri re" da" goem loem su: khyo" nang koid nyid abye:.

¹⁰Xo' lho: nyeigdain tung" da" shid: gyoin' noogyoin' ri nang thoung" shoug" wa zi anghoid. Lhoid zoo: phyo' zo: lo" da" athoug" akhyoug: khyoo: we' re" yhoem: moo: jhang loo wa zi anghoid.

¹¹Nang so" lo" da" joyoo khyi khang" moo" moo nang ri cang lhoug zung" yen" wa ziyo' nang ri goem loem byid: wa shid re" Mangsoo gi nya: moug: lagyoo: yiri nhang: kaid wa zi nghoid.

¹²Lug boem joem moo: re" khyid: alo" thoung" nho: baja" ga: nyangnu" da" lo, joem yo' nang ri vu, yu wa zi nghoid.

¹³Akhyeung" da" khangkhyi joem yo' dug bo lhangmyu joem da" atho' moo nang yo" nang: gu: lid loo" wa zi nghoid. khangkhyi nu" joem yo' lhangmyu joem ri re" khyid: yo' yo" nang: pye" pyam wa zi nghoid.

¹⁴Mangsoo gi ngoo ri jheddab bang: ri ngoo khyoid yu wa. Ngoo ri ASEING ga: yhen: yu bang: ri ngoo goem loem byid: wa zi nghoid.

¹⁵Nyangnu" ngoo ri yoid lang- ngoo nyangnu" ri tu" byid: wa nghoid. Nyangnu" yau: khe" khyoo: shoug" nyid uri ngoo nyangnu" yo' dage" nyid nyid wa nghoid. Ngoo nyangnu" ri khyi yu lho: tu: to' coung" nghei byid: wa nghoid.

¹⁶Ngoo gi nyangnu" ri kang: sheing: nhang: wa nghoid. ngoo nyangnu" ri khyoid yu wa nghoid ga: tid nyid.